Read Shona Union Version 2002 Kuungudza KwaJeremiya 2 Bible Online

Kuungudza KwaJeremiya 2 - Shona Union Version 2002 bible

Kuungudza KwaJeremiya 2

¹Ishe akafukidza sei mukunda weZioni negore rokutsamwa kwake! Akabvisa kunaka kwaIsiraeri akazvikandira pasi, akasarangarira chitsiko chake nezuva rokutsamwa kwake.

²Ishe akaparadza ugaro hwose hwaJakobho, akasanzwira tsitsi; pakutsamwa kwake akawisira pasi nhare dzomukunda waJudha; akadziwisira pasi; akamhura ushe namachinda ahwo.

³Nokutsamwa kukuru akagura nyanga dzose dzaIsiraeri; akadzosa ruoko rwake rworudyi pamberi pomuvengi, akapisa munaJakobho somurazvo womoto unopedza zvose kumativi ose.

⁴Akakunga uta hwake somuvengi, akamira noruoko rwake somudzivisi, akauraya vose vaifadza meso; akadurura kutsamwa kwake somoto patende romukunda weZioni.

⁵Ishe wava somuvengi, akamedza Isiraeri; akamedza dzimba dzavo dzose dzoushe, akaparadza nhare dzavo; akawanzira mukunda waJudha kuchema nokurira.

⁶Akabvisa ruzhowa rwake nesimba sorwomunda; akaparadza nzvimbo yake yokuungana; Jehovha akakanganwisa paZioni ungano yakatarwa neSabata, akashora madzimambo navapristi neshungu dzokutsamwa kwake.

⁷Jehovha akarasa atari yake, akasema nzvimbo yake tsvene, akaisa masvingo edzimba dzavo dzoushe mumaoko omuvengi; vakaita bope mumba maJehovha, sapazuva reungano yakatarwa.

⁸Jehovha akafunga kuparadza rusvingo rwomukunda weZioni; akatatanura rwonzi rwokuyera, haana kudzosa ruoko rwake pakuparadza; akachemedza nhare norusvingo, zvinopera simba pamwechete.

⁹Masuo aro akanyura pasi, akaparadza nokuvhuna zvipfigiso zvaro; mambo waro namachinda aro vari pakati pamarudzi asina murayiro. Zvirokwazvo vaporofita varo havana zvavanoratidzwa naJehovha.

¹⁰Vakuru vomukunda weZioni vagere pasi, vanoramba vanyerere; vakakushira guruva pamisoro yavo, vakazvisunga zviuno namasaga; mhandara dzeJerusaremu dzakakotamisa misoro yadzo pasi.

¹¹Meso angu apera nemisodzi, mwoyo wangu unotambudzika; chiropa changu chadururirwa pasi, nemhaka yokuparadzwa kwomukunda wavanhu vangu, nokuti vanana navanoyamwa vanoziya munzira dzomuguta.

¹²Vanoti kuna madzimai avo, “Zviyo newaini zviripiko?” Vachingoziya munzira dzomuguta savakakuvadzwa, mweya yavo ichidururirwa pachipfuva chamadzimai avo.

¹³Ndichakupupureiko? Ndichakufananidza nei, iwe mukunda weJerusaremu? Ndichakuenzanisa nei, kuti ndikunyaradze, iwe mhandara mukunda weZioni? Nokuti pawakaparadzwa pakakura segungwa, ndiani achakuporesa?

¹⁴Vaporofita vako vakakuonera zviratidzo zvenhema nezvoupenzi; havana kubudisa zvakaipa zvako, kuti vadzose kutapwa kwako, asi vakakuonera zvirevo zvenhema nezvinokutapisa.

¹⁵Vose vanopfuura vachaita nondo pamusoro pako, vanoridza muridzo nokudzungudzira mukunda weJerusaremu misoro yavo, vachiti, “Ko ndiro guta rainzi navanhu rakanaka‐naka kwazvo, mufaro wenyika yose?”

¹⁶Vavengi vako vose vakakushamisira miromo yavo; vanoridza muridzo nokugeda‐geda meno, vanoti, “Tariparadza; zvirokwazvo ndiro zuva ratakanga takatarira; tariwana, tariona.”

¹⁷Jehovha akaita izvo zvaakafunga, akapedzisa shoko rake raakaraira pamazuva akare; akawisira pasi, akasava netsitsi; akafadza muvengi pamusoro pako, akasimudza runyanga rwavadzivisi vako.

¹⁸Mwoyo yavo yakadana kuna Ishe. Iwe rusvingo rwomukunda weZioni, misodzi ngaiyerere sorwizi masikati nousiku, usazorora, mboni yeziso rako isarega kuchema.

¹⁹Muka, danidzira usiku, pakutanga kwenguva dzose; durura mwoyo wako semvura pamberi paJehovha; simudzira maoko ako kwaari nokuda kwoupenyu hwavana vako, vanoziya nenzara pakuvamba kwenzira imwe neimwe yomuguta.

²⁰Tarirai, Jehovha, muone vamakaitira zvakadai! Ko vakadzi vangadye zvibereko zvavo, ivo vana vari pamaoko here? Ko vapristi navaporofita vangaurawe panzvimbo tsvene yaishe here?

²¹Majaya navatana vavete pasi munzira dzomuguta; mhandara dzangu namajaya angu vaurawa nomunondo; makavauraya nezuva rokutsamwa kwenyu, makavabaya, hamuna kuvanzwira tsitsi.

²²Makadaidza zvinondityisa pamativi ose, sapazuva reungano yakatarwa; hakuna akapukunyuka kana akasara pazuva rokutsamwa kwaJehovha; vandakabata mumaoko navandakarera vapedzwa nomuvengi wangu.