Read Shona Union Version 2002 Ezekieri 28 Bible Online

Ezekieri 28 - Shona Union Version 2002 bible

Ezekieri 28

¹Zvino shoko raJehovha rakasvikazve kwandiri, richiti,

²“Mwanakomana womunhu, iti kumuchinda weTire, zvanzi naIshe Jehovha, ‘Mwoyo wako zvawakazvikudza,’ iwe ukati, ‘Ini ndiri mwari, ndigere pachigaro chaMwari pakati pamakungwa,’ kunyange zvakadaro, uri munhu hako, hauzi Mwari, kunyange wakamisa mwoyo wako somwoyo waMwari;

³tarira, unokunda Dhanieri pakuchenjera kwako, hakuna chakavanzika chausingazivi iwe;

⁴wakazviwanira pfuma nohuchenjeri hwako uye nokuziva kwako, ukazviwanira ndarama nesirivha muzvivigiro zvepfuma yako;

⁵wakawedzera pfuma yako nohuchenjeri hwako hukuru uye nokushambadzira kwako, mwoyo wako ukazvikudza nokuda kwepfuma yako;

⁶naizvozvo zvanzi naIshe Jehovha, ‘Zvawakamisa mwoyo wako somwoyo waMwari,’

⁷naizvozvo tarira, ndinouyisa vatorwa pamusoro pako, ivo vanotyisa pakati pamarudzi ose; vachavhomorera kunaka kwohuchenjeri hwako minondo yavo, vachasvibisa kubwinya kwako.

⁸“Vachakuburusira kugomba; uchafa norufu rwavanourawa mumwoyo wamakungwa.

⁹Ko ungazoreva pamberi pounokuuraya, uchiti, ‘Ndini Mwari?’ Asi uri munhu, hauzi Mwari, muruoko rwaiye unokukuvadza.

¹⁰Uchafa norufu rwousina kudzingiswa namaoko avatorwa; nokuti ndini ndakataura izvozvo,” ndizvo zvinotaura Ishe Jehovha.

¹¹Zvino shoko raJehovha rakasvikazve kwandiri, richiti,

¹²“Mwanakomana womunhu, itira mambo weTire mariro, uti kwaari, zvanzi naIshe Jehovha, ‘Iwe wokuisa chisimbiso chako pachiyero, uzere nohuchenjeri, hwakakwana pakunaka.’

¹³Wakanga uri paEdheni, mumunda waMwari; wakanga wakafukidzwa namabwe anokosha amarudzi ose, anoti, saridhio netopasi nedhaimani neberiri, neonikisi nejasipiri nesafiri nesimaragidhino nekaribhunikuri; ngoma dzako nenyere dzako dzakanga dzakaitwa nendarama mukati mako, zvakagadzirwa nezuva rokusikwa kwako.

¹⁴Iwe wakanga uri kerubhi rakazodzwa, raifukidzira areka, ndikakugadza ukava pamusoro pegomo dzvene raMwari; waifamba-famba pakati pamabwe omoto.

¹⁵Wakanga wakakwana panzira dzako kubva pazuva rokusikwa kwako, kusvikira kusarurama kwakawanikwa mukati mako.

¹⁶Nokuwanda kwokushambadzira kwako vakazadza mukati mako nokuita nesimba, ukatadza; naizvozvo ndakakudzinga pagomo raMwari ndichiti uri chinhu chinomhurwa, ndikakuparadza, iwe kerubhi raifukidzira areka, ndikakubvisa pakati pamabwe omoto.

¹⁷Mwoyo wako wakazvikudza nokuda kwokunaka kwako; wakaodza huchenjeri hwako nokuda kwokubwinya kwako; ndakakuwisira pasi, ndakakuisa pamberi pamadzimambo kuti vakuone.

¹⁸Nokuwanda kwezvakaipa zvako, nokusarurama kwokushambadzira kwako, wakamhura nzvimbo dzako tsvene; naizvozvo ndakabudisa moto mukati mako; wakakupedza, ndikakushandura ukava madota panyika pamberi pavose vanokuona.

¹⁹Vose, vanokuziva pakati pamarudzi avanhu, vachashamiswa pamusoro pako; wava chinhu chinotyisa, haungazovi chinhu nokusingaperi.”

²⁰Zvino shoko raJehovha rakasvikazve kwandiri richiti,

²¹“Mwanakomana womunhu, rinzira chiso chako kurutivi rweSidhoni, uporofite pamusoro paro,

²²uti, zvanzi nashe Jehovha, ‘Tarira, ndine mhaka newe, iwe Sidhoni; ndichakudzwa mukati mako; vanhu vachaziva kuti ndini Jehovha, nenguva yandinoita mukati maro izvo zvandakatonga, ndichiitwa mutsvene mukati maro.’

²³Nokuti ndichatuma hosha yakaipa mukati maro, neropa munzira dzaro; vakakuvadzwa vachawira pasi mukati maro, kana munondo uchiuya pamusoro paro kumativi ose; zvino vachaziva kuti ndini Jehovha.

²⁴“Hapachazovi norukato runobaya imba yaIsiraeri, kana munzwa unokuvadza pakati pavaivakomberedza, vaivashoora; zvino vachaziva kuti ndini Ishe Jehovha.”

²⁵Zvanzi naIshe Jehovha, “Nenguva yandinenge ndaunganidza imba yaIsiraeri kumarudzi avanhu kwavakanga vakaparadzirwa, ndikaitwa mutsvene pakati pamberi pamarudzi, nenguva iyo vachagara munyika yavo yandakapa muranda wangu Jakobho.

²⁶Vachagaramo vakachengetwa; zvirokwazvo, vachavaka dzimba, nokusima minda yemidzambiringa, vachagara vakachengetwa, kana ndaita zvandakatonga pamusoro pavose vakavapoteredza vanovashora; zvino vachaziva kuti ndini Jehovha Mwari wavo.”