Read Shona Union Version 2002 Ezekieri 26 Bible Online

Ezekieri 26 - Shona Union Version 2002 bible

Ezekieri 26

¹Zvino negore regumi nerimwe, nezuva rokutanga romwedzi, shoko raJehovha rakasvika kwandiri, richiti,

²“Mwanakomana womunhu, Tire zvarakati pamusoro peJerusaremu, ‘Toko waro! Raputsika, iro raiva suo ramarudzi; roringira kwandiri, zvino ini ndichazadzwazve, iro zvaraitwa dongo.’

³“Naizvozvo zvanzi naIshe Jehovha, ‘Tarira, ndine mhaka newe, iwe Tire, ndichauyisa marudzi mazhinji kuzorwa newe, sezvinouyisa gungwa mafungu aro.

⁴Vachaparadza masvingo eTire, nokukoromora shongwe dzaro; ndicharitsvairira guruva raro, riite soruware rusine chinhu.

⁵Richava nzvimbo panonikwa mimbure pakati pegungwa, nokuti ndakazvitaura ini,’ ndizvo zvinotaura Ishe Jehovha; richava kumarudzi sechinhu chakapambwa.

⁶Vakunda varo vari kuruwa vachaurawa nomunondo; zvino vachaziva kuti ndini Jehovha.”

⁷Nokuti zvanzi naIshe Jehovha, “Tarirai, ndichauyisira Tire Nebhukadhirezari mambo weBhabhironi, mambo wamadzimambo, achibva kurutivi rwokumusoro ana mabhiza nengoro navatasvi vamabhiza, nehondo navanhu vazhinji.

⁸Iye achauraya nomunondo vakunda vako vari kuruwa, achakuvakira nhare dzokurwa newe, nokukututira murwi wokurwa.

⁹Achamisa zvokugumura pamasvingo ako, achakoromora shongwe dzako nematombo.

¹⁰“Nokuwanda kwamabhiza ake guruva rawo richakufukidza; masvingo ako achadengenyeka nomutsindo wavatasvi vamabhiza, namakumbo engoro, nengoro, panguva yaachapinda pamasuo ako, somupindirwo weguta rakakoromorerwa rusvingo.

¹¹“Achatsika nzira dzako dzose dzomuguta namahwamanda amabhiza ake, achauraya vanhu vako nomunondo, neshongwe dzinoratidza simba renyu dzichawira pasi.

¹²Vachapamba pfuma yako nokukutorera zvokushambadzira zvako, vachakoromora masvingo ako, nokuparadza dzimba dzako dzinofadza; vachaisa mabwe ako namatanda ako neguruva rako mukati memvura zhinji.

¹³“Ndichagumisa mazwi enziyo dzako, kurira kwembira dzako hakungazonzwiki.

¹⁴Ndichakuita ruware rusine chinhu, uchava nzvimbo panonikwa mimbure; hauchazovakwizve, nokuti ini Jehovha ndakazvitaura,” ndizvo zvinotaura Jehovha.

¹⁵Zvanzi naIshe Jehovha kuTire, “Ko zvivi hazvingadengenyeki here nokutinhira kwokuwa kwako, kana vanhu vako vakakuvadzwa vachigomera, kana vanhu vachiurawa mukati mako here?

¹⁶Nenguva iyo machinda ose okugungwa achabhuruka pazvigaro zvawo zvohushe, vachaisa pasi nguo dzavo dzohushe nokubvisa zvokufuka zvavo zvakarukwa; vachafuka kudedera, vachagara pasi vachingodedera vachishamiswa pamusoro pako.

¹⁷“Vachaita mariro pamusoro pako, vachiti kwauri, ‘Aiwa, wakaparadzwa sei, iwe wakanga wakagarwa navanhu vaiziva kufamba negungwa, iro guta rakanga rine mbiri, rakanga rine simba pagungwa, iro navanhu varo, vaityisa vose vagereko.’

¹⁸“Zvino zvivi zvichadengenyeka nezuva rokuwa kwako; zvirokwazvo, zvivi zviri mugungwa zvichavhunduka nokubviswa kwako.

¹⁹Nokuti zvanzi naIshe Jehovha, ‘Nenguva yandichakuita guta dongo, sezvakaita maguta asina vanhu, nenguva yandichauyisa gungwa rakadzika pamusoro pako, ukafukidzwa nemvura zhinji;

²⁰nenguva iyo ndichakuburusa pamwechete navanoburukira mugomba, kuvanhu vekare; ndichakugarisai panzvimbo dziri pasi dzenyika, pakanga panamatongo kare nakare, pamwechete navanoburukira mugomba, kuti urege kugarwa navanhu; asi ndichaisa mufaro munyika yavapenyu.’

²¹“Asi iwe ndichakuita chinhu chinotyisa, haungazovipo; kunyange ukatsvakwa, haungawanikwizve nokusingaperi,” ndizvo zvinotaura Ishe Jehovha.