Read Shona Union Version 2002 Zekariya 1 Bible Online

Zekariya 1 - Shona Union Version 2002 bible

Zekariya 1

¹Nomwedzi worusere, negore rechipiri raDhariusi, shoko raJehovha rakasvika kuna Zekariya, mwanakomana waBherekia, mwanakomana womuporofita Idho, richiti,

²“Jehovha akatsamwira madzibaba enyu zvikuru.

³Naizvozvo chiti kwavari, zvanzi naJehovha wehondo, ‘Dzokerai kwandiri, ndizvo zvinotaura Jehovha wehondo neni ndichadzokera kwamuri,’ ndizvo zvinotaura Jehovha wehondo.

⁴“Regai kuva samadzibaba enyu, nokuti vaporofita vokutanga vakadanidzira kwaari, vachiti, zvanzi naJehovha wehondo, ‘Dzokai, zvino panzira dzenyu dzakaipa napazvakaipa zvenyu zvamunoita; asi havana kunzwa kana kunditeerera,’ ndizvo zvinotaura Jehovha.

⁵Madzibaba enyu aripiko? Naivo vaporofita vangararama nokusingaperi here?

⁶Asi mashoko angu nemitemo yangu, zvandakaraira varanda vangu, ivo vaporofita, hazvina kubata madzibaba enyu here? Ivo vakadzoka, vakati, ‘Jehovha wehondo sezvaakafunga kutiitira, zvakafanira mabasa edu nezvakafanira zvatakaita, ndizvo zvaakatiitira.’ ”

⁷Nezuva ramakumi namana romwedzi wegumi nomumwe, uri mwedzi weShabhati, negore rechipiri raDhariusi, shoko raJehovha rakasvika kuna Zekariya mwanakomana waBherekia, mwanakomana womuporofita Idho, richiti,

⁸“Ndakatarira usiku, ndikaona murume akatasva bhiza dzvuku, akamira pakati pemiti yemimirite yaiva mumupata; shure kwake kwakanga kunamabhiza matsvuku namashora namachena.”

⁹Ipapo ndikati, “Nhai, ishe wangu, zvinyiko izvi?” Mutumwa akanga achitaurirana neni akati kwandiri, “Ndichakuratidza kuti izvi zvinyi.”

¹⁰Murume akanga amire pakati pemiti yemimirite akapindura, akati, “Ava ndivo vakatumwa naJehovha kupota-pota nenyika yose.”

¹¹Ivo vakapindura mutumwa waJehovha akanga amire pakati pemiti yemimirite, vakati, “Takapota-pota nenyika yose, wane nyika yose inyerere ichizorora.”

¹²Ipapo mutumwa waJehovha wakapindura, akati, “Aiwa, Jehovha wehondo, mucharamba musinganzwiri nyasha Jerusaremu namaguta aJudha amakatsamwira makore ano ana makumi manomwe kusvikira riniko?”

¹³Ipapo Jehovha akapindura mutumwa akanga achitaurirana neni, mashoko akanaka anonyaradza.

¹⁴Ipapo mutumwa, akanga achitaurirana neni, akati kwandiri, “Danidzira, uti, ‘Zvanzi naJehovha wehondo, ndine godo pamusoro peJerusaremu, godo guru.

¹⁵Ndakatsamwira kwazvo ndudzi dzavanhu dzakazorora, nokuti ndakanga ndakatsamwa zvishoma, asi ivo vakanyanyisa nhamo.’

¹⁶Naizvozvo zvanzi naJehovha, ‘Ndakadzokera Jerusaremu ndine nyasha zhinji; imba yangu ichavakwamo’ ” ndizvo zvinotaura Jehovha wehondo uye rwonzi rwokuyera ruchatambanudzirwa pamusoro peJerusaremu.

¹⁷Danidzirazve, uti, “Zvanzi naJehovha wehondo, ‘Maguta angu achapa pfuma mufarozve, Jehovha achanyaradzazve Zioni, achazvisanangurirazve Jerusaremu.’ ”

¹⁸Zvino ndakarinzira meso angu ndikatarira, ndikaona nyanga ina.

¹⁹Ipapo ndikati kumutumwa, wakanga achitaurirana neni, “Zvinyiko izvi?” Akandipindura, akati, “Ndidzo nyanga dzakaparadzira Judha naIsiraeri neJerusaremu.”

²⁰Jehovha akandiratidza vapfuri vana.

²¹Ipapo ndikati, “Ava vauya kuzobateiko?” Iye akataura, akati, “Ndidzo nyanga dzakaparadzira Judha, kusvikira kusino munhu akasimudza musoro wake; asi ava vauya kuzovatyisa, kuwisira pasi nyanga dzendudzi dzavanhu dzakasimudzira nyika yaJudha runyanga rwavo vachida kuvaparadzira.”