Read Shona Union Version 2002 NUMERI 21 Bible Online

NUMERI 21 - Shona Union Version 2002 bible

NUMERI 21

¹Zvino mambo weAradhi, muKenani, akanga agere kunyika yeZasi, akati anzwa kuti vaIsiraeri vouya nenzira yeAtarimu, akarwa navaIsiraeri, akatapa vamwe vavo.

²Ipapo vaIsiraeri vakapikira Jehovha mhiko, vakati, “Kana mukapa vanhu ava mumaoko edu, tichaparadza maguta avo chose.”

³Jehovha akateerera izwi ravaIsiraeri, akavapa vaKenani; vakavaparadza chose namaguta avo; nzvimbo iyo ikanzi Homa.

⁴Zvino vakasimuka pagomo reHori, vakafamba nenzira inoenda kuGungwa Dzvuku, kuti vanyenyeredze nyika yaEdhomu; vanhu vakapera mwoyo kwazvo panzira.

⁵Ipapo vanhu vakapopotera Mwari naMosesi, vakati, “Makatibudisireiko Ijipiti, kuti tifire murenje? Nokuti hapana zvokudya, hapana mvura; mweya yedu inosema zvokudya izvi zvakaipa.”

⁶Jehovha akatuma nyoka dzinopenga pakati pavanhu, dzikaruma vanhu, vanhu vazhinji vaIsiraeri vakafa.

⁷Zvino vanhu vakauya kuna Mosesi, vakati, “Takatadza, nokuti takapopotera Jehovha nemi; kumbirai kuna Jehovha kuti abvise nyoka kwatiri.” Mosesi akakumbirira vanhu.

⁸Ipapo Jehovha akati kuna Mosesi, “Uzviitire nyoka inopenga, ugoiturika padanda; zvino mumwe nomumwe akarumwa kana akaitarira, achararama.”

⁹Mosesi akaita nyoka yendarira, akaiturika padanda; zvino mumwe nomumwe akati kana arumwa, akatarira nyoka iyo yendarira, akararama.

¹⁰Vana vaIsiraeri vakafamba, vakandodzika matende avo paObhoti.

¹¹Vakabva Obhoti, vakandodzika matende avo paIje‐aBharimi, murenje riri pamberi paMoabhu, kumabvazuva.

¹²Vakafamba vachibva ipapo, vakandodzika matende avo pamupata weZeredhi.

¹³Vakafamba vachibva ipapo, vakandodzika matende avo kumhiri kwaArinoni, rwizi rwaiva murenje, rwaibva kunyika yavaAmori; nokuti Arinoni ndiwo muganhu wavaMoabhu, pakati paMoabhu navaAmori.

¹⁴Naizvozvo pabhuku yeHondo dzaJehovha panoti: VaHebhi paSufa, Nemipata yaArinoni,

¹⁵Nemikwidza yemipata Inorerekera kunzvimbo yeAri, Inosendamira pamuganhu waMoabhu.

¹⁶Vakafamba vachibva ipapo, vakaenda Bheeri; ndiro tsime rakanzi naJehovha kuna Mosesi, “Unganidza vanhu, ndichavapa mvura.”

¹⁷Zvino vaIsiraeri vakaimba rwiyo urwu: Chivhaira, iwe tsime; imi muriimbire;

¹⁸Ndiro tsime rakacherwa namachinda, Rakacherwa navakuru vavanhu Netsvimbo youshe, uye netsvimbo dzavo. Vakabva murenje, vakaenda Matana;

¹⁹vakabva Matana, vakaenda Naharieri; vakabva Naharieri, vakaenda Bhamoti;

²⁰vakabva Bhamoti, vakaenda kumupata uri kubani raMoabhu, kusvikira kumusoro wegomo rePisiga, rinotarira pasi kurenje.

²¹Zvino vaIsiraeri vakatuma nhume kuna Sihoni, mambo wavaAmori, vachiti,

²²“Nditendere kupfuura napanyika yako; hatingatsaukiri kumunda kana kumunda wemizambiringa; hatinganwi mvura yamatsime; tichafamba nenzira huru yamambo, kusvikira tabuda panyika yako.”

²³Asi Sihoni akaramba kutendera vaIsiraeri kupfuura napanyika yake; Sihoni akaunganidza vanhu vake vose, akaenda kurenje kundorwa navaIsiraeri, akasvika paJahazi; akarwa navaIsiraeri.

²⁴Asi vaIsiraeri vakamukunda neminondo inopinza, vakatora nyika yake kubva paArinoni kusvikira paJabhoki, kusvikira pavana vaAmoni; nokuti muganhu wavana vaAmoni wakanga wakasimba.

²⁵Naizvozvo vaIsiraeri vakakunda maguta iwayo ose; vaIsiraeri vakagara mumaguta ose avaAmori, muHeshibhoni napamisha yaro yose.

²⁶Nokuti Heshibhoni rakanga riri guta raSihoni, mambo wavaAmori, iye akanga arwa namambo wokutanga waMoabhu, akamutorera nyika yake yose kusvikira paArinoni.

²⁷Naizvozvo vanotaura neshumo vanoti, “Uyai muHeshibhoni, Guta raSihoni ngarivakwe, risimbiswe;

²⁸Nokuti moto wakabuda muHeshibhoni, Nomurazvo paguta raSihoni, Ukaparadza Ari waMoabhu, Madzishe enzvimbo dzakakwirira dzaArinoni.

²⁹Une nhamo iwe Moabhu! Mapera imi vanhu veKemoshi; Wakapa Sihoni vanakomana vake vatize, Navanasikana vake vatapwe, Sihoni, mambo wavaAmori.

³⁰Takavapfura; Heshibhoni rakaparadzwa kusvikira paDhibhoni, Takaparadza kusvikira paNofa, Moto ukasvika paMedhebha.”

³¹Naizvozvo vaIsiraeri vakagara munyika yavaAmori.

³²Zvino Mosesi akatuma vanhu kundoshora Jazeri, vakakunda misha yaro, vakadzinga vaAmori vakanga vageremo.

³³Ipapo vakadzoka, vakakwira nenzira inoenda Bhashani; zvino Ogi, mambo weBhashani, akauya kuzorwa navo paEdhirei, iye navanhu vake vose.

³⁴Ipapo Jehovha akati kuna Mosesi, “Usamutya hako, nokuti ndakamupa mumaoko ako, iye navanhu vake vose, nenyika yake; unofanira kumuitira iye sezvawakaitira Sihoni, mambo wavaAmori, aigara paHeshibhoni.”

³⁵Naizvozvo vakamukunda, iye navanakomana vake vose, kudzimana asina kusarirwa nomumwe; vakatora nyika yake.