Read Shona Union Version 2002 NUMERI 31 Bible Online

NUMERI 31 - Shona Union Version 2002 bible

NUMERI 31

¹Zvino Jehovha akataura naMosesi, akati,

²“Tsiva vana vaIsiraeri kuvaMidhiani; shure kwaizvozvo iwe uchasanganiswa navanhu vako.”

³Mosesi akataura navanhu, akati, “Varume pakati penyu ngavazvigadzirire kurwa, kuti vandorwa navaMidhiani, vatsivire Jehovha kuvaMidhiani.

⁴Munofanira kutumira kuhondo vane chiuru chimwe kurudzi rumwe norumwe amarudzi avaIsiraeri.”

⁵Naizvozvo vakaverenga kuzviuru zvavaIsiraeri chiuru chimwe kurudzi rumwe norumwe, vakasvika zviuru gumi nezviviri vakazvigadzirira kundorwa.

⁶Mosesi akavatuma kundorwa, chiuru chimwe kurudzi rumwe norumwe, ivo naPinehasi, mwanakomana waEreazari mupristi, kundorwa, iye akabata nhumbi dzeimba tsvene nehwamanda dzokuridzisa nadzo.

⁷Vakarwa navaMidhiani, sezvakarairwa Mosesi naJehovha, vakauraya varume vose.

⁸Vakaurayawo madzimambo avaMidhiani, pamwechete navamwe vakaurawa, vaiti: Evhi, naRekemu, naZuri, naHuri, naRebha, madzimambo mashanu avaMidhiani; naBharamu, mwanakomana waBheori, vakamuurayawo nomunondo.

⁹Vana vaIsiraeri vakatapa vakadzi vavaMidhiani navana vavo; nemombe dzavo dzose namakwai avo ose, nepfuma yavo yose, vakazvitapa.

¹⁰Namaguta avo ose mavakanga vagere, nemisasa yavo yose, vakazvipisa nomoto.

¹¹Vakatora zvavakapamba zvose, nenhapwa dzose dzavanhu nedzezvipfuwo.

¹²Vakauya navatapwa, nezvavakatapa, nezvavakapamba kuna Mosesi, nokuna Ereazari mupristi, nokuungano yose yavana vaIsiraeri, kumisasa pamapani aMoabhu, ari paJorodhani paJeriko.

¹³Zvino Mosesi naEreazari mupristi, namachinda ose eungano, vakaenda kundosangana navo kunze kwemisasa.

¹⁴Mosesi akatsamwira vatariri vehondo, navakuru vezviuru navakuru vamazana, vakanga vachidzoka pakundorwa;

¹⁵Mosesi akati kwavari, “Makachengeta vakadzi vose vari vapenyu here?

¹⁶Tarirai, ndivo vakatadzisa vana vaIsiraeri pamberi paJehovha pazvakaitwa paPeori, vapiwa mano naBharamu, denda rikavapo pakati peungano yaJehovha.

¹⁷Naizvozvo zvino urayai vakomana vose vari pakati pavana, muurayewo mukadzi mumwe nomumwe akavata nomurume;

¹⁸asi muzvichengetere vanasikana vose, vasina kumbovata nomurume.

¹⁹Asi imi, endai mundogara mazuva manomwe kunze kwemisasa; ani naani akauraya munhu, ani naani akabata munhu akaurawa, muzvinatse pazuva retatu nerechinomwe, imi navatapwa venyu.

²⁰Munofanirawo kusuka nguo dzenyu dzose, nezvose zvakaitwa namatehwe, nezvose zvakarukwa nemvere dzembudzi, nezvinhu zvose zvakaitwa namatanda.”

²¹Ereazari mupristi akati kuvarwi vose vakanga vandorwa, “Uyu ndiwo murayiro wakarairwa Mosesi naJehovha:

²²Ndarama, nesirivha, nendarira, nedare, netini, nomutobvu,

²³zvose zvisingaparadzwi nomoto, munofanira kuzvipinza mumoto kuti zvinatswe; kunyange zvakadaro zvinofanira kucheneswa nemvura yokunatsa; asi zvose zvingaparadzwa nomoto, munofanira kuzvipinza mumvura.

²⁴Munofanira kusuka nguo dzenyu nezuva rechinomwe, kuti muve vakanaka, mugopinda mumisasa pashure.”

²⁵Zvino Jehovha akataura naMosesi, akati,

²⁶“Verenga vakatapwa zvamakatapa zvavanhu nezvezvipfuwo, iwe naEreazari mupristi, navakuru vedzimba dzamadzibaba eungano;

²⁷mukamure zvakatapwa napakati, ive migove miviri; mugovere pakati pavarume vanoziva kurwa, vakanga vandorwa, neungano yose;

²⁸zvino uraire kuti mugove wakatarwa utsaurirwe Jehovha navarume vehondo vakanga vandorwa: Chipenyu chimwe kumazana mashanu, kuvanhu, nokumombe, nokumbongoro, nokumakwai;

²⁹uzvitore pahafu yavo, ugozvipa Ereazari mupristi, chive chipiriso chinotsaurirwa Jehovha.

