Read Shona Union Version 2002 Ezekieri 11 Bible Online

Ezekieri 11 - Shona Union Version 2002 bible

Ezekieri 11

¹Zvino Mweya wakandisimudza, ndokundiisa kusuo ramabvazuva reimba yaJehovha, raitarira kumabvazuva; ndikaona pamukova wesuo varumwe vana makumi maviri navashanu, ndikaona pakati pavo Jaazania mwanakomana waAzuri, naPeratia mwanakomana waBhenaia, machinda avanhu.

²Akati kwandiri, “Mwanakomana womunhu, ava ndivo varume vanofunga zvakaipa, vanorayirira mano akaipa muguta rino;

³vanoti, ‘Nguva ichigere kuswedera yokuvaka dzimba, guta igate, isu tiri nyama.’

⁴“Naizvozvo chivaporofitera, Mwanakomana womunhu, chiporofita.”

⁵Ipapo Mweya waJehovha wakawira pamusoro pangu, akati kwandiri, “Taura, uti, ‘Zvanzi naJehovha, ndizvo zvamakataura, imi imba yaIsiraeri; nokuti ndinoziva zvamunofunga mundangariro dzenyu.

⁶Makawanza vamakauraya muguta rino, makazadza nzira dzaro navakaurawa.’

⁷“Naizvozvo zvanzi naIshe Jehovha, ‘Vamakauraya, vamakaradzika mukati maro, ndiyo nyama, guta rino igate, asi imi muchabudiswa mukati maro.

⁸Makatya munondo; ini ndichauyisa munondo pamusoro penyu,’ ndizvo zvinotaura Ishe Jehovha.

⁹Ini ndichakubudisai mukati maro, ndichakuisai mumaoko avatorwa, ndichaita zvandakatonga pakati penyu.

¹⁰“Muchaurawa nomunondo; ndichakutongai munyika yaIsiraeri, zvino muchaziva kuti ndini Jehovha.

¹¹Guta rino haringavi gate renyu, nemi hamungavi nyama mukati maro; ndichakutongai munyika yaIsiraeri.

¹²Ipapo muchaziva kuti ndini Jehovha, nokuti hamuna kufamba nemitemo yangu kana kuita zvandakarayira, asi makatevera mirayiro yamarudzi anokupoteredzai.”

¹³Zvino ndakati ndichiporofita, Peratia mwanakomana waBhenaia akafa. Ipapo ndakawira pasi nechiso changu, ndikachema nezwi guru ndichiti, “Aiwa, Ishe Jehovha! Moda kupedza chose vakasara vaIsiraeri here?”

¹⁴Zvino shoko raJehovha rakasvika kwandiri, richiti,

¹⁵“Mwanakomana womunhu, hama dzako, idzo hama dzako, vanhu vorudzi rwako, neimba yose yaIsiraeri, ivo vose, ndivo vakanzi navagere Jerusaremu, ‘Ibvai kure naJehovha, nyika ino yakapiwesu, ive yedu.’

¹⁶“Naizvozvo uti, ‘Zvanzi naIshe Jehovha, zvandakavabvisa, ndikavaisa kure pakati pamarudzi, uye zvandakavaparadzira pakati penyika, ndichava kwavari nzvimbo tsvene nguva duku kunyika idzo kwavakaenda kwadziri;’

¹⁷naizvozvo uti, ‘Zvanzi naIshe Jehovha, ndichakuunganidzai mubve pakati pamarudzi, ndichakukokerai mubve panyika kwamakaparadzirwa, ndigokupai nyika yaIsiraeri.’

¹⁸“Vachadzokerako nokubvisamo zvose zvayo zvinosemesa nezvose zvayo zvinonyangadza.

¹⁹Ndichavapa mwoyo mumwe, nokuisa mweya mutsva mukati menyu; ndichabvisa mwoyo webwe munyama yavo, ndokuvapa mwoyo wenyama;

²⁰kuti vafambe nemitemo yangu, vachengete zvandakarayira nokuzviita; ivo vachava vanhu vangu, neni ndichava Mwari wavo.

²¹Asi kana vari ivo, vane mwoyo inotevera mwoyo yezvinhu zvavo zvinosemesa nezvinonyangadza, ndichauyisa zvavakaita pamisoro yavo,” ndizvo zvinotaura Ishe Jehovha.

²²Ipapo makerubhi akasimudza mapapiro awo, namakumbo engoro akanga ari pamativi awo; kubwinya kwaMwari waIsiraeri kwakanga kuri nechokumusoro kwavo.

²³Kubwinya kwaJehovha ndokukwira kuchibva mukati meguta, ndokumira pamusoro pegomo riri kumabvazuva eguta.

²⁴Ipapo Mweya wakandisimudza ndokundiisa Karadhea kuna vakatapwa, ndichizvioneswa noMweya waMwari. Zvino chiratidzo chandakanga ndaona chakakwidzwa chichibva kwandiri.

²⁵Ipapo ndakaudza vakatapwa zvinhu zvose zvandakaratidzwa naJehovha.