Read Shona Union Version 2002 Hosea 12 Bible Online

Hosea 12 - Shona Union Version 2002 bible

Hosea 12

¹“Efuremu vanozvigutisa nemhepo, vanoteverera mhepo yokumabvazuva; vanoramba vachiwedzera nhema nokuparadza; vanoita sungano neAsiria, uye mafuta anoiswa Ijipiti.”

²Jehovha ane gakava naJudhawo, acharova Jakobho pamusoro penzira dzake, achamuripira pamusoro pezvaakaita.

³Muchizvaro akabata chichitsinho chomukuru wake, ava nesimba romurume akaita mitsimba naMwari;

⁴zvirokwazvo, akaita mitsimba nomutumwa akakunda; akachema, akamunyengetera; akamuwana paBhetieri, akataurapo nesu,

⁵iye Jehovha, Mwari wehondo; Jehovha ndiro zita rokumurangarira naro.

⁶Naizvozvo chidzokera kuna Mwari wako; chengeta rudo nokururamisa, urambe uchimirira Mwari wako.

⁷“Iye muKanani, zviyero zvinonyengera zviri muruoko rwake, anofanira kumanikidza.

⁸Asi Efuremu anoti, ‘Zvirokwazvo, ndapfuma, ndazviwanira pfuma; pamabasa angu ose havangawani kwandiri zvakaipa zvezvivi.’

⁹Asi ndini Jehovha Mwari wako, kubva panyika yeIjipiti; ndichakugarisaizve mumatende, sapamazuva emitambo yakatarwa.

¹⁰“Ndakataurawo navaporofita, ndikawanza zvandakavaratidza; ndakavataurira zvifananidzo nemiromo yavaporofita.

¹¹“Ko paGireadhi pane zvakaipa here? Havana maturo chose; vanobaya nzombe paGirigari; zvirokwazvo maaritari avo akaita matutu amabwe pamihoronga yeminda.”

¹²Jakobho akatizira kunyika yeArami, Isiraeri akabatira mukadzi, akafudza makwai kuti awane mukadzi.

¹³Jehovha akabudisa Isiraeri paIjipiti nomuporofita, akazochengetwa nomuporofita.

¹⁴Efuremu vakatsamwisa Jehovha zvikuru; naizvozvo mhaka yeropa rake ichasiyiwa kwaari, Ishe wake achadzosera kuzvidzwa kwake kwaari.