Read Shona Union Version 2002 Jeremia 43 Bible Online

Jeremia 43 - Shona Union Version 2002 bible

Jeremia 43

¹Zvino Jeremiya wakati apedza kuudza vanhu mashoko ose aJehovha Mwari wavo, aakanga atumwa nawo kwavari naJehovha Mwari wavo, iwo mashoko awa ose,

²ipapo Azaria mwanakomana waHoshaia, naJohanani mwanakomana waKarea, navarume vose, vaizvikudza, vakataura vachiti, kuna Jeremiya, “Unoreva nhema, Jehovha Mwari wedu haana kukutuma kuzoti, ‘Musaenda Ijipiti kundogarapo muri vatorwa;

³asi Bharuki mwanakomana waNeria ndiye unokumutsa pamusoro pedu, kuti tiiswe mumaoko avaKaradhea, kuti vatiuraye nokutitapira Bhabhironi.’ ”

⁴Naizvozvo Johanani mwanakomana waKarea, navakuru vose vehondo, navanhu vose, havana kuterera inzwi raJehovha, kuti vagare munyika yaJudha.

⁵Asi Johanani mwanakomana waKarea, navakuru vose vehondo, vakatora vose vakasara vaJudha, vakanga vadzoka kumarudzi ose kwavakadzingirwa, vachida kugara vari vatorwa munyika yaJudha,

⁶vaiti, varume navakadzi navana navakunda vamambo nomunhu upi noupi akanga asiyiwa naNebhuzaradhani mukuru wavarindi kuna Gedharia mwanakomana waAhikami, mwanakomana waShafani, pamwechete naJeremiya muporofita, naBharuki mwanakomana waNeria,

⁷vakandosvika kunyika yeIjipiti; nokuti havana kuterera inzwi raJehovha; vakandosvika Tapanesi.

⁸Ipapo shoko raJehovha rakasvika kuna Jeremiya paTapanesi, richiti,

⁹“Tora mabwe makuru muruoko rwako, uavige muvhu pakati pezvitina, pavanopinda napo paimba yaFarao naTapanesi, vanhu vose vaJudha vachizviona;

¹⁰ugoti kwavari, ‘Zvanzi naJehovha wehondo, mwari waIsiraeri, Tarirai, ndichatuma shoko kundotora Nebhukadhirezari mambo weBhabhironi, muranda wangu, ndiise chigaro chake choushe pamusoro pamabwe awa andakaviga; uchawirira pamusoro pawo jira rake rinobwinya.

¹¹Uchauya achirova nyika yeIjipiti; vakafanira rufu vachaiswa kurufu, vakafanira kutapwa vachaiswa kukutapwa, vakafanira munondo vachaiswa kumunondo.

¹²Ndichabatidza moto mudzimba dzavamwari veIjipiti; uchadzipisa nokuvatapa; uchafuka nyika yeIjipiti somufudzi unofuka nguo yake, uchabvapo norugare.

¹³Uchaputsawo shongwe dzeBhetishemeshi, riri munyika yeIjipiti; dzimba dzavamwari veIjipiti uchadzipisa nomoto.’ ”