Read Shona Union Version 2002 NUMERI 6 Bible Online

NUMERI 6 - Shona Union Version 2002 bible

NUMERI 6

¹Zvino Jehovha akataura naMosesi akati,

²“Taura navana vaIsiraeri, uti kwavari, ‘Kana murume, kunyange, mukadzi, akazvisunga nokupika kukuru, kupika kwomuNaziri, kuti azvitsaurire Jehovha;

³anofanira kuramba waini nezvinobata; haafaniri kunwa vhiniga yewaini, kana vhiniga yezvinobata, uye haafaniri kunwa muto wemizambiringa, kana kudya mazambiringa matsva kana akaomeswa.’

⁴Mazuva ose okuzvitsaura kwake haafaniri kudya chinhu chinobva pamuti womuzambiringa kubva pasvurwe kusvika pamateko.

⁵Mazuva ose okupika kwake kuzvitsaura haafaniri kuveurwa musoro wake nechiso; anofanira kuva mutsvene, nevhudzi romusoro wake anofanira kurirega rirebe, kusvikira mazuva apera aakazvitsaurira Jehovha nawo.

⁶Ngaarege kuswedera kuchitunha mazuva ose aanozvitsaurira Jehovha nawo.

⁷Haafaniri kuzvisvibisa nokuda kwababa vake, kana nokuda kwamai vake, kana nokuda kwomun’una wake, kana nokuda kwehanzvadzi yake, kana vafa; nokuti akazvitsaurira Mwari.

⁸Mutsvene kuna Jehovha mazuva ose okuzvinatsa kwake.

⁹Kana munhu akafa kamwe‐kamwe pedyo naye, akasvibisa musoro wake wakatsaurwa; ipapo anofanira kuveura musoro wake nomusi wokunatswa kwake, nomusi wechinomwe anofanira kuuveura.

¹⁰Musi worusere anofanira kuuya kumupristi nenjiva mbiri, kana twana tuviri twenjiva pamukova wetende rokusangana;

¹¹mupristi agobayira imwe chive chipiriso chezvivi, neimwe chive chipiriso chinopiswa, amuyananisire zvaakatadza nokuda kwowakafa, anatse musoro wake nomusi uyo.

¹²Anofanira kutsaurira Jehovha mazuva okuzvitsaura kwake, ndokuuya negwayana regondohwe regore rimwe, chive chipiriso chemhosva; asi mazuva okutanga haangaverengwi, nokuti kuzvitsaura kwake kwakanga kwasvibiswa.

¹³“Ndiwo murayiro womuNaziri, kana mazuva okuzvitsaura kwake achinge apera. Anofanira kuiswa kumukova wetende rokusangana;

¹⁴kuti ape Jehovha chipo chake, chinoti gwayana rimwe, regondohwe regore rimwe, risina kuremara, chive chipiriso chinopiswa, negwayana rimwe resheche regore rimwe, risina kuremara, chive chipiriso chezvivi, negondohwe rimwe risina kuremara, chive chipiriso chokuyananisa,

¹⁵nedengu rezvingwa zvisina kuviriswa, nezvingwa zviduku zvoupfu hwakatsetseka, hwakakanyiwa namafuta, nezvingwa zvitete zvisina kuviriswa, zvakazodzwa namafuta, nechipiriso chazvo choupfu, nezvipiriso zvazvo zvinodururwa.

¹⁶Mupristi anofanira kuuya nazvo pamberi paJehovha, ndokugadzira chipiriso chake chezvivi nechipiriso chake chinopiswa;

¹⁷ndokuuya negondohwe chive chibayiro chezvipiriso zvokuyananisa kuna Jehovha, pamwechete nedengu rezvingwa zvisina kuviriswa; mupristi anofanira kuuyawo nechipiriso chacho choupfu, nechipiriso chacho chinodururwa.

¹⁸Zvino muNaziri anofanira kuveura musoro wake wakatsaurwa pamukova wetende rokusangana, ndokutora vhudzi romusoro wake wakatsaurwa, ndokuriisa pamoto uri pasi pechibayiro chezvipiriso zvokuyananisa.

¹⁹Zvino mupristi anofanira kutora bandauko regondohwe rakabikwa, nechingwa chimwe chiduku chisina kuviriswa padengu, nechimwe chingwa chitete chisina kuviriswa, ndokuzviisa pamaoko omuNaziri, kana iye apedza kuveura musoro wake wakatsaurwa.

²⁰Zvino mupristi anofanira kuzvizunguzira pamberi paJehovha, chive chipiriso chinozunguzirwa; chinhu chitsvene chomupristi, pamwechete nechityu chinozunguzirwa, nebandauko rinosimudzwa; zvino muNaziri anganwe waini.

²¹Ndiwo murayiro womuNaziri pakupika kwake, nechipo chake chokuzvitsaurira Jehovha, zvimwe zvaangagona kuuya nazvo zvisingaverengwi; sezvaakapika, ndizvo zvaanofanira kuita nomurayiro wokuzvitsaura nawo.”

²²Jehovha akataura naMosesi, akati,

²³“Taura naAroni navanakomana vake, uti, ‘Munofanira kuropafadza vana vaIsiraeri nomutoo uyu:’ Muti kwavari,

²⁴‘Jehovha akuropafadze, akuchengete;

²⁵Jehovha akuvhenekere nechiso chake, akunzwire nyasha;

²⁶Jehovha akusimudzire chiso chake, akupe rugare.’

²⁷Nokudaro vachaisa zita rangu pavana vaIsiraeri; neni ndichavaropafadza.”