Read Shona Union Version 2002 Jeremia 48 Bible Online

Jeremia 48 - Shona Union Version 2002 bible

Jeremia 48

¹Pamusoro paMoabhu. “Zvanzi naJehovha wehondo, Mwari waIsiraeri, ‘Nebho rine nhamo, nokuti raparadzwa; Kiriataimu ranyadziswa, rakundwa; Mishigabhi ranyadziswa, ravhunduswa.’

²Mbiri yaMoabhu haichipo; paHeshibhoni vakarangana zvakaipa pamusoro pavo, vachiti, ‘Uyai, tivaparadze, varege kuzova rudzi.’ Newewo Madhimeni, uchanyaradzwa, munondo uchakutevera.

³Inzwai inzwi rokuchema rinobva Horonaimi, ‘Kuparadzwa nokukoromorwa kukuru!’

⁴Moabhu vaparadzwa; vanana vavo vakanzwika vachichema.

⁵Nokuti vachakwira nomukwidzwa weRuhiti vachingochema; nokuti pamatenusirwa eHoronaimi vakanzwa njodzi yokuchema kwokuparadzwa.

⁶‘Tizai, muponese mweya yenyu, mufanane negwenzi murenje.’

⁷Nokuti zvamakavimba namabasa enyu nepfuma yenyu, muchakundwawo; Kemoshi vachaenda kwavanotapwa, vapristi vavo namachinda avo pamwechete.

⁸Muparadzi uchawira guta rimwe nerimwe, hakuna guta richapukunyuka; mupata uchapararawo, nebani richaparadzwa, sezvakataura Jehovha.

⁹Ipai Moabhu mapapiro, vabhururuke, vaende; maguta avo achava matongo, anoshaiwa unogaramo.

¹⁰Ngaatukwe unobate basa raJehovha asina hanya naro; ngaatukwe unodzora munondo wake paropa.

¹¹“Moabhu vakanga vane zororo kubva pahuduku hwavo, vakagara pamasese avo, havanakudururwa vachibviswa mumudziyo, uye havana kutapwa; naizvozvo kuzipa kwavo kwakarambira mukati mavo, nokunhuwira kwavo hakuna kushanduka.

¹²“Naizvozvo tarirai, mazuva anouya ndizvo zvinotaura Jehovha andichatuma kwavari vanomimina; ivo vachavamimina, vachadurura midziyo yavo chose, nokuputsanya hari dzavo.

¹³Moabhu vachanyara pamusoro peKemoshi, sezvakanyadziswa imba yaIsiraeri pamusoro peBhetieri, ravaivimba naro.

¹⁴Munotaura seiko, muchiti, ‘Tiri mhare, vanhu vakatsunga pakurwa?’

¹⁵Moabhu vaparadzwa, vakwira mumaguta avo, majaya avo akasanangurwa akaburuka kundourawa ndizvo zvinotaura Mambo, une zita rinonzi Jehovha wehondo.

¹⁶“Njodzi yaMoabhu yava pedyo yodokuuya, nhamo yavo yokurumidza kuuya.

¹⁷Vachemei, imi mose makavapoteredza, imi mose munoziva zita ravo; muti, ‘Haiwa, tsvimbo yakasimba, iwo mudonzvo wakanaka, zvavhunika sei!’

¹⁸“Iwe mukunda unogara Dhibhoni, buruka pakukudzwa kwako, ugare pane nyota, nokuti muparadzi waMoabhu wauya kuzorwa newe, waparadza nhare dzako.

¹⁹Iwe unogara Aroeri, mira panzira utarire; bvunza unotiza nounopukunyuka, uti, ‘Chinyiko chaitwa?’

²⁰Moabhu vakanyadziswa, nokuti vakakoromorwa. Wungudzai mucheme, muzviparidzire paArinoni kuti Moabhu vaparadzwa.

²¹“Zvirokwazvo, kutongwa kwasvika panyika yamapani, paHoroni, napaJaza, napaMefaati,

²²napaDhibhoni, napaNebho, napaBhetidhibhirataimu,

²³napaKiriataimu, napaBhetigamuri, napaBhetimeoni,

²⁴napaKerioti, napaBhozira, napamaguta ose enyika yavaMoabhu, kure kana pedyo.

²⁵Runyanga rwaMoabhu rwagurwa, ruoko rwavo rwavhuniwa ndizvo zvinotaura Jehovha.

²⁶“Muvape doro vabatwe, nokuti vakaita manyawi pamberi paJehovha; Moabhu vachawumburuka mumarutsi avo, vachasekwawo.

