Read Shona Union Version 2002 Jeremia 6 Bible Online

Jeremia 6 - Shona Union Version 2002 bible

Jeremia 6

¹Tizai, imi vana vaBhenjamini, ibvai pakati peJerusaremu, muridze hwamanda paTekoa, mumutse chiratidzo paBheterehemu; nokuti zvakaipa zvinovavarira zviri kurutivi rwokumusoro, nokuparadza kukuru.

²Ndichabvisa mukunda weZioni, iye wakanaka, uno nengwe.

³Vafudzi vachaenda kwariri vana mapoka avo; vacharidzikira matende avo kumativi ose, mumwe nomumwe uchafura panzvimbo yake.

⁴“Zvigadzirei kundorwa naro; simukai, tiende masikati. Tine nhamo, nokuti zuva rovira, nokuti mimvuri yamadekwana yareba.

⁵“Simukai, tiende husiku, tindoparadza dzimba dzamadzimambo aro.”

⁶Nokuti zvakanzi naJehovha wehondo, “Temai miti, mututire Jerusaremu murwi wokurwa nawo; ndiro guta rinofanira kurohwa, mukati maro munongova nokumanikidza bedzi.

⁷Tsime sezvarinobudisa mvura yaro, saizvozvo rinobudisa zvakaipa zvaro; kuita nesimba nokuparadza ndizvo zvinzwika mukati maro, pamberi pangu panongova nokurwara namavanga nguva dzose.

⁸Tenda kurangwa, iwe Jerusaremu, kuti mweya wangu urege kuparadzana newe, ndirege kukuita dongo, nyika isingagari vanhu.”

⁹Zvanzi naJehovha wehondo, “Vachatanha chose zvakasara zvaIsiraeri, somudzambiringa; dzoseraizve ruoko rwenyu mumatengu, sezvinoita mutanhi wemidzambiringa.”

¹⁰Ndichataura nani nokuvapupurira vanzwe? Tarirai, nzeve dzavo hadzina kudzingiswa, havagoni kunzwa; tariai, shoko raJehovha rava kwavari chinhu chinodadirwa, havarifariri.

¹¹Naizvozvo ndizere nokutsamwa kwaJehovha, ndaneta kuzvidzora; “Chikudururai pamusoro pavana vari munzira dzomuguta, napamusoro peungano yamajaya; nokuti murume nomukadzi vachabatwa pamwechete, nomutana pamwechete nowava namazuva mazhinji.

¹²Dzimba dzavo dzichapiwa vamwe, minda yavo pamwechete navakadzi vavo; nokuti ndichatambanudzira ruoko rwangu pamusoro pavagere panyika,” ndizvo zvinotaura Jehovha.

¹³Nokuti kubva kuvaduku pakati pavo kusvikira kuvakuru pakati pavo mumwe nomumwe unokarira pfuma; uye kubva kuvaporofita kusvikira kuvapristi mumwe nomumwe unoita nokunyengera.

¹⁴Vakangopodza vanga ravanhu vangu zvishoma vachiti, “Rugare, rugare!” Izvo hakuna rugare.

¹⁵Ko vakanyadziswa nguva yavakaita zvinonyangadza here? Kwete havanakutongonyara, vakakoniwa kucheneruka; naizvozvo vachawa pakati pavanowa, panguva yandinovarova vachagumburwa, ndizvo zvinotaura Jehovha.

¹⁶Zvanzi naJehovha, “Mirai panzira, muwone; bvunzai nzira dzakare, kuti nzira yakanaka ndeipi; mufambe mairi, mugowanira mweya yenyu zoro;” asi vakati, “Hatidi kufamba mairi.”

¹⁷Ndakagadza nharirire kukurindirai, ndikati, “Tererai inzwi rehwamanda;” asi ivo vakati, “Hatidi kuterera.”

¹⁸Naizvozvo inzwai, imi marudzi, newe ungano, muzive zviri pakati pavo.

¹⁹Inzwa, “Iwe nyika, tarira, ndini ndinouyisira vanhu ava zvakaipa, izvo zvibereko zvemifungo yavo, nokuti havana kuterera mashoko angu; kana uri murayiro wangu, vakauramba.

²⁰Ko zvinonhuwira zvinouyirei kwandiri zvichibva Shebha, nekaramusi inobva kunyika iri kure? Zvipiriso zvenyu zvinopiswa handizvidi, nezvibayiro zvenyu hazvindifadzi.

²¹Naizvozvo zvanzi naJehovha, ‘Tarirai, ndichaisira vanhu ava zvigumbuso, madzibaba navanakomana vavo vachagumbuswa nazvo pamwechete; munhu neshamwari yake vachaparara pamwechete.’ ”

²²Zvanzi naJehovha, “Tarirai, vanhu vachabva kunyika yokumusoro, rudzi rukuru ruchamutswa, ruchibva kumigumo yenyika.

²³Vakabata uta nepfumo, vane hasha havane nyasha; inzwi ravo rinotinhira segungwa; vanotasva mabhiza, mumwe nomumwe wakazvigadzira, somunhu unoenda kuhondo, kuzorwa newe, iwe mukunda weZioni.”

²⁴Takanzwa guhu razvo, maoko edu oshaiwa simba, tabatwa nokutambudzika, nokurwadziwa sokwomukadzi unosurumuka.

²⁵Regai kubudira kubundo, kana kufamba nenzira; nokuti munondo womuvengi nezvinotyisa zviri kumativi ose.

²⁶Haiwa, mukunda wavanhu vangu, “Zvisunge chiuno namakudza, uumburuke mumadota; chema, somunhu unochema mwanakomana wake mumwechete, nokuchema kukuru kwazvo; nokuti muparadzi uchatiwira pakarepo.”

²⁷Ndakakuita mushori nenhare pakati pavanhu vangu, kuti uzive nokuidza zira yavo.

²⁸Vose vavo vamukiri vakaisvoipa, vanongofamba-famba vachiita makuhwa; indarira nedare, vanoita zvakashata vose.

²⁹Mvuto inovhutira kwazvo, mutobvu wapera nomoto, vanoramba vachinatsa pasina, nokuti vakaipa havabviswi.

³⁰Vachanzi sirivha yakarashwa, nokuti Jehovha wakavaramba.