Read Shona Union Version 2002 NUMERI 19 Bible Online

NUMERI 19 - Shona Union Version 2002 bible

NUMERI 19

¹Zvino Jehovha akataura naMosesi naAroni, akati,

²“Ndiwo murayiro wakarairwa naJehovha, achiti: Taura navana vaIsiraeri vauye kwauri netsiru dzvuku risina mhosva, risina kuremara, risina kumboiswa joko.

³Zvino munofanira kuripa Ereazari mupristi, iye aribudise kunze kwemisasa, rigourawa pamberi pake.

⁴Ipapo Ereazari mupristi anofanira kutora ropa raro nomunwe wake, nokusasa ropa raro kanomwe kurutivi rwemberi rwetende rokusangana;

⁵zvino tsiru rinofanira kupiswa pamberi pake; dehwe raro, nenyama yaro, neropa raro, pamwechete namazvizvi aro, zvinofanira kupiswa.

⁶Zvino mupristi anofanira kutora rutanda rwomusidhari nehisopi, nomucheka mutsvuku, ndokuzvikandira pakati pomoto unopisa tsiru.

⁷Ipapo mupristi anofanira kusuka nguo dzake, nokushambidza muviri wake nemvura, ndokuzopinda mumisasa, mupristi agova asina kunaka kusvikira madeko.

⁸Nomunhu anoripisa anofanira kusuka nguo dzake nemvura, nokushambidza muviri wake nemvura, agova asina kunaka kusvikira madeko.

⁹Zvino mumwe munhu akanaka anofanira kuunganidza madota etsiru, ndokuachengeta kunze kwemisasa panzvimbo yakanaka, kuti achengeterwe ungano yavana vaIsiraeri, kuzoita nawo mvura yokunatsa nayo; chipiriso chezvivi.

¹⁰Zvino iye akaunganidza madota etsiru, anofanira kusuka nguo dzake, agova asina kunaka kusvikira madeko; anofanira kuva mutemo usingaperi kuvana vaIsiraeri nokuvatorwa vagere pakati pavo.

¹¹Munhu anobata chitunha chomunhu upi noupi, anofanira kuva asina kunaka mazuva manomwe.

¹²Iye anofanira kuzvinatsa nayo nezuva retatu, agova akanaka nezuva rechinomwe; asi kana asingazvinatsi nezuva retatu, haangavi akanaka nezuva rechinomwe.

¹³Ani naani anobata akafa, chiri chitunha chomunhu upi noupi akafa, akasazvinatsa, anosvibisa tabhenakeri yaJehovha; munhu uyo anofanira kubviswa pakati pavaIsiraeri; mvura inonatsa zvaisina kusaswa pamusoro pake, anofanira kuva asina kunaka; tsvina yake ichiri kwaari.

¹⁴Ndiwo murayiro kana munhu akafa mutende: Mumwe nomumwe anopinda mutende, nomumwe nomumwe ari mutende, achava asina kunaka mazuva manomwe.

¹⁵Nemidziyo yose yakashama, isina chifunhiro chakasungirwa, ichava isina kunaka.

¹⁶Ani naani anobata munhu akaurawa kusango nomunondo, kana chitunha, kana pfupa romunhu, kana hwiro, achava asina kunaka mazuva manomwe.

¹⁷Zvino munhu asina kunaka anofanira kundotorerwa madota echipiriso chezvivi chakapiswa, mvura inoyerera igodirwa pamusoro pawo mumudziyo,

¹⁸zvino munhu akanaka anofanira kutora hisopi, ndokuinyika mumvura, ndokuisasa patende, napanhumbi dzose, napavanhu vose vaivapo, napamunhu akabata pfupa, kana akanga aurawa, kana akafa, kana hwiro;

¹⁹zvino munhu akanaka anofanira kusasa munhu usina kunaka nezuva retatu nerechinomwe; nezuva rechinomwe anofanira kumunatsa; zvino iye anofanira kusuka nguo dzake, nokuzvishambidza nemvura, agova akanaka madeko.

²⁰Asi kana munhu akasvibiswa akasazvinatsa, munhu uyo anofanira kubviswa pakati peungano, nokuti asvibisa imba tsvene yaJehovha; mvura inonatsa haina kusaswa pamusoro pake; haana kunaka.

²¹Unofanira kuva mutemo usingaperi kwavari. Munhu anosasa mvura inonatsa, anofanira kusuka nguo dzake; naiye anobata mvura inonatsa, achava asina kunaka kusvikira madeko.

²²Nezvose zvinobatwa nomunhu usina kunaka, zvichava zvisina kunaka; nomunhu anozvibata achava usina kunaka kusvikira madeko.”