²⁷Nokuti Isiraeri havana kusekwa nemi here? Vakawanikwa pakati pamakororo here? Nokuti nguva dzose kana muchimureva iye munodzungudza misoro yenyu.

²⁸“Imi mugere panyika yaMoabhu, ibvai mumaguta, mugare mudombo, muve senjiva inovaka dendere rayo pamativi amawere.

²⁹Takanzwa kuzvikudza kwaMoabhu, kuti vanozvikudza kwazvo; nokuzvirumbidza kwavo, namanyawi omwoyo wavo.

³⁰Ndinoziva hasha dzavo, kuti hadzina maturo ndizvo zvinotaura Jehovha; kuzvirumbidza kwavo hazvina kuita chinhu.

³¹Naizvozvo ndichawungudza pamusoro paMoabhu, zvirokwazvo ndichadanidzira pamusoro pavaMoabhu vose; vachachema vanhu veKiriheresi.

³²Ndichakuchemera, iwe mudzambiringa weSibhima, nokuchema kunopfuura kuchema kwaJazeri; matavi ako akadarika gungwa, akandosvika pagungwa raJazeri; muparadzi wawira zvibereko zvako zvezhezha namadzambiringa ako.

³³“Mufaro nokufara zvabviswa pamunda wakanga uchibereka zvakanaka napanyika yaMoabhu; ndakagumisa waini pazvisviniro, hakuna vachatsika vachipururudza, kupururudza hakungavi kupururudza.

³⁴“Kubva pakuchema kweHeshibhoni kusvikira Ereare, nokusvikira Jahazi, vakanzwisa inzwi ravo, kubva Zoari kusvikira Horonaimi neEgiratisherishiya; nokuti nemvura zhinji yeNimirimi ichaparadzwa.

³⁵“Ndichagumisawo pakati paMoabhu ani naani unobayira panzvimbo dzakakwirira, naiye unopisira vamwari vake zvinonhuwira ndizvo zvinotaura Jehovha.

³⁶“Naizvozvo mwoyo wangu unorira pamusoro paMoabhu senyere, nomwoyo wangu unorira senyere pamusoro pavanhu veKiriheresi; naizvozvo zvakawanda zvaakazviwanira zvapera.

³⁷Nokuti misoro yose yava nemhazha, nendebvu dzose dzaveurwa; maoko ose atemwa, nezviuno zvose zvinamasaga.

³⁸Pamatenga edzimba dzaMoabhu, napanzira dzomumisha yavo kuwungudza kuripo pose; nokuti ndaputsa Moabhu somudziyo usingafadzi munhu ndizvo zvinotaura Jehovha.

³⁹Vakoromorwa sei! Vanowungudza sei! Moabhu vakafuratira sei nokunyadziswa! Saizvozvo Moabhu vachava chinhu chinosekwa nechinotyisa pakati pavose vanovapoteredza.”

⁴⁰Nokuti zvanzi naJehovha, “Tarirai, uchabhururuka segondo, uchatambanudzira mapapiro ake kuzorwa naMoabhu.

⁴¹Maguta akundwa, nhare dzakundwa, nezuva iro mwoyo yemhare dzaMoabhu ichaita somwoyo womukadzi pakurwadziwa kwake.

⁴²Moabhu vachaparadzwa, varege kuva rudzi rwavanhu, nokuti vakazvikudza pamberi paJehovha.

⁴³Kutya nehuzha nomusungo zvasvika kwauri, iwe ugere panyika yaMoabhu, ndizvo zvinotaura Jehovha.

⁴⁴Unotiza chinotyisa uchawira muhuzha; unokwira achibuda muhuzha uchabatwa nomusungo, nokuti ndichauyisa pamusoro pavo, ipo pamusoro paMoabhu, gore rokurohwa kwavo, ndizvo zvinotaura Jehovha.

⁴⁵Vakatiza vamire pamumvuri weHeshibhoni vasina simba, nokuti moto wabuda paHeshibhoni, nomurazvo pakati paSihoni, waparadza mativi aMoabhu nemisoro yavanoda kurwa.

⁴⁶Mune nhamo, imi Moabhu! Vanhu veKemoshi vapera; nokuti vanakomana venyu vatapwa, navakunda venyu vaiswa kukutapwa.

⁴⁷“Asi namazuva okupedzisira ndichadzosa kutapwa kwaMoabhu ndizvo zvinotaura Jehovha.” Ndipo panosvika kutongwa kwaMoabhu.