Read Shona Union Version 2002 Jeremia 9 Bible Online

Jeremia 9 - Shona Union Version 2002 bible

Jeremia 9

¹Haiwa, dai musoro wangu waiva nemvura zhinji, nameso angu riri tsime remisodzi, ndingadai ndaichema masikati nohusiku nokuda kwavakaurawa vomukunda wavanhu vangu!

²Haiwa, dai ndaiva nedumba rinosigarwa navafambi murenje, ndingadai ndaisiya vanhu vangu, ndikabva kwavari! Nokuti vose imhombwe, iungano yavanhu vanonyengera.

³“Vanokunga marimi avo, sezvavanoita huta hwavo, kuzoreva nhema; vasimba panyika, asi havaiti nezvokwadi; nokuti vanoramba vachingoita zvakaipa, havandizivi,” ndizvo zvinotaura Jehovha.

⁴Mumwe nomumwe ngaachenjerere wokwake, murege kutenda hama ipi neipi; nokuti hama imwe neimwe ichanyengera, nowokwake mumwe nomumwe uchapota-pota ana makuhwa.

⁵Mumwe nomumwe uchanyengera wokwake, haangarevi zvokwadi; vakadzidzisa marimi avo kureva nhema, vanozvinetsa nokuita zvakaipa.

⁶“Hugaro hwenyu huri pakati pokunyengera; vanoramba kundiziva nokunyengera kwavo,” ndizvo zvinotaura Jehovha.

⁷Naizvozvo zvanzi naJehovha wehondo, “Tarirai, ndichanyausa nokuvaidza; nokuti ndingaita seiko pamusoro pomukunda wavanhu vangu?

⁸Marimi avo miseve inouraya, anoreva zvinonyengera; munhu unoreva zvorugare kuno wokwake nomuromo wake, asi mumwoyo make unovandira.

⁹Ko handingavarovi pamusoro pezvinhu izvi here? Ndizvo zvinotaura Jehovha. Ko mweya wangu haungatsihwi parudzi rwakadai here?”

¹⁰“Ndichachema nokuwungudza pamusoro pamakomo, ndichachema pamusoro pamafuro amarenje, nokuti zvatsva, hakuna unopfuura napo; vanhu havagoni kunzwa inzwi rezvipfuo; shiri dzokudenga nemhuka dzose zvatiza, zvaenda hazvo.

¹¹Ndichaita Jerusaremu mirwi yamabwe, panogara makava; namaguta aJudha ndichaaita matongo, asina unogaramo.”

¹²Munhu wakachenjera, unonzwisisa izvozvi, ndianiko? Muromo waJehovha wakataura naniko, kuti aparidze izvozvi? Nyika yakapedzwa nokupiswa serenje neiko, pasina unopfuura napo?

¹³Jehovha wakati, “Zvavakarasha murayiro wangu wandakaisa pamberi pavo, vakasaterera inzwi rangu, nokufamba nazvo,

¹⁴asi vakatevera hukukutu hwemwoyo yavo navaBhaari, izvo zvavakadzidziswa namadzibaba avo;

¹⁵naizvozvo zvanzi naJehovha wehondo, Mwari waIsiraeri, ‘Tarirai, ndichadyisa vanhu ava gavakava, nokuvanwisa mvura yenduru.

¹⁶Ndichavaparadzirawo pakati pamarudzi, avakanga vasingazivi ivo kunyange namadzibaba avo; ndichatuma munondo uvatevere, kusvikira nadavapedza.’ ”

¹⁷Zvanzi naJehovha wehondo, “Rangarirai imi, mudane vakadzi vangachema, vauye; tumai mudane vakadzi mhizha, vauye;

¹⁸ngavakurumidze vacheme pamusoro pedu, kuti meso edu ayerere misodzi, namafungiro edu adurure mvura.”

¹⁹Nokuti inzwi rokuchema rinonzwika richibva Zioni, richiti, “Haiwa, takaparadzwa seiko! Takanyadziswa kwazvo, nokuti tabva panyika yedu nokuti vakakoromora dzimba dzedu dzataigara.”

²⁰Asi inzwai shoko raJehovha, “Imi vakadzi nzeve dzenyu ngadzinzwe shoko romuromo wake; dzidzisai vakunda venyu kuchema, mumwe nomumwe adzidzise wokwake kuwungudza.

²¹“Nokuti rufu rwakakwira pamahwindo edu, rwakapinda mudzimba dzamadzimambo edu, kuti rupedze vana vari kunze, namajaya ari panzira dzomuguta.”

²²Taura, uti, “Zvanzi naJehovha, ‘Zvitunha zvavanhu zvichawira pasi somupfudze kubundo, setsama yehura dzinosiyiwa nomucheki, dzisina unodziunganidza.’ ”

²³Zvanzi naJehovha, “Munhu wakachenjera ngaarege kuzvirumbidza pamusoro pohuchenjeri hwake, nomunhu wesimba ngaarege kuzvirumbidza pamusoro pesimba rake, nomunhu wakapfuma ngaarege kuzvirumbidza pamusoro pepfuma yake;

²⁴asi unozvirumbidza, ngaazvirumbidze pamusoro pechinhu ichi, kuti unondinzwisisa nokundiziva ini, kuti ndini Jehovha, unoita hunyoro nokururamisira, nokururama panyika; nokuti ndinofarira zvinhu izvi” ndizvo zvinotaura Jehovha.

²⁵“Tarirai, ndizvo zvinotaura Jehovha mazuva anouya, andicharova vose vakadzingiswa pakati pokusadzingiswa kwavo;

²⁶vanoti; Ijipiti, naJudha, naEdhomu, navana vaAmoni, naMoabhu, navose vakaveurwa vhudzi ravo kumativi, vanogara kurenje; nokuti marudzi ose haana kudzingiswa, uye vose veimba yaIsiraeri havana kudzingiswa pamwoyo yavo.”