Read Shona Union Version 2002 Ezekieri 23 Bible Online

Ezekieri 23 - Shona Union Version 2002 bible

Ezekieri 23

¹Zvino shoko raJehovha rakasvikazve kwandiri, richiti,

²“Mwanakomana womunhu, kwakanga kuna vakadzi vaviri, vanasikana vamai vamwe;

³ivo vakapata muIjipiti, vakapata vachiri vaduku; mazamu avo akanyangatwa ipapo, minyatso yohumhandara hwavo yakabatwa-batwapo.

⁴“Mazita avo akanga ari Ohora, mukuru, naOhoribha munun'una wake; ivo vakazova vangu, vakabereka vanakomana navanasikana. Zvino kana ari mazita avo, Samaria ndiOhora, Jerusaremu ndiOhoribha.

⁵Ohora wakapata, ari wangu, akadana navadikanwi vake, ivo vaAsiria vaigara pedyo naye,

⁶vaifuka micheka mitema, vaiva vabati namadzishe, ose ari majaya anodikanwa, vatasvi vaifamba namabhiza.

⁷Iye akapata navo, ivo varume vakatsaurwa vose pakati peAsiria, zvino waizvisvibisa nezvifananidzo zvavose vaidikanwa naye.

⁸“Uye haana kuzorega kupata kwake kwaakabva nako Ijipiti; nokuti varume vakavata naye achiri muduku, vakabatabata minyatso yohumhandara hwake, vakadurura hupombwe hwavo pamusoro pake.

⁹“Naizvozvo ndakamuisa mumaoko avadikanwi vake, mumaoko avaAsiria, vaakadana navo.

¹⁰Ivo vakafukura kunyadza kwake, vakatora vanakomana navanasikana vake, vakamuuraya iye nomunondo, zita rake rikazosekwa pakati pavakadzi; nokuti vakamutonga.

¹¹“Zvino munun'una wake Ohoribha wakazviona hake, kunyange zvakadaro iye wakanga akanyanya pakudana kwake navadikanwi, uye kupata kwake kwakapfuura kupata kwomukuru wake.

¹²“Iye akadana navaAsiria, vaiva vabati namadzishe, vaigara pedyo naye, vakafuka zvakaisvonaka kwazvo, vari vatasvi vanofamba namabhiza, ose ari majaya anodikanwa.

¹³Zvino ndakaona kuti wasvibiswa; ivo vose vakafamba nenzira imwe.

¹⁴“Akawedzera kupata kwake; nokuti wakaona zvifananidzo zvavarume pamadziro, zviri zvifananidzo zvaKaradhea, zvakaitwa nomuti mutsvuku,

¹⁵vakasunga zviuno zvavo nebhanhire, vane ngowani dzemicheka pamisoro yavo, vose vakaita samachinda kana vachionekwa, vakafanana navaBhabhironi paKaradhea, iyo nyika yokuberekwa kwavo.

¹⁶Zvino wakati achivaona, akavada kwazvo, akatuma nhume kwavari paKaradhea.

¹⁷VaBhabhironi vakauya kwaari ari panhoo dzorudo, vakamusvibisa nohupombwe hwavo, iye akasvibiswa pamwechete navo, mweya wake ukazorambana navo.

¹⁸“Zvino wakati afukura kupata kwake, nokufukura kunyadza kwake, mweya wangu ukarambana naye, mweya wangu sezvawakarambana nomukuru wake.

¹⁹“Kunyange zvakadaro akaramba achiwedzera kupata kwake, achirangarira mazuva ohuduku hwake, aakapata nawo panyika yeIjipiti.

²⁰Akadana zvikuru navadikanwi vake, vane nyama yakaita senyama yembongoro, uye zvinobudiswa navo zvakaita sezvinobudiswa namabhiza.

²¹Zvino ukayeudzwa zvakashata zvohuduku hwako, panguva yawakabatwa-batwa minyatso yako navaIjipiti nokuda kwamazamu ohumhandara hwako.

²²“Naizvozvo iwe Ohoribha, ndizvo zvinotaura Ishe Jehovha tarira, ndichakumutsira vadikanwi vako, vakazorambwa nomweya wako; ndichavauyisa kwauri kuzorwa newe kumativi ose;

²³vanoti, vaBhabhironi, navaKaradhea vose, Pekodhi naShoa naKoa, navaAsiria pamwechete navo, iwo majaya anodikanwa, vose vari vabati namadzishe, machinda navarume vane mbiri, vose vakatasva mabhiza.

²⁴Vachauya kuzorwa newe nenhumbi dzokurwa, nengoro, nezvinofamba namakumbo engoro, neboka ravanhu vazhinji; vachazvirongedza kuzorwa newe nenhoo huru nenhoo duku nengowani kumativi ose; ini ndichavapa simba rokutonga, vakutonge nokutonga kwavo.

