Read Shona Union Version 2002 Ezekieri 18 Bible Online

Ezekieri 18 - Shona Union Version 2002 bible

Ezekieri 18

¹Zvino shoko raJehovha rakasvikazve kwandiri, richiti,

²“Ndokudiniko kana muchibata netsumo iyi panyika yaIsiraeri, muchiti, ‘Madzibaba akadya madzambiringa anovava, meno avana ndokuhwadzira?’

³Noupenyu hwangu,” ndizvo zvinotaura Ishe Jehovha, “Hamungagoni kuzobata netsumo iyi pakati paIsiraeri.

⁴Tarirai, mweya yose ndeyangu; mweya wababa ndowangu, saizvozvo nomweya womwanakomanawo; mweya unotadza, uchafa.

⁵Asi kana munhu achinge akarurama, achiita zvomurayiro nezvakarurama,

⁶asina kudya pamakomo, kana kutarira nameso ake kuzvifananidzo zveimba yavaIsiraeri, kana kuchinyira mukadzi wowokwake, kana kuswedera kumukadzi ari kumwedzi kwake,

⁷asinakuitira vamwe zvakaipa, akadzosera rubato rwake kuno wakatora chikwereti, asina kutora chinhu achipamba, akapa vane nzara zvokudya zvake, akafukidza akashama nenguo;

⁸asina kuita mhindu, kana kutora mhindu yemichero, akadzora ruoko rwake pazvakaipa, akaruramisa kwazvo pamhaka yomunhu nehama yake,

⁹akafamba nemitemo yangu, akachengeta zvandakarayira, kuti aite zvamazvokwadi; iye akarurama, zvirokwazvo achararama,” ndizvo zvinotaura Ishe Jehovha.

¹⁰“Kana iye akabereka mwanakomana riri gororo, kana muteuri weropa, kana anoita chimwe chezvinhu izvi,

¹¹asingaiti chinhu chimwe chaizvozvo zvakanaka, akadya pamakomo, akachinyira mukadzi wowokwake,

¹²akaitira varombo navanoshayiwa zvakaipa, akatora achipamba, asina kudzosera rubatso, akatarira zvifananidzo nameso ake, akaita zvinonyangadza,

¹³akaita mhindu, kana kutora mhindu yemichero; ko iye achararama here? Haangararami. Akaita izvi zvose zvinonyangadza, zvirokwazvo achafa; ropa rake richava pamusoro pake.

¹⁴“Zvino, tarira, kana akabereka mwanakomana, anoona zvivi zvose zvababa vake, zvavakaita, akazviona hake, akasaita zvakadai;

¹⁵asina kudya pamakomo, kana kutarira nameso ake zvifananidzo zveimba yavaIsiraeri, kana kuchinyira mukadzi wowokwake,

¹⁶asina kuitira vamwe zvakaipa, asina kutora chinhu achireva rubato, asina kutora chinhu achipamba, asi akapa vane nzara zvokudya zvake, nokufukidza akashama nechokufuka;

¹⁷akadzora ruoko rwake pakuitira varombo zvakaipa, asina kutora mhindu kana mhindu yemichero, akaita zvandakarayira, nokufamba nemitemo yangu; iye haangafi nokuda kwezvakaipa zvababa vake, zvirokwazvo achararama.

¹⁸Kana vari baba vake, zvavakamanikidza zvikuru, nokupamba zvinhu zvomunun'una wake, akaita zvisina kunaka pakati pavanhu vake, tarirai, iye achafa nokuda kwezvakaipa zvake.

¹⁹“Asi imi munoti, ‘Mwanakomana anoregereiko kuva nemhosva yezvakaipa zvababa vake?’ Kana mwanakomana achinge aita zvinorehwa nomurayiro nezvakarurama, akachengeta mitemo yangu yose, akaiita, zvirokwazvo achararama.

²⁰Munhu anotadza, ndiye achafa; mwanakomana haangavi nemhosva yezvakaipa zvababa vake, nababa havangavi nemhosva yezvakaipa zvomwanakomana wavo; kururama kwowakarurama kuchava pamusoro pake, nokuipa kwowakaipa kuchava pamusoro pake.

²¹“Asi kana akaipa akatendeuka pazvivi zvake zvose zvaakaita, akachengeta mitemo yangu yose, akaita zvinorehwa nomurayiro nezvakarurama, zvirokwazvo achararama, haangafi.

²²Kudarika kwake kwose kwaakaita hakungarangarirwi pamusoro pake; achararama nokuda kwezvakarurama zvaakaita.

²³Ko ini ndingatongofarira rufu rwowakaipa here?” Ndizvo zvinotaura Ishe Jehovha; “Handizinofarira kudzoka kwake panzira yake, ararame here?

²⁴“Asi kana akarurama akatsauka pakururama kwake, akaita zvakaipa, akaita zvinonyangadza zvose zvinoitwa nomunhu akaipa, ko angararama here? Mabasa ake akarurama aakaita haangatongorangarirwi; nokuda kwokudarika kwake, kwaakadarika nako, nezvivi zvake zvaakaita, achafa nokuda kwazvo.

²⁵“Asi imi munoti, ‘Nzira yaIshe haina kururama.’ Zvino chinzwai, imi mhuri yavaIsiraeri, nzira yangu haina kururama here? Ko nzira dzenyu hadzizi idzo dzisina kururama here?

²⁶Kana munhu akarurama akatsauka pakururama kwake, akaita zvakaipa, akafa nokuda kwazvo; achafa nokuda kwezvakaipa zvaakaita.

²⁷Uyezve, kana munhu akaipa akatsauka pazvakaipa zvake zvaakaita, akazoita zvinorehwa nomurayiro nezvakarurama, achaponesa upenyu hwake.

²⁸“Zvaakarangarira, akatsauka pakudarika kwake kwose kwaakaita, zvirokwazvo achararama, haangafi.

²⁹Kunyange zvakadaro, vaIsiraeri vanoti, ‘Nzira yaIshe haina kururama.’ Nhai, mhuri yavaIsiraeri, nzira dzangu hadzina kururama here? Hadzizi nzira dzenyu dzisakarurama here?

³⁰“Naizvozvo ndichakutongai, imi mhuri yavaIsiraeri, mumwe nomumwe zvakafanira nzira dzake,” ndizvo zvinotaura Ishe Jehovha. “Dzokai, mutendeuke pakudarika kwenyu kwose; kuti chirege kuva chigumbuso chezvakaipa kwamuri.

³¹Rashai kure nemi kudarika kwenyu kwose, kwamakadarika nako, muzviitire mwoyo mitsva nemweya mitsva; nokuti muchafireiko, imi mhuri yavaIsiraeri?

³²Nokuti handifariri rufu rwounofa,” ndizvo zvinotaura Ishe Jehovha; naizvozvo tendeukai, murarame.