Read Shona Union Version 2002 NUMERI 24 Bible Online

NUMERI 24 - Shona Union Version 2002 bible

NUMERI 24

¹Zvino Bharamu akati achiona kuti zvakanga zvichifadza Jehovha kuropafadza Isiraeri, haana kuzoenda sapane dzimwe nguva, kutsvaka un’ganga, asi akaringira kurenje,

²Bharamu akasimudza meso ake, akaona vaIsiraeri vagere namarudzi avo; Mweya waMwari akauya pamusoro pake,

³akataura nomufananidzo wake, akati, “Zvanzi naBharamu, mwanakomana waBheori, Zvanzi nomurume akasvinudzwa meso ake,

⁴Zvanzi naiye anonzwa mashoko aMwari, Iye unoona zvinoratidzwa nawaMasimbaose, Iye anowira pasi, asvinudzwa meso ake;

⁵Matende ako akanaka zvikuru sei, iwe Jakobho, Nedzimba dzako, iwe Isiraeri!

⁶Vakatasanurwa semipata, Seminda kunhivi dzorwizi, Samagavakava akasimwa naJehovha, Semichindwe pedyo nemvura.

⁷Mvura inobva pazvirongo zvake, Mbeu dzake dzichava pamvura zhinji. Mambo wake achakurira Agagi, Ushe hwake huchakuriswa.

⁸Mwari akamubudisa Ijipiti, Ane simba rakafanana nerenyati; Achapedza vahedheni, ivo vavengi vake; Achavhuna‐vhuna mapfupa avo, Nokuvabvoora nemiseve yake.

⁹Anokotama, anovata pasi seshumba, Seshumbakadzi; ndianiko achamumutsa? Mumwe nomumwe anokuropafadza, ngaaropafadzwe, Mumwe nomumwe anokutuka, ngaatukwe.”

¹⁰Ipapo Bharaki akatsamwira Bharamu kwazvo, akabubudza maoko ake; Bharaki akati kuna Bharamu, “Ndakudana, kuti utuke vavengi vangu, asi tarira, waramba uchingovaropafadza katatu.

¹¹Naizvozvo zvino chitiza hako kunzvimbo yako; nokuti ndakati ndichakukudza kwazvo; asi tarira, Jehovha adzivisa kukudzwa kwako.”

¹²Bharamu akati kuna Bharaki, “Ko handina kutaurawo kunhume dzako, dzawakatuma kwandiri, ndichiti,

¹³‘Kunyange Bharaki akandipa imba yake izere nesirivha nendarama, handingagoni kudarika shoko raJehovha, ndiite nomwoyo wangu zvakanaka kana zvakaipa; zvinotaurwa naJehovha, ndizvo zvandichaita?’

¹⁴Zvino tarira, ndinoenda hangu kurudzi rwangu; uya ndikuudze zvichaitirwa vanhu vako navanhu ava pamazuva okupedzisira.”

¹⁵Akataura nomufananidzo wake, akati, “Zvanzi naBharamu, mwanakomana waBheori, Zvanzi nomurume akasvinudzwa meso ake;

¹⁶Zvanzi naiye anonzwa mashoko aMwari, Iye anoziva zivo yoWokudenga‐denga, Iye anoona zvinoratidzwa nowaMasimbaose, Iye anowira pasi, asvinudzwa meso ake.

¹⁷Ndinomuona, asi handimuoni zvino; Ndinomuona, asi handimuoneri pedyo; Nyeredzi ichabuda kuna Jakobho, Netsvimbo youshe ichabva kuna Isiraeri; Ichabvoora nyika yaMoabhu, Nokuparadza vanakomana vose vebope.

¹⁸Edhomu ichava nhaka yake, NeSeiriwo ichava nhaka yake, ndivo vavengi vake; Asi Isiraeri achakunda.

¹⁹Mumwe, achabva kuna Jakobho, achava noushe, achaparadza vakasara muguta.”

²⁰Zvino akatarira Amareki, akataura nomufananidzo wake, akati, “Amareki ndiye wokutanga wavahedheni, Asi pakupedzisira achaparadzwa.”

²¹Zvino akatarira vaKeniti, akataura nomufananidzo wake, akati, “Ugaro hwako hwakasimba, Dendere rako rakateyiwa padombo.

²²Kunyange zvakadaro Kaini achaparadzwa, Kusvikira iwe uchitapwa naAshuri.”

²³Akataura nomufananidzo wake akati, “Haiwa! Ndianiko achararama, kana Mwari achiita saizvozvo?

²⁴Asi zvikepe zvichabva kurutivi rweKitimi, Zvicharwadza Ashuri, nokurwadza Ebheri, Naiyewo achaparadzwa.”

²⁵Ipapo Bharamu akasimuka, akadzokera kunzvimbo yake; naBharaki akaendawo.