Read Shona Union Version 2002 NUMERI 3 Bible Online

NUMERI 3 - Shona Union Version 2002 bible

NUMERI 3

¹Zvino ndiwo marudzi aAroni naMosesi nomusi wakataura Jehovha nawo naMosesi pagomo reSinai:

²Ndiwo mazita avanakomana vaAroni: Wedangwe, Nadhabhi, tevere Abhihu naEreazari naItamari.

³Ndiwo mazita avanakomana vaAroni, vapristi vakazodzwa, vaakagadza kuti vashumire pabasa roupristi.

⁴Asi Nadhabhi naAbhihu vakafa pamberi paJehovha nguva yavakauyisa moto usakafanira pamberi paJehovha murenje reSinai; vakanga vasina vana; asi Ereazari naItamari vakashumira pabasa roupristi pamberi paAroni, baba vavo.

⁵Zvino Jehovha akataura naMosesi akati,

⁶“Swededza rudzi rwaRevhi, uvaise pamberi paAroni mupristi, kuti vamushumire.

⁷Vanofanira kumubatira iye, nokubatira ungano yose pamberi petende rokusangana, kuti vapedzise mabasa etabhenakeri.

⁸Vanofanira kuchengeta nhumbi dzose dzetende rokusangana, nokubatira vana vaIsiraeri, kuti vapedzise mabasa etabhenakeri.

⁹Vanofanira kupa Aroni navanakomana vake vaRevhi; vakapiwa chose pakati pavana vaIsiraeri.

¹⁰Asi Aroni navanakomana vake unofanira kuvagadza, kuti vabate basa roupristi hwavo; asina kufanira, usaswederapo, anofanira kuurawa.”

¹¹Jehovha akataura naMosesi, akati,

¹²“Tarira, ini ndimene ndakatora vaRevhi pakati pavana vaIsiraeri panzvimbo yamatangwe ose anotanga kuzarura chizvaro pakati pavana vaIsiraeri; vaRevhi ndavangu;

¹³nokuti matangwe ose ndaangu; musi wandakauraya matangwe ose panyika yeIjipiti, ndakazvitsaurira matangwe ose pavaIsiraeri, pavanhu napazvipfuwo; anofanira kuva angu; ndini Jehovha.”

¹⁴Zvino Jehovha akataura naMosesi murenje reSinai akati,

¹⁵“Verenga vana vaRevhi nedzimba dzamadzibaba avo, nemhuri dzavo; unofanira kuverenga varume vose vomwedzi mumwe navanopfuura.”

¹⁶Ipapo Mosesi akavaverenga neshoko raJehovha sezvaakarairwa.

¹⁷Ndivo vanakomana vaRevhi namazita avo: Geshoni, naKohati, naMerari.

¹⁸Ndiwo mazita avanakomana vaGeshoni, nemhuri dzavo: Ribhini naShimei.

¹⁹Navanakomana vaKohati nemhuri dzavo: Amuramu naIzhari naHebhuroni naUzieri.

²⁰Navanakomana vaMerari nemhuri dzavo: Mari naMushi. Ndidzo mhuri dzavaRevhi, nedzimba dzamadzibaba avo.

²¹Geshoni ndiye teteguru wavaRibhini navaShimei; ndidzo mhuri dzavaGeshoni.

²²Vakaverengwa kwavari, vari varume vose vakaverengwa vomwedzi mumwe navanopfuura, vakasvika zviuru zvinomwe namazana mashanu.

²³Mhuri dzavaGeshoni dzinofanira kudzika matende adzo shure kwetabhenakeri kumavirazuva.

²⁴Eriasafi, mwanakomana waRaeri, ndiye anofanira kuva muchinda weimba yamadzibaba avaGeshoni.

²⁵Vanakomana vaGeshoni vanofanira kuchengeta zvinhu izvi mutende rokusangana, tabhenakeri, netende, nechifukidzo chayo, nechidzitiro chomukova wetende rokusangana.

²⁶Nezvirembedzwa zvoruvazhe, nechidzitiro chomukova woruvazhe, ruri patabhenakeri nokunhivi dzose dzeatari, namabote ayo, zvokubata mabasa ayo ose.

²⁷Kohati ndiye tateguru wavaAmuramu, navaIzhari, navaHebhuroni, navaUzieri; ndidzo mhuri dzavaKohati.

²⁸Varume vose vomwedzi mumwe navanopfuura vakaverengwa vakasvika zviuru zvisere namazana matanhatu; ndivo vaibata mabasa paimba tsvene.

