Read Shona Union Version 2002 Ezekieri 22 Bible Online

Ezekieri 22 - Shona Union Version 2002 bible

Ezekieri 22

¹Shoko raJehovha rakasvikazve kwandiri, richiti,

²“Zvino iwe Mwanakomana womunhu, tonga, chitonga guta reropa, urizivise zvinonyangadza zvaro zvose.

³Uti zvanzi naIshe Jehovha, ‘Iwe guta, rinoteura ropa mukati maro, kuti nguva yaro isvike, rinozviitira zvifananidzo, kuti risvibiswe nazvo!’

⁴Wapara mhaka nokuda kweropa rako rawakateura, wasvibiswa nezvifananidzo zvawakaita; waswededza mazuva ako, wasvika pamakore ako; naizvozvo ndakakuita chinhu chinoshorwa pamberi pamamwe marudzi, nechinosekwa nenyika dzose.

⁵Vari pedyo newe, navari kure, vachakuseka, iwe unezita rakasvibiswa, uzere nebope.

⁶“Tarira, machinda aIsiraeri akapinda mukati mako, mumwe nomumwe nesimba rake, kuzoteura ropa.

⁷Baba namai vakazvidzwa mukati mako, vatorwa vakamanikidzwa mukati mako, nherera nechirikadzi dzakaitirwa zvakaipa mukati mako.

⁸Iwe wakashora zvinhu zvangu zvitsvene, wakamhura maSabata angu.

⁹Vanhu vana makuhwa vakapinda mukati mako kuzoteura ropa, vakadya pamusoro pamakomo mukati mako, vakaita zvinonyadzisa mukati mako.

¹⁰Vakafukura kunyadza kwamadzibaba avo mukati mako, vakaninipisa mukati mako mukadzi wakanga asina kunaka nokuva kumwedzi kwake.

¹¹Mumwe akaita zvinonyangadza nomukadzi womunun'una wake, mumwe wakachinyira mukadzi womwana wake, mumwezve mukati mako wakaninipisa hanzvadzi yake, mukunda wababa vake.

¹²Vakagamuchira zvipo mukati mako kuzoteura ropa; iwe wakatora mhindu yemari neyemichero, wakazvifumisa uchimanikidza wokwako, ukandikanganwa,” ndizvo zvinotaura Ishe Jehovha.

¹³“Naizvozvo, tarira, ndakarovanya maoko angu pamusoro pepfuma yako yawakawana nokunyengera, napamusoro peropa rako rakanga riri mukati mako.

¹⁴Ko mwoyo wako ungatsunga, kana maoko ako angasimba here pamazuva andichakutonga? Ini Jehovha ndakazvitaura, ndichazviita.

¹⁵“Ndichakuparadzira pakati pamarudzi, nokukudzingira kunyika dzose; ndichapedza tsvina yako mukati mako.

¹⁶“Uchazvimhurisa pamberi pamamwe marudzi; zvino uchazoziva kuti ndini Jehovha.”

¹⁷Zvino shoko raJehovha rakasvika kwandiri, richiti,

¹⁸“Mwanakomana womunhu, imba yaIsiraeri yaita samarara kwandiri; vose vakaita sendarira netini nedare nomutobvu mukati mevira; vakaita samarara esirivha.

¹⁹Naizvozvo zvanzi naIshe Jehovha, ‘Mose zvamava marara, naizvozvo, tarirai, ndichakuunganidzirai mukati meJerusaremu.

²⁰Sezvavanounganidzira sirivha nendarira nedare nomutobvu netini mukati mevira, kuti vapfutidzire moto pamusoro pazvo, vazvinyause, saizvozvo ndichakuunganidzai nokutsamwa kwangu nehasha dzangu, ndikuiseimo, ndikunyausei.

²¹Zvirokwazvo, ndichakuunganidzai, nokupfutidza moto wehasha dzangu pamusoro penyu; muchanyauswa mukati maro.

²²Sirivha sezvainonyauswa mukati mevira, saizvozvo imi muchanyauswa mukati maro; zvino muchaziva kuti ini Jehovha ndakadurura hasha dzangu pamusoro penyu.’ ”

²³Zvino shoko raJehovha rakasvika kwandiri, richiti,

²⁴“Mwanakomana womunhu uti kwairi, ‘Iwe uri nyika isina kunatswa, isina kunisirwa mvura nezuva reshungu dzangu.’

²⁵Vaporofita vayo vakaita rangano mukati mayo; seshumba inoomba ichibvanzura chayabata, saizvozvo vakapedza mweya yavanhu; vakatora pfuma nezvinokosha, vakawanza chirikadzi mukati mayo.

²⁶Vapristi vayo vakaparadza murayiro wangu, vakamhura zvinhu zvangu zvitsvene; havana kutsaura pakati pezvitsvene nezvisati zviri zvitsvene, kana kuzivisa vanhu kusiyana kwezvisina kunaka nezvakanaka, vakatsinzina meso avo varege kuona maSabata angu; ini ndamhurwa pakati pavo.

²⁷Machinda ayo mukati mayo vakafanana namapere anobvanzura zvaabata, vachiteura ropa nokuparadza mweya, kuti vawane pfuma vachinyengera.

²⁸“Vaporofita vayo vakavayuwira nesuko, vachiona zvinonyengera nokuvaukira zvenhema vachiti, ‘Zvanzi naIshe Jehovha, izvo Jehovha haana kutaura.’

²⁹“Vanhu venyika vakamanikidza nokupamba; zvirokwazvo vakatambudza varombo navanoshayiwa, vakamanikidza mutorwa asina mhaka hake.

³⁰Zvino ndakatsvaka pakati pavo munhu angagadzira rusvingo, angamira pakakoromoka pamberi pangu achirwira nyika, kuti ndirege kuiparadza; asi handina kuwana nomumwe.

³¹Naizvozvo ndakadurura shungu dzangu pamusoro pavo; ndakavapedza nomoto wehasha dzangu; ndakauyisa zvavakaita pamisoro yavo,” ndizvo zvinotaura Ishe Jehovha.