Read Shona Union Version 2002 Ezekieri 30 Bible Online

Ezekieri 30 - Shona Union Version 2002 bible

Ezekieri 30

¹Shoko raJehovha rakasvikazve kwandiri, richiti,

²“Mwanakomana womunhu, porofita, uti, zvanzi naIshe Jehovha, ‘Ungudzai! Aiwa, zuva rakaipa sei!’

³Nokuti zuva rava pedyo, izuva ramakore; ichava nguva yamarudzi avanhu.

⁴Munondo uchauya pamusoro peIjipiti, kurwadziwa kukuru kuchavapo paItiopia, kana vakaurawa vachiparadzwa paIjipiti; vachabvisa vanhu vayo vazhinji, nenheyo dzayo dzichakoromorwa.

⁵“Itiopia nePuti, neRudhi, navanhu vose vakavengana, neKubhi, navana venyika vakaita sungano, vachaparadzwa pamwechete navo nomunondo.”

⁶Zvanzi naJehovha, “Naivo vanotsigira Ijipiti vachaparadzwa; kuzvikudza kwesimba rayo kuchaderera; vachaparadzwamo nomunondo kubva paMigidhori kusvikira paSevhene.

⁷Vachava dongo pakati penyika dzakaitwa matongo, namaguta ayo achava pakati pamaguta akaitwa matongo.

⁸Zvino vachaziva kuti ndini Jehovha, kana ndaisa moto paIjipiti, vabatsiri vayo vose vaparadzwa.

⁹“Nezuva iro nhume dzichabva kwandiri nezvikepe kundotyisa vaItiopia vasine hanya; vachava nokurwadziwa kukuru, sapazuva reIjipiti; nokuti, tarirai, zvinouya.”

¹⁰Zvanzi naIshe Jehovha, “Ndichagumisawo vanhu vazhinji veIjipiti noruoko rwaNebhukadhirezari mambo weBhabhironi.

¹¹“Iye navanhu vake vaanavo, vanotyisa zvikuru pakati pamarudzi, vachauyiswamo kuzoparadza nyika; vachavhomorera Ijipiti minondo yavo, nokuzadza nyika navakaurawa.

¹²Ndichapwisa mvura yenzizi, nokutengesa nyika mumaoko avanhu vakaipa; nyika ndichaiita dongo, nezvose zvirimo, noruoko rwavatorwa; ini Jehovha, ndakataura izvozvo.”

¹³Zvanzi naIshe Jehovha, “Ndichaparadzawo zvifananidzo, nemifananidzo ndichaigumisa paNofi; hapangazovi nomuchinda kunyika yeIjipiti; ndichaisa kutya panyika yeIjipiti.

¹⁴Patirosi ndichariita dongo, paZoani ndichaisa moto, ndichaita zvandakatonga pamusoro peNo.

¹⁵Ndichadurura hasha dzangu pamusoro peSini, iyo nhare yeIjipiti; ndichaparadza vanhu vazhinji veNo.

¹⁶“Ndichaisa moto paIjipiti; Sini richabatwa nokurwadziwa kukuru, No richaparadzwa, Nofi richava navavengi masikati.

¹⁷Majaya eAvheni neePibhesheti achaurawa nomunondo, maguta awa achatapwa.

¹⁸PaTapanesi masikati achaita rima, kana ndichivhunapo majoko eIjipiti, kuzvikudza kwesimba raro kuchapera mukati maro; kana riri iro, richafukidzwa negore, vakunda varo vachatapwa.

¹⁹Saizvozvo ndichaita zvandakatonga pamusoro peIjipiti; zvino vachaziva kuti ndini Jehovha.”

²⁰Zvino negore regumi nerimwe, nomwedzi wokutanga, nezuva rechinomwe romwedzi, shoko raJehovha rakasvika kwandiri richiti,

²¹“Mwanakomana womunhu, ndavhuna ruoko rwaFarao mambo weIjipiti; zvino tarira, haruna kupomberwa, kuti rurapwe, nemishonga, rupomberwe mucheka, kuti ruve nesimba rokubata munondo.

²²Naizvozvo zvanzi naIshe Jehovha, ‘Tarirai, ndine mhaka naFarao mambo weIjipiti, ndichavhuna maoko ake, irwo rune simba norumwe rwakavhunika; ndichawisa pasi munondo uri paruoko rwake.

²³Ndichaparadzira vaIjipiti pakati pamarudzi, ndichavadzingira kunyika dzose.

²⁴Asi ndichasimbisa maoko amambo weBhabhironi, nokuisa munondo wangu muruoko rwake; asi ndichavhuna maoko aFarao, uchagomera pamberi pake sezvinogomera munhu akakuvadzwa ari pakufa.

²⁵Ndichatsigira maoko amambo weBhabhironi, asi maoko aFarao acharemberera pasi; zvino vachaziva kuti ndini Jehovha, kana ndichiisa munondo wangu muruoko rwamambo weBhabhironi, iye akautambanudzira pamusoro penyika yeIjipiti.

²⁶Ndichaparadzira vaIjipiti pakati pamarudzi avanhu, nokuvadzingirira kunyika dzose; zvino vachazoziva kuti ndini Jehovha.’ ”