Read Shona Union Version 2002 Habhakuki 2 Bible Online

Habhakuki 2 - Shona Union Version 2002 bible

Habhakuki 2

¹“Ndichandomira panzvimbo yangu yokurindira, ndichazviisa panharire yangu, ndichatarira ndione zvaachataura neni, uye zvandingapindura pamusoro pokuchema kwangu.

²“Jehovha akandipindura, akati, ‘Nyora zvawaratidzwa, zvionekwe kwazvo pamahwendefa, kuti zvigone kurahwa noanomhanya.

³Nokuti zvakaratidzwa izvi ndezvenguva yakatarwa, zvovavarira kuguma, hazvingarevi nhema; kunyange zvikanonoka, uzvimirire, nokuti zvichauya zvirokwazvo, hazvingaiti nguva huru.

⁴Tarirai, mweya wavo una manyawi, hauna kururama mukati mavo; asi akarurama achararama nokutenda kwake.

⁵“ ‘Uyezve, zvirokwazvo, waini inonyengera, murume anozvikudza, asingagari kumba kwake, akashamisa kukara kwake seSheori, akafanana norufu; haangaguti, asi anozviunganidzira marudzi ose, unozvikokerera marudzi ose avanhu.’

⁶Ko ava vose havangaimbi rwiyo pamusoro pake, nokumudadira nechirabwe, vachiti, ‘Ane nhamo anowanza zvisati zviri zvake! Kusvikira riniko? Uye anozviremedza nezvikwereti!’

⁷“Vachakurumai havangasimuki pakarepo, vanokumanikidzai havangamuki here, imi mukapambwa navo?

⁸Imi zvamakapamba marudzi mazhinji, vose vakasara vamarudzi avanhu vachakupambai imi, nemhaka yeropa ravanhu, uye nemhaka yokuti makaitira nyika simba, neguta navose vageremo.

⁹“Ane nhamo unozviwanira imba yake pfuma yakaipa, kuti aise dendere rake kwakakwirira, kuti arwirwe paruoko rwezvakaipa!

¹⁰Makaranganira imba yenyu zvinonyadza, zvamakaparadza marudzi mazhinji avanhu, mukatadzira mweya wenyu.

¹¹Nokuti ibwe richadanidzira riri parusvingo, danda riri mudenga richapindura.

¹²“Ane nhamo anovaka musha neropa, anovamba guta nezvakaipa!

¹³Tarirai, hazvina kubva kuna Jehovha wehondo here kuti vanhu vabatire moto, uye kuti marudzi avanhu azvinetse nokuda kwezvisina maturo?

¹⁴Nokuti nyika yose ichazadzwa nokuziva kubwinya kwaJehovha, mvura sezvainofukidza pasi pegungwa.

¹⁵“Ane nhamo anopa wokwake zvinobata azvinwe, anovenganisiramo uturu hwenyu, muchimudhakisawo, kuti muone kushama kwavo!

¹⁶Mazvigutisa nezvinonyadzisa panzvimbo yezvinokudzwa; chinwai nemiwo, muve soasina kudzingiswa; mukombe worudyi rwaJehovha uchasvikira kwamuri, zvinonyadzisa zvakaipa zvichauya pamusoro pokukudzwa kwenyu.

¹⁷Nokuti zvakaipa zvakaitirwa Rebhanoni zvichakufukidzai imi, uye kuparadzwa kwezvipfuwo kwakazvityisa; nemhaka yeropa ravanhu, nemhaka yezvakaipa zvakaitirwa nyika, neguta, navose vageremo.

¹⁸“Mufananidzo wakavezwa unobatsireiko, zvawavezwa nomuvezi wawo; kana mufananidzo wakaumbwa, iwo mudzidzisi wenhema, iye wakauumba zvaanovimba nawo, zvaakaita zvifananidzo zvisingagoni kutaura?

¹⁹Ane nhamo anoti kudanda, ‘Muka! Kana kubwe risingagoni kutaura. Simuka! Zvinu izvi zvingadzidzisa here?’ Tarirai, zvakanamirwa nendarama nesirivha, asi hakuna mweya mukati mazvo napaduku.

²⁰“Asi Jehovha ari mutemberi yake tsvene, nyika yose ngairambe inyerere pamberi pake.”