Read Shona Union Version 2002 Ezekieri 27 Bible Online

Ezekieri 27 - Shona Union Version 2002 bible

Ezekieri 27

¹Zvino shoko raJehovha rakasvikazve kwandiri, richiti,

²“Zvino iwe, Mwanakomana womunhu, ita mariro pamusoro peTire;

³uti kuTire, ‘Nhai iwe ugere pavanopinda pagungwa, iwe unoshambadzirana namarudzi avanhu pazvivi zvizhinji, zvanzi naIshe Jehovha,’ iwe Tire, wakati, ‘Ndakakwana pakunaka.’

⁴Nyika yako iri mumwoyo wamakungwa; vavaki vako vakakwanisa kunaka kwako.

⁵Vakaita mapuranga ako ose nemisipiresi inobva Seniri; vakatora musidhari weRebhanoni kukuitira danda rechikepe.

⁶Matanda ako okukwasva nawo vakaaita nemiouki yeBhashani; vakaita zvigaro zvako pazvikepe nenyanga dzenzou dzakavezerwa mumapuranga emipaini yakabva kuzvivi zveKitimi.

⁷Maseiri ako aiva omucheka wakaisvonaka, wakasonerwa hukomba, aibva Ijipiti, kuti uve mureza wako; denga rako raiva romucheka mutema nomutsvuku waibva kuzvivi zveErisha.

⁸“Vakanga vagere Sidhoni neArivhadhi ndivo vaiva vakwasvi vako; vanhu vako vakachenjera, iwe Tire, vakanga vari mukati mako, ndivo vaiva vafambisi vezvikepe zvako.

⁹Vakuru veGebhari navakachenjera varo vaiva mukati mako vachikugadzirira paisvinirira mvura; zvikepe zvose zvegungwa zvaiva mukati mako pamwechete navafambisi vazvo kuti vashambadzirane newe.

¹⁰“Vanhu vePerisia neRudhi nePuti vaiva muhondo yako, vaiva varwi vako; vaiturikira mukati mako nhoo dzavo nengowani dzavo; vaikuitira mbiri.

¹¹Varume veArivhadhi vaiva pamusoro pamasvingo ako kumativi ose pamwechete nehondo yako, nemhare dzaiva pamusoro peshongwe dzako; vaiturika nhoo dzavo pamasvingo ako kumativi ose, vaikwanisa kunaka kwako.

¹²“Tarishishi raishambadzirana newe nokuda kwepfuma zhinji yamarudzi ose, vakatenga nhumbi dzako nesirivha nedare netini nomutobvu.

¹³Nyika dzeJavhani, Tubhari, neMesheki ndivo vaitengerana newe, vaitenga nhumbi dzako nemiviri yavanhu nemidziyo yendarira.

¹⁴Veimba yaTogarima vakatenga nhumbi dzako namabhiza namabhiza ehondo namahesera.

¹⁵Varume veDhedhani ndivo vaitengerana newe; zvivi zvizhinji zvaiva nzvimbo pawaitengesa noruoko rwako; vaiuya nenyanga dzenzou namatanda omushuma kuzotsinhanha newe.

¹⁶Nyika yeSiria yaishambadzirana newe nokuda kwezvizhinji zvako zvakaitwa namaoko; vakatenga nhumbi dzako namabwe esimaragidhino, nomucheka mutema, nezvakarukwa, nomucheka wakaisvonaka, nekorari, namabwe anovaima.

¹⁷Judha nenyika yaIsiraeri ndivo vaitengerana newe; vaitenga nhumbi dzako nezviyo zveMiniti, nezvinotapira, nohuchi, namafuta, nebharisami.

¹⁸Dhamasiko raishambadzirana newe richitenga zvizhinji zvako zvakaitwa namaoko, nokuda kwepfuma zhinji yamarudzi ose, newaini yeHeribhoni nemvere chena.

¹⁹Nyika dzeVedhani neJavhani dzakatenga nhumbi dzako nechinda; dare rinobwinya, nekasia, nekaramo ndizvo zvakanga zviri pakati penhumbi dzako.

²⁰“Dhedhani raikutengesera micheka inokosha yokutasvisa mabhiza nayo.

²¹Nyika yeArabhia namachinda ose enyika yeKedhari ndivo vaitenga pamaoko enyu; makwayana namakondohwe nembudzi ndizvo zvavaitenga kwauri.

²²Vatengesi veShebha neRaama ndivo vaitengerana newe; vaishambadzira nhumbi dzako nezvinonhuwira zvakaisvonaka, namabwe ose anokosha, nendarama.

²³Harani neChane neEdheni ivo vatengesi veShebha neAshuri neKirimadhi ndizvo vaitengerana newe.

²⁴Ndivo vaitengerana newe nenhumbi dzakatsaurwa, nenguo dzemicheka mitema nezvakarukwa, namabhokisi ezvokufuka zvinokosha, akasungwa namabote, akavezwa nemisidhari, pakati penhumbi dzako.

²⁵Zvikepe zveTarishishi ndizvo zvaitakura nhumbi dzako, iwe ukazadzwa, ukaitirwa mbiri mumwoyo yamakungwa.

²⁶Vakwasvi vako vakakuisa kumvura zhinji; mhepo yokumabvazuva yakakuputsa mumwoyo wamakungwa.

²⁷Pfuma yako, nenhumbi dzako, nezvokutengesa zvako, vafambisi vezvikepe zvako, navarairi vazvo, navagadziri vako panosinirira mvura, navashambadziri venhumbi dzako, navarwi vako vose, vari mukati mako, navanhu vako vazhinji vari mukati mako, zvose zvichawira mumwoyo wamakungwa nezuva rokuparadzwa kwako.

²⁸Mafungu achadengenyeka nomubvumo wokudanidzira kwavarairi vezvikepe zvako.

²⁹Vose vanobata namatanda okukwasva, ivo vafambisi navarairi vose vapagungwa, vachaburuka pazvikepe zvavo; vachamira pamhenderekedzo,

³⁰vachadana namanzwi avo pamusoro pako, vachachema kwazvo; vachikushira guruva pamisoro yavo; vachaumburukira, mumadota;

³¹vachazviveurira misoro nokuda kwako, vachazvisunga zviuno namasaga, vachikuchema nemweya ine shungu kwazvo nokuchema kukuru.

³²Pakuchema kwavo vachakuitira mariro, vachachema pamisoro pako, vachiti, ‘Ndianiko wakatongofanana neTire, wakaita saiye wakaparadzwa mukati megungwa?

³³Panguva yakaenda nhumbi dzako kumakungwa, wakagutisa vanhu vazhinji; wakafumisa madzimambo enyika nepfuma yako zhinji nezvawaitengesa.

³⁴Panguva yawakaputswa namakungwa mukati memvura zhinji yakadzika, nhumbi dzako navanhu vako vose zvakawira pasi mukati mako.

³⁵Vose vagere pazvivi vanoshamiswa pamusoro pako, madzimambo avo anotya kwazvo; zviso zvavo zvinodedera.

³⁶Vatengesi pakati pamarudzi avanhu vanokuridzira muridzo, wava chinhu chinotyisa, haungatongozovipo.’ ”