Read Shona Union Version 2002 Amosi 8 Bible Online

Amosi 8 - Shona Union Version 2002 bible

Amosi 8

¹Hezvi zvandakaratidzwa naIshe Jehovha, tarirai, tswanda inezvibereko zvezhizha.

²Akati, “Amosi, unooneiko?” Ini ndikati, “Tswanda inezvibereko zvezhizha.” Zvino Jehovha akati kwandiri, “Kuguma kwasvikira vanhu vangu vaIsiraeri, handichatongovadarikizve.

³Nziyo dzetemberi dzichashanduka kuungudza nezuva iro,” ndizvo zvinotaura Ishe Jehovha; zvitunha zvichavapo zvizhinji, vachazvikandira kunze kwose vanyerere.

⁴Inzwai chinhu ichi, iyemi, munoda kumedza vanoshaiwa, nokuparadza varombo venyika,

⁵muchiti, “Kugara kwomwedzi kuchapfuura riniko, kuti titengese zviyo? Uye Sabata, kuti tizarure matura ezviyo? Tichatapudza efa, nokukurisa shekeri, tichinyengera nezviyero zvinonyengera;

⁶kuti titenge varombo nesirivha, navanoshaiwa tichipiwa shangu mbiri, tichitengesa makoto ezviyo?”

⁷Jehovha akapika noukuru hwaJakobho, achiti, “Zvirokwazvo, handingatongokanganwi rimwe ramabasa avo nokusingaperi.

⁸Ko nyika haingadederi pamusoro pechinhu ichi, mumwe nomumwe agerepo haangachemi here? Zvirokwazvo, ichakwira yose soRwizi, ichatutuma ndokudererazve, soRwizi, rweIjipiti.

⁹Zvino nezuva iro ndizvo zvinotaura Ishe Jehovha ndichavirisa zuva masikati makuru, ndichaisa rima panyika achiri masikati.

¹⁰Ndichashandura mitambo yenyu kuve kuchema, nenziyo dzenyu dzose kuve kurira kwokuchema; ndichafukidza zviuno zvose masaga, nokuita misoro yose mhazha; ndichazviita sapanochemwa mwanakomana akazvarwa ari mumwechete, nokuguma kwazvo sezuva rakaipa kwazvo.

¹¹“Tarirai, mazuva anouya ndizvo zvinotaura Ishe Jehovha andichatuma nzara panyika, isati iri nzara yezvokudya, kana nyota yemvura, asi yokunzwa mashoko aJehovha.

¹²Vachadzungaira vachibva kugungwa vachienda kugungwa, vachibva kumusoro vachienda mabvazuva; vachamhanya pose-pose vachitsvaka shoko raJehovha, asi havangariwani.

¹³Nezuva iro mhandara dzakanaka namajaya vachaziya nenyota.

¹⁴Vanopika vezvivi zveSamaria, vachiti, ‘Namwari wako mupenyu, iwe Dhani; uye, Nenzira yeBheerishebha mhenyu, ivo vachawira pasi, vakasazomukazve.’ ”