Read Shona Union Version 2002 Kuungudza KwaJeremiya 3 Bible Online

Kuungudza KwaJeremiya 3 - Shona Union Version 2002 bible

Kuungudza KwaJeremiya 3

¹Ndini munhu akaona kutambudzika neshamhu yokutsamwa kwake.

²Akanditungamirira akandifambisa murima ndisina chiedza.

³Zvirokwazvo anogara achingondiramba zuva rose noruoko rwake.

⁴Akasakadza nyama yangu neganda rangu, akavhuna mapfupa angu.

⁵Akandivakira rusvingo kuzorwa neni, Aakandikomberedza nenduru nokurwadziwa.

⁶Akandigarisa panzvimbo dzinerima, savanhu vakanguva vafa.

⁷Akandikomberedza norusvingo, kuti ndirege kugona kubuda; akaremesa ngeketani dzangu.

⁸Zvirokwazvo, kana ndichidana nokuridza mhere, anodzivisa munyengetero wangu.

⁹Akadzivira nzira dzangu norusvingo rwamabwe akavezwa, akakanganisa nzira dzangu.

¹⁰Kwandiri akaita sebere rinovandira, seshumba iri panzvimbo dzisingazikanwi.

¹¹Akatsausa nzira dzangu, akandibvarura‐bvarura, akandiita renje.

¹²Akakunga uta hwake, akandiita chinhu chokuposhera nomuseve.

¹³Akapinza miseve yegoba rake mutsvo dzangu.

¹⁴Ndava chinhu chinosekwa navanhu vangu vose, nechiimbo chavo zuva rose.

¹⁵Akandigutisa nezvinovava, akandinwisa gavakava.

¹⁶Akapedza meno angu norubwe, akandifukidza namadota.

¹⁷Makarashira mweya wangu kure norugare, ndakakanganwa kuti zvakanaka zvakadini.

¹⁸Ini ndikati, “Simba rangu rapera, nezvandakanga ndakatarira kuna Jehovha.”

¹⁹Rangarirai kutambudzika kwangu nenhamo yangu, iro gavakava nenduru.

²⁰Mweya wangu uchangozvirangarira nazvino, uri kutambudzika kwazvo.

²¹Ndinozvifunga izvo, naizvozvo ndine tariro.

²²Nokuda kwounyoro hwaJehovha tigere kupedzwa, nokuti tsitsi dzake hadziperi.

²³Mangwanani ose zvava zvitsva; kutendeka kwenyu kukuru.

²⁴Jehovha ndiwo mugove wangu, ndizvo zvinotaura mweya wangu; naizvozvo ndichavimba naye.

²⁵Jehovha anoitira zvakanaka vanomumirira, naiwo mweya unomutsvaka.

²⁶Zvakanaka kuti munhu avimbe naJehovha, amirire ruponeso rwaJehovha anyerere,

²⁷zvakanaka kuti munhu atakure joko rake achiri muduku.

²⁸Ngaagare ari oga anyerere, nokuti ndiye akariisa pamusoro pake.

²⁹Ngaaise muromo wake muguruva; zvimwe tariro ichipo.

³⁰Ngaarinzire dama rake kune anomurova, ngaagutiswe nokushorwa.

³¹Nokuti Ishe haangadzingi nokusingaperi.

³²Nokuti kunyange akachemedza, achanzwira tsitsi nokuwanda kwengoni dzake

³³Nokuti haatambudzi nomwoyo wake, haachemedzi vana vavanhu.

³⁴Kuti vasungwa vose venyika vatsikwe pasi petsoka,

³⁵kuti zvakarurama zvomunhu zvikanganiswe pamberi poWokumusoro‐soro,

³⁶kuti munhu arege kururamisirwa pamhaka yake, Ishe haafari naizvozvo.

³⁷Ndianiko angataura, zvikaitika, kana Ishe asingazvirayiri?

³⁸Ko zvakaipa nezvakanaka hazvibudi pamuromo woWokumusoro‐soro here?

³⁹Ko munhu mupenyu anonyunyutirei, kana iye munhu achirohwa pamusoro pezvivi zvake?

⁴⁰Ngatinzvere nokuedza nzira dzedu, titendeukirezve kuna Jehovha.

⁴¹Ngatisimudze mwoyo yedu namaoko edu kuna Mwari ari kudenga.

⁴²Takadarika nokumumukira simba; imi hamuna kutikanganwira

⁴³Makazvifukidza nokutsamwa, mukadzingana nesu, makauraya, hamuna kunzwira tsitsi.

⁴⁴Makazvifukidza negore kuti kurege kuva nomunyengetero ungapindapo.

⁴⁵Makatiita marara nezvinorashwa pakati pamarudzi avanhu.

⁴⁶Vavengi vedu vose vakatishamisira miromo yavo.

⁴⁷Kutya nehunza zvasvika kwatiri nokupedzwa nokuparadzwa.

⁴⁸Ziso rangu rinoyerera nzizi dzemvura pamusoro pokuparadzwa kwomukunda wavanhu vangu.

⁴⁹Ziso rangu rinodurura misodzi, hariregi, harigumi,

⁵⁰kusvikira Jehovha achitarira achiona ari kudenga.

⁵¹Ziso rangu rinorwadzisa mweya wangu nemhaka yavakunda vose veguta rangu.

⁵²Vakadzingana neni zvikuru seshiri, ivo, vanondivenga ndisina mhaka.

⁵³Vakaparadza upenyu hwangu mugomba, vakakandira ibwe pamusoro pangu.

⁵⁴Mvura zhinji yakafukidza musoro wangu; ndakati, “Ndapera.”

⁵⁵Ndakadana zita renyu, Jehovha, ndiri mugomba rakadzika kwazvo.

⁵⁶Makanzwa izwi rangu; regai kundivanzira nzeve yenyu pakufema kwangu nokuchema kwangu.

⁵⁷Makaswedera nezuva randakadana kwamuri, makati, “Usatya.”

⁵⁸Ishe, imi makandireverera mhaka dzomweya wangu, makadzikinura upenyu hwangu.

⁵⁹Haiwa Jehovha, makaona kusaruramisirwa kwangu, nditongerei mhaka yangu.

⁶⁰Makaona kutsiva kwavo kwose, namano avo ose pamusoro pangu.

⁶¹Makanzwa kushora kwavo, Jehovha, namano avo ose pamusoro pangu,

⁶²iyo miromo yavakandimukira nezvavakandifungira zuva rose.

⁶³Tarirai kugara kwavo pasi nokusimuka kwavo; ndiri chiimbo chavo.

⁶⁴Imi muchavatsiva, Jehovha, zvakafanira nebasa ramaoko avo.

⁶⁵Muchavapa kuwoma kwomwoyo, ndiko kutuka kwenyu pamusoro pavo.

⁶⁶Muchadzingana navo makatsamwa, nokuvaparadza pasi pedenga raJehovha.