Read Shona Union Version 2002 Amosi 9 Bible Online

Amosi 9 - Shona Union Version 2002 bible

Amosi 9

¹Ndakaona Ishe amire parutivi rwearitari, akati, “Rova misoro yembiru, kuti zvikumbaridzo zvidedere, uzviputsanye pamisoro yavo yose; ndichauraya wokupedzisira pakati pavo nomunondo; hakuna nomumwe wavo achatiza, hakuna nomumwe wavo achapukunyuka.

²Kunyange vakachera kusvikira paSheori, ruoko rwangu ruchandovatorapo; kunyange vakakwira kusvikira kudenga, ndichavaburusapo.

³“Kunyange vakandovanda pamusoro peKarimeri, ndichavatsvaka nokuvabvisapo; kunyange vakavanda meso angu pakudzika kwegungwa, ndicharaira nyoka kundovarumapo.

⁴Kunyange vakatapwa navavengi vavo, ndicharaira munondo kundovaurayapo; ndicharinzira meso angu kwavari kuti ndivaitire zvakaipa, ndirege kuvaitira zvakanaka.”

⁵Nokuti Ishe Jehovha wehondo ndiye unobata nyika ikanyauka, vose vageremo vachachema; ichakwira yose soRwizi, ichadederazve soRwizi rweIjipiti;

⁶ndiye anovaka makamuri ake kudenga, wakateya denga rake panyika; iye anodana mvura zhinji yegungwa achiidururira panyika pose; Jehovha ndiro zita rake.

⁷“Nhai, imi vana vaIsiraeri, ko hamuzi kwandiri savana veItiopia here? Ndizvo zvinotaura Jehovha. Handizini ndakabudisa Isiraeri panyika yeIjipiti here, navaFirisitia paKafitori, navaSiria paKiri here?

⁸Tarirai, meso aIshe Jehovha anoona ushe hunotadza, ndichahuparadza ndihubvise panyika pose, asi handingaparadzi chose imba yaJakobho ndizvo zvinotaura Jehovha.

⁹“Nokuti tarirai, ndicharaira, ndichapepeta imba yaIsiraeri pakati pamarudzi ose, sezvinopepetwa zviyo mumusero, kunyange zvakadaro tsanga imwe dukuduku haingawiri pasi.

¹⁰Vatadzi vose vavanhu vangu vachaurawa nomunondo, ivo vanoti, ‘Zvakaipa hazvingatibati, hazvingasvikiri kwatiri.’ ”

¹¹“Nezuva iro ndichamutsa tabherinakeri yaDhavhidhi yakawira pasi, nokudzivirapo pakakoromorwa; ndichamutsazve matongo ayo, ndichaivakazve sezvayakanga yakaita pamazuva akare;

¹²kuti vazvitorere zvakasara zvaEdhomu, namarudzi ose akatumidzwa nezita rangu,” ndizvo zvinotaura Jehovha, anoita izvozvi.

¹³“Tarirai, mazuva anouya,” ndizvo zvinotaura Jehovha “Murimi achabata mucheki, nomusvini wemidzambiringa achabata anodyara mbeu; makomo achadonha waini inozipa, uye zvikomo zvose zvichanyauka.

¹⁴“Ndichadzosa kutapwa kwavanhu vangu vaIsiraeri, vachavaka maguta akaparadzwa, vachigaramo; vachasima minda yemidzambiringa, vachinwa waini yayo; vacharimawo mimwe minda, vachidya zvibereko zvayo.

¹⁵Ndichavasima panyika yavo, havangazodzurwizve panyika yavo yandakavapa,” ndizvo zvinotaura Jehovha Mwari wenyu.