Read Shona Union Version 2002 Obhadhiya 1 Bible Online

Obhadhiya 1 - Shona Union Version 2002 bible

Obhadhiya 1

¹Zvakaonekwa naObhadhiya. Zvanzi naIshe Jehovha pamusoro paEdhomu, “Takanzwa mashoko akabva kuna Jehovha, nhume yatumwa pakati pamarudzi ichiti, ‘Simukai, ngativamukire kuzorwa navo.’

²“Tarirai, ndakakuitai vaduku pakati pamarudzi, makazvidzwa kwazvo.

³“Kuzvikudza kwemwoyo yenyu kwakakunyengerai, iyemi, mugere mumikaha yamatombo, munougaro hwakakwirira, vanoti mumwoyo yavo, ‘Ndianiko ungatiwisira pasi?’

⁴“Kunyange mukabhururukira kumusoro segondo, uye kunyange dendere renyu rikaiswa pakati penyeredzi, ndichakuwisiraipo pasi ndizvo zvinotaura Jehovha.

⁵Dai mbavha dzaisvika kwamuri, kana makororo usiku (aiwa, makaparadzwa sei!) havazaiba kusvikira varinganiswa here? Dai vatanhi vamazambiringa vaisvika kwamuri, havazaisiya mamwe mazambiringa aripo here?

⁶Zvinhu zvaEsau zvakanzverwa sei! Pfuma yavo, yakavanzwa, yakafukunurwa sei!

⁷Vanhu vose vaiva nesungano nemi, vakakuperekedzai kusvikira kumuganho; vanhu, vaigara norugare nemi, vakakunyengerai, vakakukundai; vanodya zvokudya zvenyu, vanokuteyerai musungo pasi penyu, havana njere mukati mavo.

⁸Ko handingaparadzi nezuva iro vachenjeri pakati paEdhomu, nenjere pagomo raEsau here? Ndizvo zvinotaura Jehovha.

⁹Mhare dzako, iwe Temani, ndichavhunduka, kuti vose vapere nokuurawa pagomo raEsau.

¹⁰Uchafukidzwa nokunyara nemhaka yokuti wakamukira mun'una wako simba, uchaparadzwa nokusingaperi.

¹¹Nezuva ramakanga mumirepo makatarisana navo, nezuva ravakatorera pfuma yavo navatorwa, vasi venyika iyo vachipinda masuo avo, vachikanda mijenya pamusoro peJerusaremu, nemiwo makanga makaita somumwe wavo.

¹²Asi regai kutarira zuva romun'una wenyu, muchifarira zuva renjodzi yavo, murege kufara pamusoro pavana vaJudha nezuva rokuparadzwa kwavo; uye regai kutaura muchizvikudza nezuva rokumanikidzwa kwavo.

¹³Regai kupinda pasuo ravanhu vangu nezuva renhamo yavo; regai kutarira njodzi yavo nezuva renhamo yavo, regai kuvatorera pfuma yavo nezuva renhamo yavo.

¹⁴Regai kumira pamharadzano, kuti muparadze vanhu vavo vanopukunyuka; regai kuisa kuvavengi vavo vanhu vavo vakasara nezuva rokumanikidzwa kwavo.

¹⁵Nokuti zuva raJehovha raswedera kumarudzi ose; sezvamakaitira vamwe, muchaitirwawo saizvozvo; zvamakaita zvichadzokera pamisoro yenyu.

¹⁶Nokuti sezvamakanwa pagomo rangu dzvene, saizvozvo marudzi ose acharamba achinwa; zvirokwazvo, vachanwa, nokumedza, vachaita savasina kumbovapo.

¹⁷Asi pagomo reZioni ndipo pachava navakapukunyuka, richava gomo dzvene; imba yaJakobho ichadzoserwa nhaka yayo.

¹⁸Imba yaJakobho ichava moto, imba yaJosefa murazvo womoto, uye imba yaEsau mashanga; vachapisa vamwe pakati pavo, nokuvapedza; hakuchina vachasarira imba yaEsau, nokuti Jehovha akataura izvozvo.

¹⁹Vokurutivi rwezasi vachatora gomo raEsau, vokumapani vachatora nyika yavaFirisitia; vachatora nyika yaEfuremu nenyika yeSamaria; Benjamini vachatora nyika yeGireadhi.

²⁰Vatapwa vehondo iyi yavana vaIsiraeri, vagere pakati pavaKanani, vachatora nyika kusvikira Zarefati; vatapwa veJerusaremu, vari Sefaradhi, vachatora maguta okurutivi rwezasi.

²¹Vaponesi vachakwira pagomo reZioni kuzotonga gomo raEsau; ushe huchava hwaJehovha.”