Read Shona Union Version 2002 Kuungudza KwaJeremiya 4 Bible Online

Kuungudza KwaJeremiya 4 - Shona Union Version 2002 bible

Kuungudza KwaJeremiya 4

¹Haiwa, ndarama yasviba sei! Ndarama yakaisvo‐naka yashanduka sei! Mabwe enzvimbo tsvene arashirwa pamharadzano dzenzira dzomuguta.

²Vanakomana vanodikanwa veZioni vakafanana nendarama yakaisvo‐naka, haiwa vakanzi vakaita sezvirongo zvevhu sei, iro basa romuumbi wehari!

³Kunyange namakava anobudisa mazamu, achiyamwisa vana vawo; mukunda wavanhu vangu wava nehasha semhou murenje.

⁴Rurimi rwomwana unomwa runonamatira mumukanwa womuromo wake nenyota; vanana vanokumbira chingwa, asi hakuna munhu anovamedurira.

⁵Avo vaisidya zvinozipa, varaswa munzira dzomuguta; vairerwa vakafuka micheka mitsvuku, zvino votsivama pamaturunhuru.

⁶Nokuti zvakaipa zvomukunda wavanhu vangu zvinopfuura zvivi zveSodhoma, iro rakaparadzwa kamwe‐kamwe kusina maoko akaribata.

⁷Machinda aro akanga akapfuura chando nokunaka, akanga akachena kupfuura mukaka, akanga akatsvuka pamuviri kupfuura makorari, pakuonekwa akanga akaita sesafaya.

⁸Zviso zvavo zvasviba kupfuura mazimbe, havazikanwi munzira dzomuguta; ganda ravo rinonamatira mapfupa avo, raoma, rafanana nedanda.

⁹Vakaurawa nomunondo vakaita nani kuna vakaurawa nenzara; nokuti ava vaonda, vabayiwa nokushayiwa zvibereko zveminda.

¹⁰Maoko avakadzi vaiva nomwoyo munyoro akabika vana vavo, zvikava zvokudya zvavo pakuparadzwa kwomukunda wavanhu vangu.

¹¹Jehovha akaita zvaakanga achida nokutsamwa kwake, akadurura hasha dzake huru; akabatidza moto paZioni, akapedza nheyo dzaro.

¹²Madzimambo enyika haana kutenda, kunyange navose vagere panyika yose, kuti mudzivisi nomuvengi vachapinda pamasuo eJerusaremu.

¹³Zvakaitwa nokuda kwezvivi zvavaporofita varo, nezvakaipa zvavapristi varo, vakateura ropa ravakarurama mukati maro.

¹⁴Vanodzungaira samapofu munzira dzomuguta, vakasvibiswa neropa, naizvozvo vanhu havagoni kubata nguo dzavo.

¹⁵Vakadanidzira kwavari vachiti, “Ibvai, makan’ora! Ibvai, ibvai, regai kutibata!” Panguva yokutiza nokudzungaira kwavo, vanhu vakati pakati pamarudzi; “Havangazogarizve pano vari vatorwa.”

¹⁶Kutsamwa kwaJehovha kwakavaparadzira; haachavi nehanya navo; havana kurangarira vapristi, havana kukudza vakuru.

¹⁷Meso edu anongopera nazvino achitarira rubatsiro rwedu pasina; pakutarira kwedu takatarira rudzi rusingagoni kutiponesa.

¹⁸Vanoronda makwara edu, naizvozvo hatigoni kufamba munzira dzomuguta redu; kuguma kwedu kwava pedyo, mazuva edu asvika, nokuti kuguma kwedu kwasvika.

¹⁹Avo vakadzingana nesu, vakamhanyisa kupfuura makondo okudenga; vakadzingana nesu pamakomo, vakatigarira murenje.

²⁰Mweya wemhino dzedu, iye muzodzwa waJehovha, wakabatwa muhunza dzavo; iye watakati, “Pamumvuri wake ndipo patichararama pakati pamarudzi.”

²¹Farisisa, uve nomufaro, iwe mukunda weEdhomu, ugere panyika yeUzi; mukombe uchasvika kwauriwo; uchabatwa newaini ukazvifukura.

²²Kurohwa kwezvakaipa zvako kwapera, iwe mukunda weZioni; haachazokutapisizve; iye achakurova pamusoro pezvakaipa zvako, iwe mukunda weEdhomu; iye achafukura zvivi zvako.