Read Shona Union Version 2002 Jeremia 46 Bible Online

Jeremia 46 - Shona Union Version 2002 bible

Jeremia 46

¹Shoko raJehovha, rakasvika kumuporofita Jeremiya pamusoro pamarudzi.

²Pamusoro peIjipiti; pamusoro pehondo yaFaraoneko mambo weIjipiti, yakanga iri parwizi Yufuratesi paKarikemishi, yakakundwa naNebhukadhirezari mambo weBhabhironi negore rechina raJehoiakimu mwanakomana waJosia, mambo waJudha.

³“Gadzirai nhoo duku nenhoo huru, muswedere kunorwiwa.

⁴Sungai mabhiza, kwira imi vatasvi, mumire makadzika ngowani dzenyu; rodzai mapfumo, pfekai nguo dzamatare.

⁵“Ndakazviwonereiko? Vakanganiswa, vadzokera shure; mhare dzavo dzakundwa, dzatiza, hadzicheukiri shure, kutya kuri pamativi ose, ndizvo zvinotaura Jehovha.

⁶Vanomhanyisa ngavarege kutiza, mhare ngadzirege kupukunyuka; kurutivi rwokumusoro, parwizi rwaYufuratesi, vakagumburwa vakawira pasi.

⁷“Ndianiko uyo unokwira sorwizi rwaNairi, mvura yarwo inotamba senzizi?

⁸“Ijipiti rinokwira saNairi, mvura yarwo inotamba senzizi; rinoti, ‘Ndichakwira, ndichafukidza nyika, ndichaparadza maguta navageremo.’

⁹Kwirai, imi mabhiza, fambisai imi ngoro, mhare ngadzibude, vanoti, Kushi naPuti vanoshonga nhoo, navaRudhi vanobata nokuwembura huta.

¹⁰Nokuti zuva iro izuva raShe, Jehovha wehondo, zuva rokutsiva kuti azvitsivire vadzivisi vake; munondo uchadya nokuguta, uchanwa ropa ravo ukaguta, nokuti Ishe, Jehovha wehondo, unechibayiro chake kunyika yokumusoro parwizi rwaYufuratesi.

¹¹Kwira uende Gireadhi, undotorako muti webharisami, iwe mhandara, mukunda weIjipiti; wawanza mishonga mizhinji isina maturo, hauporeswi.

¹²Marudzi akanzwa zvokunyadziswa kwako, nyika izere nokuchema kwako; nokuti mhare dzakabonderana nemhare, vose vaviri vakawira pasi.”

¹³Shoko, rakaudzwa muporofita Jeremiya naJehovha, richireva muuyire waNebhukadhirezari mambo weBhabhironi nomukundire wake nyika yeIjipiti.

¹⁴“Paridzirai paIjipiti, zivisai paMigidhori, zivisai paNofi napaTapanesi, muti, ‘Simukai muzvigadzire, nokuti munondo wakadya zviri kumativi ako ose.

¹⁵Mhare dzako dzakabviswa neiko? Havana kumira, nokuti Jehovha wakavadzinga.’

¹⁶Wakagumbusa vazhinji, zvirokwazvo mumwe wakawira pamusoro pomumwe; vakati, ‘Simukai, tiendezve kuvanhu vedu, nokunyika kwatakaberekerwa, titize munondo unomanikidza.’

¹⁷Vakadanidzirako, vachiti, ‘Farao mambo weIjipiti iguhu zvaro, wakarega nguva yakatarwa ichipfuura.’

¹⁸“Nohupenyu hwangu,” ndizvo zvinotaura Mambo, une zita rinonzi Jehovha wehondo, “Zvirokwazvo uchauya akaita seTabhori pakati pamakomo, uye seKarimeri pagungwa.

¹⁹Iwe mukunda unogara Ijipiti, zvigadzirire kutapwa, nokuti Nofi richaitwa dongo, richapiswa, risina unogaramo.

²⁰Ijipiti imhorombe yakaisvonaka, asi huhu rinobva kurutivi rwokumusoro rasvika, rasvika.

²¹“Navanhu varo vanoripirwa, vari mukati maro, vakafanana nemhuru dzomudanga, nokuti naivo vakadzoka, vakatiza pamwechete, havana kumira; nokuti zuva renjodzi yavo rakauya pamusoro pavo, iyo nguva yokurohwa kwavo.

²²Mubvumo waro uchava sowenyoka, nokuti vachafamba nehondo, vachandorwa navo namatemo, savatemi vemiti.

²³Vachatema dondo raro, ndizvo zvinotaura Jehovha, nokuti havanganzverwi, nokuti vakawanda kupfuura mhashu, havangaverengwi.

²⁴Mukunda weIjipiti uchanyadziswa, uchaiswa mumaoko avanhu vanobva kurutivi rwokumusoro.”

²⁵Jehovha wehondo, Mwari waIsiraeri, unoti, “Tarirai, ndicharova Amoni neNo, naFarao, neIjipiti navamwari varo, namadzimambo aro, iye Farao navose vanovimba naye.

²⁶Ndichavaisa mumaoko avanotsvaka kuvauraya, nomumaoko aNebhukadhirezari mambo weBhabhironi, nomumaoko avaranda vake; zvino pashure richagarwa, sapamazuva akare ndizvo zvinotaura Jehovha.

²⁷Asi usatya hako, iwe Jakobho, muranda wangu, usavhunduswa, iwe Isiraeri; nokuti tarira, ndichakuponesa uri kure, navana vako vari panyika kwavakatapirwa; Jakobho uchadzoka, uchanyarara nokuzorora, hakuna ungamutyisa.

²⁸Usatya hako, iwe Jakobho, muranda wangu, ndizvo zvinotaura Jehovha, nokuti ndinewe; nokuti ndichapedza kwazvo marudzi ose kwandakakudzingira; asi iwe handingakupedzi, asi ndichakuranga ndichiita nokururama, handingakuregi usina kurohwa.”