Read Shona Union Version 2002 Jeremia 4 Bible Online

Jeremia 4 - Shona Union Version 2002 bible

Jeremia 4

¹Zvanzi naJehovha, “Kana muchida kudzoka, imi Isiraeri, kana muchida kudzokera kwandiri, kana muchida kubvisa zvinonyangadza zvenyu pamberi pangu, hamungafaniri henyu kudzungaira.

²Ipapo muchapika, muchiti, ‘NaJehovha mupenyu,’ nezvokwadi, nezvakarurama, nokururama; ipapo marudzi achazviropafadza maari, nokuzvirumbidza maari.”

³Nokuti zvanzi naJehovha kuvanhu vaJudha naveJerusaremu, “Zviundirei gombo, idzva, musadyara pakati peminzwa.

⁴“Zvidzingisirei Jehovha, mubvise zvikanda zvapamberi zvomwoyo, imi vanhu vaJudha navagere Jerusaremu; kuti kutsamwa kwangu kukuru kurege kubuda somoto, upise kusino munhu unogona kuudzimura, nokuda kwezvakaipa zvamakaita.”

⁵Taurai pakati paJudha, muparidze muJerusaremu, muti “Ridzai hwamanda panyika,” danidzirai, muti, “Unganai, tindopinda mumaguta akakomberedzwa.

⁶“Simudzirai mureza kurutivi rweZioni, tizai, musamira; nokuti ndichauyisa zvakaipa zvinobva kurutivi rwokumusoro, nokuparadza kukuru.

⁷“Shumba yabuda ichibva mudenhere rayo, muparadzi wamarudzi wava munzira, wabuda panzvimbo yake, kuti aparadze nyika yenyu, maguta enyu aitwe matongo, kusina vanogaramo.

⁸“Naizvozvo zvisungei zviuno zvenyu namakudza, mucheme nokuwungudza; nokuti kutsamwa kukuru kwaJehovha hakuna kudzorwa kwatiri.”

⁹Zvino ndizvo zvinotaura Jehovha nezuva iro mwoyo wamambo uchaora, nemwoyo yamachindawo; vapristi vachashamiswa navaporofita vachakanuka.

¹⁰Ipapo ndikati, “Haiwa, Ishe Jehovha zvirokwazvo makanyengera kwazvo vanhu ava naveJerusaremu, zvamakati, ‘Muchava norugare, nyamba munondo unobaya kusvikira pamweya.’ ”

¹¹Nenguva iyo vanhu ava naveJerusaremu vachaudzwa, zvichinzi, “Tarirai mhepo inopisa, inobva kuzvikomo zvisina miti murenje, inouya kumukunda wavanhu vangu, isingavingi kurudza kana kunatsa;

¹²mhepo ine simba, inobva ikoko, ichandiuyira; zvino ndicharevawo zvandakatonga pamusoro pavo.”

¹³Tarirai, uchauya samakore, ngoro dzake dzichaita sechamupupuri; mabhiza ake anokurumidza kukunda makondo. Tine nhamo, nokuti taparadzwa.

¹⁴Haiwa, Jerusaremu, suka zvakaipa zviri pamwoyo wako, kuti uponeswe. Ndangariro dzako dzakaipa dzichagara mukati mako kusvikira riniko?

¹⁵Nokuti inzwi rinotaura richibva Dhani, rinoparidza njodzi richibva pazvikomo zveEfuremu.

¹⁶Udzai marudzi izvozvo; tarirai, paridzirai Jerusaremu, kuti nharirire dzinobva kunyika iri kure, dzinotaurira maguta aJudha zvakaipa.

¹⁷Dzinovakomberedza savarindi vanokomberedza munda, nokuti vakandimukira ndizvo zvinotaura Jehovha.

¹⁸Mufambire wako nezvawakaita ndizvo zvakakuyisira zvinhu izvi; ndiko kutadza kwako; nokuti zvinovava, nokuti zvinosvikira kumwoyo wangu.

¹⁹Maiwe! Hura hwangu, hura hwangu! Ndinorwadziwa mumwoyo mangu mumene; mwoyo wangu unodedera mukati mangu, handigoni kunyarara, nokuti wanzwa, iwe mweya wangu, wanzwa kurira kwehwamanda nemhere-mhere yokurwa.

²⁰“Kunonzi, kuparadzwa kunotevera kuparadzwa; nokuti nyika yose yaitwa dongo; matende angu aparadzwa kamwekamwe, namaseiri amatende angu pakarepo.

²¹Ndichaona mureza kusvikira riniko, nokunzwa kurira kwehwamanda?

²²Nokuti vanhu vangu mapenzi, havandizivi; vakaita vana vamapenzi, vasina njere, vakachenjera pakuita zvakaipa, asi havane zivo pakuita zvakanaka.”

²³Ndakatarira nyika, ndikaiona yaparadzwa, isina chinhu; ndikatarira denga rose, asi rakanga risina chiedza.

²⁴Ndakatarira makomo, ndikaona achidedera, nezvikomo zvose zvichizununguka.

²⁵Ndakatarira, ndikasaona munhu, neshiri dzose dzokunga dzakanga dzatiza.

²⁶Ndakatarira, ndikaona nyika yakanga ichibereka zvakanaka yashanduka renje, namaguta ayo ose akanga akoromoka pamberi paJehovha, napamberi pokutsamwa kwake kukuru.

²⁷Nokuti zvanzi naJehovha, “Nyika yose ichasiyiwa yaparadzwa, asi handingaipedzi chose.”

²⁸Nemhaka iyi nyika ichachema, nedenga rose kumusoro richasviba; nokuti ndakazvitaura, ndakafunga kuzviita, handina kuzvidemba, handingadzoki pachinhu ichi.

²⁹Maguta ose anotiza nokuda kwomubvumo wavatasvi vamabhiza navafuri vouta; vanopinda mumatenhere, vanokwira pamatombo; ose akasiyiwa hakuna munhu unogaramo.

³⁰Zvino iwe, kana waparadzwa, uchaiteiko? Kunyange ukafuka mucheka mutsvuku, kunyange ukazodza meso ako nomuti mutema, ungazvinatsa pasina; vadikanwa vako vanokuzvidza, vanotsvaka kukuuraya.

³¹Nokuti ndakanzwa inzwi seromukadzi unosurumuka, serounotambudzika pakupona dangwe rake, inzwi romukunda weZioni, unofemedzeka, unotambanudza maoko ake, achiti, “Ndine nhamo zvino! Nokuti mweya wangu waziya pamberi pavaurayi vangu!”