Read Shona Union Version 2002 Amosi 6 Bible Online

Amosi 6 - Shona Union Version 2002 bible

Amosi 6

¹Vane nhamo vagere zvakanaka paZioni, navagere pakasimba mugomo reSamaria, ivo vanhu vane mbiri vorudzi rukuru pakati pamarudzi, kunoenda imba yaIsiraeri!

²Pfuurirai Karine, muone; kubva ipapo endai Hamati, iro guta guru; zvino muende Gati ravaFirisitia; ivo vakakurira ushe hwohuno here? Nyika yavo ihuru kune yenyu here?

³Iyemi, munoti zuva rakaipa richiri kure, muchiswededza zvigaro panoitwa nesimba;

⁴imi, munovata pamibhedha yenyanga dzenzou, muchizamura pauvato hwenyu, muchidya makwayana amapoka, nemhuru dziri mukati mechirugu;

⁵munoimba nziyo dzisina maturo mbira dzichiridzwa, munozviitira zvinoridzwa saDhavhidhi;

⁶imi, munonwa waini nemidziyo yokubayira, muchizora mafuta akaisvonaka; asi hamune hanya nokukuvadzwa kwaJosefa.

⁷Naizvozvo zvino vachatapwa nowokutanga vanotapwa; ipapo ruzha rwavanozamura ruchapfuura.

⁸Ishe Jehovha wakapika naiye amene ndizvo zvinotaura Jehovha, iye Mwari wehondo achiti, “Ndinosema kuzvikudza kwaJakobho, ndinovenga dzimba dzavo dzoushe; naizvozvo ndinoisa guta nezvose zvirimo kuvavengi vavo.”

⁹Zvino kana varume vane gumi vakasara muimba imwe vachafa.

¹⁰Kana hama yomunhu wakafa ichiuya kumutora iye anozomupisa, ichibvisa mapfupa mumba, ikati kuno ari mukati-kati meimba, “Kuchinomumwe newe here?” Iye akati, “Kwete!” Ipapo uchati, “Nyarara, nokuti hazvina kufanira kuti tireve zita raJehovha.”

¹¹Nokuti tarirai, Jehovha anoraira, iye achakoromora imba huru, neimba duku ichaita mitswe.

¹²Ko mabhiza angamhanya paruware here? Ko pangarimwa nemombe here? Nokuti makashandura kururamisa mukakuita nduru, nezvibereko zvokururama mukazviita gavakava;

¹³iyemi, munofarira chinhu chisina maturo, muchiti, “Hatina kuzviwanira nyanga nesimba redu here?”

¹⁴“Nokuti tarirai, ndichakumutsirai rumwe rudzi, imi imba yaIsiraeri,” ndizvo zvinotaura Jehovha, iye Mwari wehondo; ruchakutambudzai kubva pavanopinda paHamati kusvikira kurukova rwerenje.