Read Shona Union Version 2002 Ezekieri 12 Bible Online

Ezekieri 12 - Shona Union Version 2002 bible

Ezekieri 12

¹Zvino shoko raJehovha rakasvikazve kwandiri, richiti,

²“Mwanakomana womunhu, ugere pakati pavanhu veimba inondimukira simba, vana meso okuona, asi havaoni, vane nzeve dzokunzwa, asi havanzwi; nokuti iimba inondimukira simba.

³“Naizvozvo iwe Mwanakomana womunhu, zvirongedzere nhumbi dzokutama nadzo, utame masikati, vachizviona; unofanira kutama uchibva panzvimbo yako uchienda kune imwe nzvimbo, vachizviona; zvimwe vangazofunga, kunyange iri imba inondimukira simba.

⁴“Unofanira kubudisa nhumbi dzako masikati vachizviona, dziite senhumbi dzokutama nadzo; zvino madekwana iwe umene unofanira kubuda vachizviona, sezvinoita vanhu kana votama.

⁵Zvino uboore rusvingo vachizviona, ubudise nhumbi dzako napo.

⁶Unofanira kudzitakura pafudzi rako vachizviona, ndokudzibudisa kwasviba; unofanira kufukidza chiso chako, kuti urege kuona zvenyika; nokuti ndakakuita chiratidzo kuimba yaIsiraeri.”

⁷Ini ndikaita sezvandakarayirwa; ndakabudisa nhumbi dzangu masikati, dzakaita senhumbi dzokutama nadzo, madekwana ndikabhovhora rusvingo noruoko rwangu; ndakadzibudisa kwasviba, ndikadzitakura pafudzi rangu vachizviona.

⁸Zvino mangwanani shoko raJehovha rakasvika kwandiri, richiti,

⁹“Mwanakomana womunhu, imba yaIsiraeri, iyo imba inondimukira, havana kuti kwauri, ‘Unoiteiko?’

¹⁰Uti kwavari, ‘Zvanzi naIshe Jehovha, chirevo ichi chinoreva muchinda weJerusaremu neimba yose yaIsiraeri iri pakati pavo.’

¹¹Uti, ‘Ndini chiratidzo chenyu; sezvandakaita ini, ndizvo zvavachaitirwa ivo; vachatama vachitapwa.’

¹²Muchinda ari pakati pavo achatakura nhumbi dzake pafudzi rake kwasviba, ndokubuda; vachabhovhora rusvingo kuti vadzibudise napo; achafukidza meso ake, nokuti haangaoni nyika nameso ake.

¹³Ndichakandawo mumbure wangu pamusoro pake, achabatwa mumusungo wangu; ndichamuisa Bhabhironi kunyika yavaKaradhea; asi haangaioni, kunyange zvakadaro achafirako.

¹⁴Ndichaparadzira kumhepo dzose vose vakamupoteredza vangamubatsira, namapoka ake ose ndichavavhomorera munondo ndichivateverera.

¹⁵“Ipapo vachaziva kuti ndini Jehovha, kana ndichivadzingira pakati pamarudzi, nokuvaparadzira kunyika dzose.

¹⁶Asi ndichapukunyusa vashoma vavo pamunondo nenzara nehosha yakaipa; kuti vandoparidza pakati pamarudzi kwavanosvika zvinonyangadza zvavo zvose; zvino vachaziva kuti ndini Jehovha.”

¹⁷Shoko raJehovha rakasvikawo kwandiri, richiti,

¹⁸“Mwanakomana womunhu, idya zvokudya zvako nokubvunda nokunwa mvura yako nokudedera nokutya;

¹⁹uti kuvanhu venyika iyi, ‘Zvanzi naIshe Jehovha pamusoro pavagere Jerusaremu nenyika yaIsiraeri, vachadya zvokudya zvavo vachitya nokunwa mvura yavo vachikanganiswa, kuti nyika yaro iitwe dongo, yatorerwa zvose zvayo, nemhaka yokuita nesimba yavose vanogaramo.’

²⁰Maguta anogarwa navanhu achaparadzwa, nenyika ichaitwa dongo; zvino muchaziva kuti ndini Jehovha.”

²¹Shoko raJehovha rakasvika kwandiri, richiti,

²²“Mwanakomana womunhu, tsumo ndeyeiko yamunayo munyika yaIsiraeri, inoti, ‘Mazuva anoramba achiwedzerwa, asi zvakaoneswa zvose hazviitiki?’

²³Naizvozvo vaudze, uti, ‘Zvanzi naIshe Jehovha, ndichagumisa tsumo iyi, havangazobati nayo iri tsumo pakati paIsiraeri;’ asi uti kwavari, ‘Mazuva ava pedyo nokuitika kwezvose zvakaoneswa.’

²⁴Nokuti pakati peimba yaIsiraeri hapangazovi kuoneswa kwenhema kana kuporofita kunobata kumeso.

²⁵“Nokuti ndini Jehovha; ndichataura, neshoko randichataura richaitika, haringazononoswi; nokuti pamazuva enyu, iwe imba inondimukira simba, ndichataura shoko nokuriitawo,” ndizvo zvinotaura Ishe Jehovha.

²⁶Shoko raJehovha rakasvikazve kwandiri, richiti,

²⁷“Mwanakomana womunhu, tarira, veimba yaIsiraeri vanoti, ‘Zvaakaoneswa ndezvamazuva ari kure anozouya, anoporofita zvenguva dziri kure.’

²⁸Naizvozvo uti kwavari, ‘Zvanzi naIshe Jehovha, hakuna shoko rimwe ramashoko angu richazononoka, asi shoko randichataura richaitika,’ ” ndizvo zvinotaura Ishe Jehovha.