²⁹Mhuri dzavanakomana vaKohati dzinofanira kudzika matende adzo kurutivi rwetabhenakeri nechenyasi.

³⁰Erizafani, mwanakomana waUzieri, ndiye anofanira kuva muchinda weimba yamadzibaba emhuri dzavaKohati.

³¹Ivo vanofanira kuchengeta areka, netafura, nechigadziko chemwenje, neatari, nenhumbi dzeimba tsvene, dzavanobata nadzo, nechidzitiro, namabasa ose ayo.

³²Ereazari, mwanakomana waAroni mupristi, ndiye anofanira kuva muchinda wamachinda avaRevhi, iye anofanira kuva mutariri wavanobata mabasa paimba tsvene.

³³Merari ndiye teteguru wavaMari navaMushi; ndidzo mhuri dzaMerari.

³⁴Vakaverengwa kwavari, ivo varume vose vomwedzi mumwe navanopfuura, vakasvika zviuru zvitanhatu namazana maviri.

³⁵Zurieri, mwanakomana waAbhihairi, ndiye anofanira kuva muchinda weimba yamadzibaba emhuri dzaMerari; ivo vanofanira kudzika matende avo kurutivi rwetabhenakeri nechokumusoro.

³⁶Basa rakatarirwa vanakomana vaMerari nderokuchengeta matanda etabhenakeri, nembariro dzayo, nembiru dzayo, nezvigadziko zvadzo, nenhumbi dzayo dzose, namabasa ayo ose;

³⁷nembiru dzaparuvazhe kunhivi dzose, nezvigadziko zvadzo, nembambo dzadzo, namabote adzo.

³⁸Avo vanodzika matende avo pamberi petabhenakeri kumabvazuva pamberi petende rokusangana, kurutivi runobuda zuva, ndivo Mosesi naAroni navanakomana vake, vanobata basa renzvimbo tsvene, ndiro basa ravana vaIsiraeri; asina kufanira anoswederapo anofanira kuurawa.

³⁹Vose vakaverengwa vavaRevhi, vakaverengwa naMosesi naAroni sezvakarairwa naJehovha, nemhuri dzavo, varume vose vomwedzi mumwe navanopfuura, vakasvika zviuru zvina makumi maviri nezviviri.

⁴⁰Zvino Jehovha akati kuna Mosesi, “Verenga matangwe ose avarume avana vaIsiraeri vomwedzi mumwe navanopfuura, ugonyora kuwanda kwamazita avo.

⁴¹Zvino unofanira kunditorera vaRevhi (ndini Jehovha) panzvimbo yamatangwe ose avana vaIsiraeri, nemombe dzavaRevhi panzvimbo yavana vose vemhongora dzemombe dzavana vaIsiraeri.”

⁴²Mosesi akaverenga matangwe ose avana vaIsiraeri, sezvaakarairwa naJehovha.

⁴³Namatangwe ose avarume namazita avano mwedzi mumwe navanopfuura vakaverengwa kwavari, vakasvika zviuru zvina makumi maviri nezviviri namazana maviri namakumi manomwe namatatu.

⁴⁴Zvino Jehovha akataura naMosesi akati,

⁴⁵“Tora vaRevhi panzvimbo yamatangwe ose avana vaIsiraeri, nemombe dzavaRevhi panzvimbo yemombe dzavo; nokuti vaRevhi ndavangu; ndini Jehovha.

⁴⁶Zvino kuti udzikunure matangwe ana mazana maviri namakumi manomwe namatatu avana vaIsiraeri, vanopfuura vaRevhi pakuwanda kwavo,

⁴⁷unofanira kutora mashekeri mashanu kuno mumwe nomumwe; unofanira kuatora uchienzanisa neshekeri rapanzvimbo tsvene (shekeri rina magera makumi maviri).

⁴⁸Zvino unofanira kupa Aroni navanakomana vake mari iyo yokudzikinura avo vakapfuura pakaverengwa pakati pavo.”

⁴⁹Mosesi akatora mari yokudzikinura kuna ivo vakanga vakapfuura vakadzikinurwa navaRevhi;

⁵⁰akatora mari iyi kumatangwe avana vaIsiraeri, mashekeri ane chiuru chimwe namazana matatu namakumi matanhatu namashanu, achienzanisa neshekeri rapanzvimbo tsvene.

⁵¹Mosesi akapa Aroni navanakomana vake mari iyo yokudzikinura, seshoko raJehovha, sezvakarairwa Mosesi naJehovha.