Read Shona Union Version 2002 Hosea 2 Bible Online

Hosea 2 - Shona Union Version 2002 bible

Hosea 2

¹Itiyi kuna vanun'una venyu, “Ama;” nokuhanzvadzi dzenyu, “Ruhama.”

²Kakavarai namai venyu, kakavarai; nokuti haazi mukadzi wangu, neni handizi murume wake; ngaabvise kufeva kwake pachiso chake, nokupata kwake pakati pamazamu ake;

³kuti ndirege kumukumurira nguo dzake dzose, ndimuite sezvaakanga akaita nezuva rokuzvarwa kwake, ndimuite serenje, ndimushandure ave nyika yakaoma, ndimuuraye nenyota.

⁴Zvirokwazvo handinganzwiri vana vake nyasha, zvavari vana voufeve;

⁵nokuti mai vavo vakafeva; vakavabereka vakaita zvinonyadzisa, nokuti vakati, “Ndichatevera vadikani vangu, vanondipa zvokudya zvangu nemvura yangu, namakushe angu neshinda yangu, namafuta angu nezvokunwa zvangu.”

⁶Naizvozvo tarira, ndichasosera nzira yako neminzwa, ndichamuvakira rusvingo, kuti arege kuwana nzira dzake.

⁷Achatevera vadikani vake, asi haangavabati; achavatsvaka, asi haangavawani; ipapo achati, “Ndichadzokera kumurume wangu wokutanga, nokuti nenguva iyo ndaifara kupfuura zvino.”

⁸Nokuti akanga asingazivi kuti ndini ndaimupa zviyo, newaini namafuta, nokumuwanzira sirivha nendarama, zvavaibatira Bhaari nazvo.

⁹Saka ndichamutorera zviyo zvangu nenguva yazvo, newaini yangu itsva nenhambo yazvo, ndichabvisa makushe angu neshinda yangu zvaifanira kufukidza kushama kwake.

¹⁰Zvino ndichafukura kunyadzisa kwake pamberi pavadikani vake, hakuna angamurwira paruoko rwangu.

¹¹Ndichagumisawo mufaro wake wose, nemitambo yake, nenguva dzake dzokugara kwomwedzi, namaSabata ake, newungano dzake dzose dzakatarwa.

¹²Ndichaparadza midzambiringa yake nemionde yake, yaaiti, “Ndiwo mubayiro wangu wandakapiwa navadikani vangu; ndichazviita dondo, mhuka dzokusango dzichazvidya.

¹³Ndichamuranga nokuda kwamazuva avaBhaari, vaaipisira zvinonhuwira, azvichishonga nezvindori zvake zvenzeve nezvishongo zvake, akatevera vadikani vake, akandikangwanwa,” ndizvo zvinotaura Jehovha.

¹⁴Saka tarirai, ndichamunyengera nokumuisa kurenje, ndichitaura zvinofadza mwoyo wake.

¹⁵Ndichamupa minda yake yemidzambiringa zvichibva ipapo, nomupata waAkori uve mukova wetariro kwaari; achapindura aripo, sapamazuva ousikana hwake, uye sapazuva raakabuda panyika yeIjipiti.

¹⁶Zvino nezuva iro, ndizvo zvinotaura Jehovha, achandiidza Ishi, haungazondiidzi Bhaari.

¹⁷Nokuti ndichabvisa mazita avaBhaari mumuromo make, havangazozikanwi namazita avo.

¹⁸Nezuva iro ndichavaitira sungano nemhuka dzokusango, neshiri dzokudenga, nezvinokambaira zvapasi; ndichavhuna uta nomundo nehondo panyika, ndivavatise pasi vakachengetwa.

¹⁹Ndichakunyenga uve wangu nokusingaperi; zvirokwazvo ndichakunyenga uve wangu nokururama, nokururamisira, nounyoro, nenyasha.

²⁰Ndichakunyenga uve wangu nokutendeka; ipapo uchaziva Jehovha.

²¹Zvino nezuva iro ndichapindura, ndizvo zvinotaura Jehovha ndichapindura denga rose, iro richapindura nyika;

²²nyika ichapindura zviyo, newaini, namafuta; izvo zvichapindura Jezireri.

²³Ndichazvisimira iye panyika; ndichamunzwira nyasha, iye akanga asina kunzwirwa nyasha; ndichati kuna ivo vakanga vasi vanhu vangu, “Imi muri vanhu vangu,” ivo vachati, “Imi muri Mwari wedu.”