Read Shona Union Version 2002 NUMERI 32 Bible Online

NUMERI 32 - Shona Union Version 2002 bible

NUMERI 32

¹Vana vaRubheni navana vaGadhi vakanga vane zvipfuwo zvizhinji kwazvo; zvino vakati vachitarira nyika yeJazeri nenyika yeGireadhi, vakaona kuti inzvimbo yakafanira zvipfuwo.

²Ipapo vana vaGadhi navana vaRubheni vakauya vakataurirana naMosesi naEreazari mupristi namachinda eungano, vakati,

³“Ataroti neDhibhoni neJazeri neNimura neHeshibhoni neEreari neSebhami neNebho neBheoni.

⁴Nyika dzakakundwa naJehovha pamberi peungano yaIsiraeri, inyika yakafanira zvipfuwo; zvino isu varanda venyu, tine zvipfuwo.”

⁵Vakati, “Kana takawana nyasha pamberi penyu, nyika ino ngaipiwe varanda venyu, ive yavo; musatiyambutsa henyu Jorodhani.”

⁶Mosesi akati kuvana vaGadhi navana vaRubheni, “Ko hama dzenyu dzingaenda kundorwa, imi mukagara pano here?

⁷Munoodzereiko mwoyo yavana vaIsiraeri varege kuenda kunyika yavakapiwa naJehovha?

⁸Ndizvo zvakaita madzibaba enyu nguva yandakavatuma vari paKadheshi‐bharinea, kundoshora nyika.

⁹Nokuti vakati vakwira kumupata weEshikori, vakaona nyika, vakaodza mwoyo yavana vaIsiraeri, kuti varege kupinda munyika yavakanga vapiwa naJehovha.

¹⁰Jehovha akatsamwa nomusi iwoyo, akapika, akati,

¹¹‘Zvirokwazvo, hakungavi nomumwe wavarume vakabuda Ijipiti, ana makore makumi maviri nounopfuura, ungandoona nyika yandakapikira Abhurahamu naIsaka naJakobho, nokuti havana kunditevera nomwoyo wose;

¹²asi Karebhu, mwanakomana waJefune, muKenizi, naJoshua, mwanakomana waNuni, nokuti ivo vakatevera Jehovha nomwoyo wose.’

¹³Jehovha akatsamwira vaIsiraeri, akavadzungairisa murenje makore ana makumi mana, kusvikira rudzi rwose rwakanga rwatadza pamberi paJehovha rwaparadzwa.

¹⁴Zvino tarirai, imi makamuka panzvimbo yamadzibaba enyu, vana chaivo vavanhu vezvivi, kuti muwedzere kutsamwa kukuru kwaJehovha pamusoro paIsiraeri.

¹⁵Nokuti kana mukatsauka pakumutevera, uchavasiyazve murenje; imi muchaparadza vanhu ava vose.”

¹⁶Vakaswedera kwaari, vakati, “Tichavakira zvipfuwo zvedu matanga navana vedu vaduku maguta pano;

¹⁷asi isu tichazvigadzirira kurwa, kuti titungamirire vana vaIsiraeri, kudzimana tavasvitsa kunzvimbo yavo; vana vedu vachagara mumaguta akakombwa namasvingo nokuda kwavanhu vagere munyika.

¹⁸Hatingadzokeri kudzimba dzedu kudzimana vana vaIsiraeri vose vapiwa nhaka yavo.

¹⁹Nokuti hatingagari nhaka pamwechete navo mhiri kwaJorodhani nemberi; nokuti isu tagoverwa nhaka yedu nechouno mhiri kwaJorodhani kurutivi rwamabvazuva.”

²⁰Zvino Mosesi akati kwavari, “Kana mukaita chinhu ichi, kana mukashonga nhumbi dzenyu dzokurwa, kuti muende pamberi paJehovha kundorwa,

²¹mumwe nomumwe wenyu wakashonga akayambuka Jorodhani pamberi paJehovha, kudzimana iye adzinga vavengi vake pamberi pake,

²²nyika ikakundwa pamberi paJehovha, ipapo mungadzoka henyu, hamungavi nemhosva kuna Jehovha nokuvaIsiraeri; nyika ino igova nhaka yenyu pamberi paJehovha.

²³Asi kana mukasaita saizvozvo, tarirai matadzira Jehovha, muzive kuti zvivi zvenyu zvichakuwanai.

²⁴Vakirai henyu vana venyu maguta namakwai enyu matanga; itai sezvamakataura.”

²⁵Vana vaGadhi navana vaRubheni vakataura naMosesi, vakati, “Varanda venyu vachaita sezvakaraira tenzi wedu.

²⁶Vana vedu, navakadzi vedu, nezvipfuwo zvedu, nemombe dzedu dzose, zvichagara mumaguta eGireadhi;

²⁷asi varanda venyu vachayambuka, vose vakazvigadzirira kundorwa, kundorwa pamberi paJehovha, sezvakataurwa natenzi wedu.”

²⁸Naizvozvo Mosesi akaraira pamusoro pavo Ereazari mupristi, naJoshua, mwanakomana waNuni, navakuru vedzimba dzamadzibaba amarudzi avana vaIsiraeri;

²⁹Mosesi akati kwavari, “Kana vana vaGadhi navana vaRubheni vakayambuka nemi, murume mumwe nomumwe wakazvigadzira kundorwa pamberi paJehovha, nyika ikakundwa pamberi penyu; ipapo munofanira kuvapa nyika yeGireadhi, ive yavo.

³⁰Asi kana vasingayambuki nemi, vakashonga nhumbi dzavo dzokurwa, vanofanira kupiwa nhaka yavo pakati penyu panyika yeKenani.”

³¹Ipapo vana vaGadhi navana vaRubheni vakapindura, vakati, “Sezvakareva Jehovha kuvaranda venyu, ndizvo zvatichaita.

³²Tichayambukira pamberi paJehovha kunyika yeKenani, takashonga nhumbi dzedu dzokurwa, kuti tipiwe nhaka yedu nechouno mhiri kwaJorodhani.”

³³Zvino Mosesi akavapa, ivo vana vaGadhi navana vaRubheni, nehafu yorudzi rwaManase, mwanakomana waJosefa, ushe hwaSihoni, mambo wavaAmori, noushe hwaOgi, mambo weBhashani, nyika namaguta ayo nemiganhu yayo, iwo maguta enyika yose yakapoteredza.

³⁴Vana vaGadhi vakavaka Dhibhoni, neAtaroti, neAroeri,

³⁵neAtirotishofani, neJazeri, neJogibheha,

³⁶neBheti‐nimura, neBheti‐harani, ari maguta akakombwa namasvingo, ana matanga amakwai.

³⁷Vana vaRubheni vakavaka Heshibhoni, neEreari, neKiriataimi,

³⁸neNebho, neBhaari‐meoni (vashandura mazita awo), neSibhima; vakatumidza maguta avakavaka mamwe mazita.

³⁹Vana vaMakiriri, mwanakomana waManase, vakaenda Gireadhi, vakarikunda, vakadzinga vaAmori vakanga vageremo.

⁴⁰Mosesi akapa Makiri, mwanakomana waManase, Gireadhi, iye akagaramo.

⁴¹Jairi, mwanakomana waManase, akakunda misha yaro, akaitumidza Misha yaJairi.

⁴²Nobha akandokunda Kenati, nemisha yaro yakanga yakabatwa naro, akaritumidza Nobha, nezita rake.