Read Shona Union Version 2002 Jeremia 8 Bible Online

Jeremia 8 - Shona Union Version 2002 bible

Jeremia 8

¹“Nenguva iyo ndizvo zvinotaura Jehovha uchabvisa pamahwiro avo mapfupa amadzimambo avaJudha, namapfupa amachinda avo, namapfupa avapristi, namapfupa avaporofita, namapfupa avaigara paJerusaremu;

²vachaaparadzira panopenya zuva nomwedzi nehondo yose yokudenga, izvo zvavaida, nezvavaishumira, nezvavaitevera, nezvavaivinga, nezvavainamata; haangaunganidzwi, kana kuvigwa, asi achava mupfudze panyika.

³Rufu ruchasanangurwa kupfuura hupenyu navose vakasara panzvimbo dzose kwandakavadzingira” ndizvo zvinotaura Jehovha wehondo.

⁴Zvino unofanira kuti kwavari, “Zvanzi naJehovha, ‘Ko vanhu vangawa, vakasazomukazve here? Munhu ungatsauka, akasazodzoka here?’

⁵Zvino vanhu ava veJerusaremu vakadzokereiko nokudzokera kusingatongoperi? Vanonamatira kunyengera, vanoramba kudzoka.

⁶Ndakaterera, ndikanwa, asi havana kutaura zvakarurama; hakuna munhu unochema kuipa kwake, achiti, ‘Ndaiteiko?’ Mumwe nomumwe unotsauka nenzira yake, sebhiza rinomhanya kwazvo pakurwa.

⁷Zvirokwazvo, zvimudo, riri kudenga, rinoziva nguva dzaro dzakatarwa, nenjiva nenyenganyenga nekondo dzinorangarira nguva yokuuya kwadzo, asi vanhu vangu havazivi murayiro waJehovha.

⁸Munoreva seiko, muchiti, ‘Takachenjera, murayiro waJehovha tinawo? Asi tarirai, peni yenhema yavanyori inonyengera.’

⁹Vanhu vakachenjera vakanyadziswa, vakavhunduka nokubatwa; tarirai, vakaramba shoko raJehovha, zvino vane njere dzakadiniko?

¹⁰Naizvozvo ndichapa vamwe vakadzi vavo, neminda yavo ndichaipa vamwe vachaiita yavo; nokuti mumwe nomumwe wavo, kubva kuvaduku kusvikira kuvakuru, mumwe nomumwe unokarira pfuma; kubva kuvaporofita kusvikira kuvapristi mumwe nomumwe unoita nokunyengera.

¹¹Vakangopodza vanga romukunda wavanhu vangu zvishoma, vachiti, ‘Rugare, rugare!’ Izvo hakuna rugare.

¹²“Ko vakanyadziswa nguva yavakaita zvinonyangadza here? Kwete, havana kutongonyara, vakakoniwa kucheneruka; naizvozvo vachawa pakati pavanowa; panguva yokurohwa kwavo vachagumburwa ndizvo zvinotaura Jehovha.

¹³“Ndichavapedza chose,” ndizvo zvinotaura Jehovha; “Hakungavi namadzambiringa pamudzambiringa, kana maonde pamuonde, namashizha achaoma ndakaraira vachavakukura.

¹⁴“Tinogarireiko pasi? Unganai, tipinde mumaguta akakomberedzwa, tifirepo; nokuti Jehovha Mwari wedu wakatiuraya, akatipa mvura inouraya kuti tiinwe; nokuti takatadzira Jehovha.

¹⁵Takanga takatarira rugare, asi hakuna chakanaka chakasvika; takanga takatarira nguva yokuporeswa, asi tarirai, takavhunduswa.

¹⁶Kufemhedza kwamabhiza ake kwakanzwika achiri paDhani; nyika yose yakadedera nenzwi rokurira kwaane simba ake; nokuti asvika, apedza nyika nezvose zvirimo, neguta navose vageremo.

¹⁷“Nokuti tarirai, ndichatuma pakati penyu nyoka nemvumbi, dzicharamba kuroyiwa; dzichakurumai,” ndizvo zvinotaura Jehovha.

¹⁸Haiwa, dai ndaigona hangu kuzvinyaradza pakuchema kwangu! Mwoyo wangu waziya mukati mangu.

¹⁹Inzwai, inzwi rokuchema kwomukunda wavanhu vangu, rinobva kunyika iri kure-kure, richiti, “Ko Jehovha haazi muZioni here? Mambo waro haazi mukati maro here? Vakanditsamwisireiko nezvifananidzo zvavo zvakavezwa, nezvavatorwa zvisina maturo?”

²⁰“Kucheka kwapera, zhizha rapfuura, asi tigere kuponeswa.”

²¹Ini ndinokuvadzwa nokuda kwokukuvadzwa kwomukunda wavanhu vangu; ndinochema, ndabatwa nokuvhunduswa.

²²Ko hakuna muti webharisami muGireadhi here? Hakune n'anga ko here? Nokuti mukunda wavanhu vangu wakagoregerei kupodzwa?