Read Shona Union Version 2002 Ezekieri 19 Bible Online

Ezekieri 19 - Shona Union Version 2002 bible

Ezekieri 19

¹Zvino iwe, imba mariro pamusoro pamachinda aIsiraeri,

²uti, “Mai vako vaiva aniko?” Vaiva shumbakadzi, yaivata pakati peshumba, ichirera vana vayo pakati peshumba duku.

³Zvino yakarera mumwe mwana wayo, ikava shumba duku, ikadzidza kubata zvaingauraya, ikapedza vanhu.

⁴Marudzi avanhu akainzwawo ikabatwa muhuzha yavo, vakaiisa kunyika yeIjipiti.

⁵Zvino yakati ichiona kuti yanyengerwa, kuti tariro yanyangarika, ikatorazve mumwe mwana wayo, ikaiita shumba duku.

⁶Iyo ikafamba-famba pakati peshumba; ikava shumba duku, ikadzidza kubata zvaingauraya, ikapedza vanhu.

⁷Ikaziva dzimba dzavo dzohushe, ikaparadza maguta avo; nyika nezvose zvayo ikava dongo, nokuda kwokuwomba kwayo.

⁸Ipapo marudzi avanhu venyika dzakapoteredza akarwa nayo, vakakandira mumbure wavo pamusoro payo, ikabatwa muhuzha yavo.

⁹Vakaiisa muchirugu chine zvikokowono, vakandoiisa kuna mambo weBhabhironi; vakaiisa munhare, kuti izwi rayo rirege kuzonzwika pamakomo aIsiraeri.

¹⁰Mai vako vakanga vakaita somudzambiringa, panguva yokuzorora kwako, wakanga wakasimwa pamvura; wakabereka zvakanaka, una matavi mazhinji, nokuda kwemvura zhinji.

¹¹Ukava namatanda makobvu okuita tsvimbo dzavaibata hushe, musoro wawo ukakwirira kumusoro pakati pamatavi makobvu, ukaonekwa kumusoro-soro pamwechete namashizha awo mazhinji.

¹²Asi wakadzurwa nehasha, ukakandirwa pasi, mhepo inobva mabvazuva ikaomesa michero yawo, matanda awo makobvu akavuniwa, ndokuoma, moto ukaapedza.

¹³Zvino wasimwa murenje, munyika yakaoma ine nyota.

¹⁴Moto wabuda padanda ramatavi awo, ukapedza michero yawo, hapachine danda rine simba ringaita tsvimbo yokubata ushe. Awa ndiwo mariro, uye achazova mariro.