³⁰Asi pahafu yavana vaIsiraeri unofanira kutora chimwe kumakumi mashanu, kuvanhu, nokumombe, nokumbongoro, nokumakwai, kuzvipfuwo zvose, ugozvipa vaRevhi vanochengeta tabhenakeri yaJehovha.”

³¹Mosesi naEreazari vakaita sezvakarairwa Mosesi naJehovha.

³²Zvino zvakatapwa zvakanga zvasara, varume vehondo vatora mugove wavo, zvaiva makwai ane zviuru zvina mazana matanhatu nezviuru zvina makumi manomwe nezviuru zvishanu,

³³nemombe dzine zviuru zvina makumi manomwe nezviviri,

³⁴nembongoro dzine zviuru zvina makumi matanhatu nechiuru chimwe;

³⁵navakadzi vasina kumbovata navarume vane zviuru zvina makumi matatu nezviviri.

³⁶Hafu, yakagoverwa vakanga vaenda kundorwa, aiva makwai ane zviuru zvina mazana matatu, nezviuru zvina makumi matatu, nezviuru zvinomwe, namazana mashanu;

³⁷mugove wakatarwa, wakatsaurirwa Jehovha, waiva makwai ana mazana matanhatu namakumi manomwe namashanu.

³⁸Mombe dzaiva zviuru zvina makumi matatu nezvitanhatu; mugove wakatarwa, wakatsaurirwa Jehovha kunaidzo, waiva mombe dzina makumi manomwe nembiri.

³⁹Mbongoro dzaiva zviuru zvina makumi matatu namazana mashanu; mugove wakatarwa, wakatsaurirwa Jehovha kunaidzo, waiva mbongoro dzina makumi matanhatu neimwe.

⁴⁰Vanhu vaiva zviuru zvine gumi nezvitanhatu; mugove wakatarwa, wakatsaurirwa Jehovha kuna ivo, waiva vanhu vana makumi matatu navaviri.

⁴¹Mosesi akapa Ereazari mupristi mugove wakatarwa, chakanga chiri chipiriso chakatsaurirwa Jehovha, sezvakarairwa Mosesi naJehovha.

⁴²Pahafu yavana vaIsiraeri, yakanga yakamurwa naMosesi kuvanhu vakanga vandorwa,

⁴³(zvino hafu yeungano yaiva makwai ane zviuru zvina mazana matatu namakumi matatu, nezviuru zvinomwe namazana mashanu,

⁴⁴nemombe dzine zviuru zvina makumi matatu nezviuru zvitatu,

⁴⁵nembongoro dzine zviuru zvina makumi matatu namazana mashanu,

⁴⁶navanhu vane zviuru zvine gumi nezvitanhatu).

⁴⁷Pahafu yavana vaIsiraeri Mosesi akatora chimwe kumakumi mashanu, kuvana nokuzvipfuwo, akazvipa vaRevhi vaichengeta tabhenakeri yaJehovha; sezvakarairwa Mosesi naJehovha.

⁴⁸Zvino vatariri vaiva pamusoro pezviuru zvehondo, navakuru vezviuru, navakuru vamazana vakaswedera kuna Mosesi,

⁴⁹vakati kuna Mosesi, “Varanda venyu vakaverenga varume vehondo vanorairwa nesu; hakuna mumwe wedu usipo.

⁵⁰Zvino tauya nechipo chaJehovha, zvakawanikwa nomumwe nomumwe: Zvishongo zvendarama, neketani dzomumakumbo nedzomumaoko, nezvindori zveminwe, nezvindori zvomunzeve, nezvomumutsipa, kuyananisira mweya yedu pamberi paJehovha.”

⁵¹Mosesi naEreazari mupristi vakagamuchira kwavari ndarama, zviri zvishongo zvamarudzi ose zvakaitwa nayo.

⁵²Ndarama yose yechipiriso chakatsaurwa, chavakapa Jehovha, chavakuru vezviuru nechavakuru vamazana, aiva mashekeri ane zviuru zvine gumi nezvitanhatu namazana manomwe namakumi mashanu.

⁵³(Nokuti varume vehondo vakanga vatora mugove wavo wezvakatapwa, mumwe nomumwe.)

⁵⁴Mosesi naEreazari mupristi vakagamuchira ndarama kuvakuru vezviuru navamazana, vakaiisa mutende rokusangana, kuti chive chirangaridzo kuvana vaIsiraeri pamberi paJehovha.