Read Shona Union Version 2002 Ezekieri 13 Bible Online

Ezekieri 13 - Shona Union Version 2002 bible

Ezekieri 13

¹Zvino shoko raJehovha rakasvika kwandiri, richiti,

²“Mwanakomana womunhu, porofitera vaporofita vaIsiraeri vanoporofita, uti kuna ivo vanoporofita zvinobva mumwoyo mavo, inzwai imi shoko raJehovha,”

³“Zvanzi naIshe Jehovha, ‘Vane nhamo vaporofita mapenzi, vanotevera mweya yavo, vasina chavakaona.’

⁴Aiwa Isiraeri, vaporofita venyu vakafanana namakava pamatongo.

⁵Hamuna kukwira muchipinda pakakoromorwa, kana kugadzira rusvingo rweimba yaIsiraeri, kuti mumire pakurwa pazuva raJehovha.

⁶Vakaona zvinonyengera nokuporofita kwenhema, ivo vanoti, ‘Jehovha anoti!’ Asi Jehovha haana kuvatuma, zvino vakati shoko ravo richasimbiswa.

⁷“Hamuna kuona zvinonyengera here, hamuna kutaura kwenhema here, zvamakati, ‘Jehovha anoti; kunyange zvakadaro handina kutaura?’ ”

⁸Naizvozvo zvanzi naIshe Jehovha, “Zvamakatura zvinonyengera, nokuona nhema, naizvozvo, tarirai, ndine mhaka nemi, ndizvo zvinotaura Ishe Jehovha.

⁹Ruoko rwangu rucharwa navaporofita vanoona zvinonyengera navanoporofita nhema; havangarangani navanhu vangu, havanganyorwi mazita avo parugwaro rweimba yaIsiraeri, havangapindi munyika yaIsiraeri; zvino muchaziva kuti ndini Ishe Jehovha.

¹⁰Nokuti zvirokwazvo, nokuti vakanyengera vanhu vangu, vachiti, ‘Rugare!’ Izvo hakuna rugare; kana vovaka rusvingo, tarira, vovhuwa nesuko.

¹¹Chiudza avo vanoruvhuwa nesuko, kuti ruchakoromoka; mvura ichauya ichinaya kwazvo, ine, mabwe makuru echimvuramabwe, muchawa, nedutu remhepo richarutsemutsa.

¹²“Zvino tarirai, kana rusvingo rwakoromoka havangati kwamuri here, ‘Ko suko ramakuvhuwa naro riripiko?’ ”

¹³Naizvozvo zvanzi naIshe Jehovha, “Ndicharutsemutsa zvirokwazvo nedutu remhepo nehasha dzangu; mvura ichanaya kwazvo nokutsamwa kwangu, namabwe makuru echimvuramabwe nehasha dzangu, kurupedza chose.

¹⁴Saizvozvo ndichakoromora rusvingo rwamakavhuwa nesuko, nokuruwisira pasi, kusvikira nheyo dzarwo dzafukurwa; ruchakoromoka, nemi muchaparadzwa mukati marwo; zvino muchaziva kuti ndini Jehovha.

¹⁵“Saizvozvo ndichapedza hasha dzangu parusvingo, napamusoro pavakaruvhuwa nesuko; ndichati kwamuri, ‘Rusvingo haruchipo, navakaruvhuwa havachipo;

¹⁶ivo vaporofita vaIsiraeri vanoporofita pamusoro peJerusaremu, vachirionera zviratidzo zvorugare, izvo hakuna rugare,’ ” ndizvo zvinotaura Ishe Jehovha.

¹⁷Asi iwe, Mwanakomana womunhu, rinzira chiso chako kuvakunda vavanhu vako, ivo vanoporofita zvinobva mumwoyo yavo, uporofite pamusoro pavo,

¹⁸uti, “Zvanzi naIshe Jehovha, ‘Vane nhamo vakadzi vanosonera zvifukidzo papfundo dzamaoko, vanoita micheka yokufukidza misoro yavanhu vapi navapi, kuti vavhime mweya.’ Munoda kuvhima mweya yavanhu vangu, muchida kuzviponesera mweya iyeyo!

¹⁹Makandimhura pakati pavanhu vangu nokuda kwetsama dzebari nezvimedu zvezvingwa, kuti muuraye mweya isingafaniri kufa, nokuponesa mweya isingafaniri kurarama, muchirevera vanhu vangu nhema, ivo vanoteerera nhema dzenyu.”

²⁰Naizvozvo zvanzi naIshe Jehovha, “Tarirai, ndine mhaka nezvifukidzo zvenyu zvamunovhima nazvo mweya yavanhu seshiri, ndichazvibvarura pamaoko enyu; ndicharegedza mweya, iyo mweya yamunovhima seshiri.

²¹Nemicheka yenyu ndichaibvarurawo, ndirwire vanhu vangu pamaoko enyu, varege kuzova mumaoko enyu kuti muvavhime; zvino muchaziva kuti ndini Jehovha.

²²“Nokuti nenhema dzenyu makarwadza mwoyo wowakarurama, wandisina kuchemedza, mukasimbisa maoko owakaipa, kuti arege kudzoka panzira yake yakaipa, aponeswe;

²³naizvozvo hamuchazoonizve zviratidzo zvinonyengera kana kuuka zvinoukwa; ini ndicharwira vanhu vangu pamaoko enyu; zvino muchaziva kuti ndini Jehovha.”