²⁵Ndichamutsa godo rangu kuzorwa newe, ivo vakuitire hasha; vachabvisa mhino dzako nenzeve dzako, vakasara kwauri vachaurawa nomunondo; vachatora vanakomana vako navanasikana vako; vakasara kwauri vachapera nomoto.

²⁶Vachakubvisirawo nguo dzako, nokukutorera hukomba hwako hwakanaka.

²⁷“Saizvozvo ndichakugumisira zvakashata zvako nokupata kwako kwawakabva nako kunyika yeIjipiti, kuti urege kuzozvitarirazve nameso ako, kana kuzorangarira Ijipiti.

²⁸“Nokuti zvanzi naIshe Jehovha, ‘Tarira, ndichakuisa mumaoko avaunovenga, mumaoko aivo vakarambwa nomweya wako;

²⁹ivo vachakuitira ruvengo, vachakutorera zvose zvawakabatira, vakakurega usina chawakafuka wakashama; kunyadza kwokupata kwako kuchafukurwa, zvakaipa zvako pamwechete nokupata kwako.’

³⁰“Uchaitirwa zvinhu izvi nemhaka yokuti wakapata namarudzi avanhu, uye nemhaka yokuti wakasvibiswa nezvifananidzo zvavo.

³¹Iwe wakafamba nenzira yomukuru wako; saka ndichaisa mukombe wake muruoko rwako.

³²“Zvanzi naIshe Jehovha, ‘Uchanwira pamukombe womukuru wako, wakadzika mukuru; uchasekwa nokudadirwa, nokuti iwe une zvizhinji zvirimo.

³³Uchazara nokubatwa nokuchema; mukombe womukuru wako Samaria mukombe wokushamiswa nokuparadzwa.

³⁴Uchaunwa nokuupedza chose, uchatsenga zvaenga zvawo, nokubvanzura mazamu ako; nokuti ndini ndakataura izvozvo,’ ” ndizvo zvinotaura Ishe Jehovha.

³⁵Naizvozvo zvanzi naIshe Jehovha, “Zvawakandikanganwa, ukandirasira shure kwako, naizvozvo chiva nemhosva yezvakashata zvako, neyokupata kwako.”

³⁶Jehovha akatiwo kwandiri, “Mwanakomana womunhu, chitonga Ohora naOhoribha, uvazivise zvinonyangadza zvavo.

³⁷“Nokuti wakapfeva, ropa riri pamaoko avo; wakapfeva nezvifananidzo zvavo; vakapinzawo vanakomana vavo vavakandiberekera mumoto, kuti zvidyiwe nazvo.

³⁸Vakandiitirawo chinhu ichi, vakasvibisawo nzvimbo yangu tsvene nezuva iro, vakamhura maSabata angu.

³⁹“Nokuti vakati vabayira zvifananidzo zvavo vana vavo, vakapinda nezuva iro munzvimbo yangu tsvene kuti vaimhure; tarirai, ndizvo zvavakaita mukati meimba yangu.

⁴⁰“Makatumawo nhume kundodana varume vanobva kure nhume yakatumwako kwavari ivo vakauya, iwe ukazvishamba nokuda kwavo, ukazodza meso ako nomuti, nokuzvishongedza nezvishongo,

⁴¹ukagara panhoo dzakaisvonaka, dzakanga dzakagadzirirwa tafura pamberi padzo, pawakagadzika zvinonhuwira zvangu namafuta angu.

⁴²Izwi ravazhinji vakanga vachifara rakanga rinaye; zvino pamwechete navarume vakabva kuvazhinji, vakauya navakariri vedoro, vaibva kurenje, vakaisa zvishongo pamaoko avo, nekorona dzakanaka pamisoro yavo.”

⁴³Zvino ndakati kuna iye akanga apera nokupfeva kwake, “Zvino vachaita hupombwe naye, naiye navo.

⁴⁴“Ipapo vakapinda kwaari, sezvavanopinda kuchipfeve; saizvozvo vakapinda kuna Ohora naOhoribha, ivo vakadzi vakashata.

⁴⁵Naizvozvo varume vakarurama vachavatonga sezvinotongwa zvipfeve, sezvinotongwa vakadzi vakateura ropa, nokuti zvipfeve, ropa riri pamaoko avo.”

⁴⁶Nokuti zvanzi naIshe Jehovha, “Ndichauyisa boka ravarwi kuzorwa navo, ndichavaregera kuti vadzungaidzwe kwose-kwose vapambwe.

⁴⁷Boka iro richavataka namabwe, nokuvabaya neminondo yavo; vachauraya vanakomana vavo navanasikana vavo, nokupisa dzimba dzavo nomoto.

⁴⁸Saizvozvo ndichagumisa zvakashata panyika, kuti vakadzi vose vadzidziswe kuti varege kutevera zvakashata zvenyu.

⁴⁹Vachakutsivirai zvakashata zvenyu, imi muchava nezvivi zvezvifananidzo zvenyu, zvino muchaziva kuti ndini Ishe Jehovha.”