Read Shona Union Version 2002 Hosea 10 Bible Online

Hosea 10 - Shona Union Version 2002 bible

Hosea 10

¹VaIsiraeri mudzambiringa unotanda zvakanaka, unobereka zvibereko zvawo; zvibereko zvavo zvakati zvichiwanda, vakawanzawo maaritari avo; nyika yavo yakati ichifara, ivo vakazviitirawo shongwe dzakanaka.

²Mwoyo yavo inonyengera, zvino vachapiwa mhaka; acharova maaritari avo, achaparadza shongwe dzavo.

³Zvirokwazvo, zvino vachati, “Hatina mambo, nokuti hatityi Jehovha; kana ari mambo angatiitireiko?”

⁴Vanotaura mashoko asina maturo, vanopika nhema pakuita kwavo sungano; naizvozvo kutongwa kwavo kunomera somuti unouraya mumihoronga yomunda.

⁵Vagere Samaria vachatya mhuru dzeBhetiavheni; nokuti vanhu varo vachaichema, navapristi varo vaiifarira, nokuda kwokukudzwa kwayo, nokuti kwabva kwairi.

⁶Ichaiswawo Asiria, chive chipo chamambo Jarebhi; Efuremu vachanyadziswa, Isiraeri vachanyadziswa namano avo.

⁷Kana riri Samaria, mambo waro waparadzwa sechipande pamusoro pemvura.

⁸Nzvimbo dzakakwirira dzeAvheniwo, izvo zvivi zvaIsiraeri, dzichaparadzwa; munzwa norukato zvichamera pamaaritari avo; zvino vachati kumakomo, “Tifukidzei,” nokuzvikomo, “Wirai pamusoro pedu.”

⁹“Aiwa, Isiraeri, makatadza kubva pamazuva eGibhea; ndipo pavakamira; ko vachakundwa nehondo inorwa navana vezvakaipa paGibhea here?

¹⁰Nguva yandinoda ndichavaranga; marudzi avanhu achavaunganira kana vakasungirwa pazvisakarurama zvavo zviviri.

¹¹“Efuremu itsiru rakapingudzwa, rinofarira kupura zviyo; asi ini ndimene ndasvika pamutsipa waro wakanaka, ndaisa mutasvi pamusoro paEfuremu; Judha vacharima, Jakobho achaputsa mavhinga ake.

¹²Zvidyarirei mukururama, mugocheka zvorudo; undai makombo enyu, nokuti inguva yokutsvaka Jehovha, kusvikira achiuya achikunisirai zvakarurama.

¹³Makarima zvakashata, makacheka zvakaipa, makadya zvibereko zvenhema, nokuti makanga muchivimba nenzira yenyu, uye nokuwanda kwemhare dzenyu.

¹⁴Naizvozvo bope richamuka pakati pavanhu venyu, nhare dzenyu dzose dzichaparadzwa, Sharimani sezvaakaparadza Bhetiaribheri nezuva rokurwa; mai vakaputsanyiwa pamwechete navana vavo.

¹⁵Ndizvo zvamuchaitirwa neBhetieri nemhaka yokushata kwenyu kukuru; mambo waIsiraeri achaparadzwa chose mambakwedza.”