Read Shona Union Version 2002 Kuungudza KwaJeremiya 5 Bible Online

Kuungudza KwaJeremiya 5 - Shona Union Version 2002 bible

Kuungudza KwaJeremiya 5

¹Rangarirai Jehovha, zvakatiwira; tarirai, muone kushorwa kwedu.

²Nhaka yedu yaenda kuvatorwa, nedzimba dzedu kune vokumwe.

³Tiri nherera navasina baba; madzimai edu akaita sechirikadzi.

⁴Takanwa mvura yedu tichiita zvokutenga nemari; huni dzedu takadzitengeserwa.

⁵Vanodzingana nesu vari pamitsipa yedu; taneta hatine zororo.

⁶Takatambanudzira ruoko rwedu kuna vaIjipiti, nokuna vaAsiria, kuti tigute zvokudya.

⁷Madzibaba edu akatadza, zvino havachipo; isu takatakura zvakaipa zvavo.

⁸Varanda vanotibata ushe, hakuna angatirwira pamaoko avo.

⁹Tinozviwanira zvokudya zvedu upenyu hwedu huri panjodzi, nemhaka yomunondo uri kurenje.

¹⁰Ganda redu rasviba sechoto, nemhaka yokupisa kukuru kwenzara.

¹¹Vakachinyira vakadzi paZioni, nemhandara pamaguta aJudha.

¹²Machinda akasungirirwa namaoko avo, vakuru havana kukudzwa.

¹³Majaya akatakura guyo, vana vakagumburwa nokurema kwehuni.

¹⁴Vakuru vakarega kusvika pasuo, majaya akarega kuimba kwavo.

¹⁵Mufaro womwoyo wedu waguma; kutamba kwedu kwashanduka kuchema.

¹⁶Korona yawa pamisoro yedu; tine nhamo! Nokuti takatadza.

¹⁷Nemhaka iyi mwoyo yedu yapera simba; nemhaka yezvinhu izvi meso edu haachaoni zvakanaka;

¹⁸nokuda kwegomo reZioni, rava dongo; makava anofambapo.

¹⁹Imi Jehovha muripo nokusingaperi; chigaro chenyu choushe chiripo kusvikira kumarudzi namarudzi.

²⁰Munotikanganwireiko nokusingaperi, munotirasireiko nguva huru yakadai?

²¹Tidzoserei kwamuri, Jehovha, ipapo tichadzoka; vandudzai mazuva edu ave sakare.

²²Asi makatirasa chose here? Makatitsamwira zvikuru here?