Read Shona Union Version 2002 Zekariya 4 Bible Online

Zekariya 4 - Shona Union Version 2002 bible

Zekariya 4

¹Zvino mutumwa akanga achitaurirana neni akasvikazve, akandimutsa, somunhu anomutswa pahope dzake.

²Akati kwandiri, “Unooneiko?” Ini ndikati, “Ndakatarira, ndikaona chigadziko chomwenje chendarama yose, chine hariyana yacho pamusoro pacho, nemwenje yacho minomwe iri pamusoro pacho; mwenje mumwe nomumwe uri pamusoro pacho une mbombi nomwe;

³uye miti miviri yemiorivhi parutivi rwacho, mumwe kurutivi rworudyi rwehariyana, nomumwe kurutivi rworuboshwe.”

⁴Ndikapindura ndikataura nomutumwa akanga achitaurirana neni, ndichiti, “Izvi zvinyiko, ishe wangu?”

⁵Ipapo mutumwa akanga achitaurirana neni, akapindura, akati, kwandiri, “Hauzivi here kuti izvi zvinyiko?” Ini ndikati, “Kwete, ishe wangu.”

⁶Ipapo akapindura, akataura neni, achiti, “Ndiro shoko raJehovha kuna Zerubhabheri, rinoti, ‘Hazviitwi nehondo kana nesimba, asi noMweya wangu,’ ndizvo zvinotaura Jehovha wehondo.

⁷Ndiwe aniko, iwe gomo guru? Pamberi paZerubhabheri uchaitwa bani, iye achabudisa ibwe rokumusoro, achidanidzira achiti, ‘Nyasha, nyasha ngadzive kwariri.’ ”

⁸Zvino shoko raJehovha rakasvikazve kwandiri, richiti,

⁹“Maoko aZerubhabheri akateya nheyo dzeimba ino, maoko ake achaipedzisawo; ipapo iwe uchaziva kuti Jehovha wehondo ndiye akandituma kwauri.

¹⁰“Nokuti ndiani akashoora zuva rezvinhu zviduku? Nokuti achafara zvikuru, achaona rwonzi rwokuyera muruoko rwaZerubhabheri; awa ndiwo meso aJehovha anofamba pose-pose panyika yose.

¹¹“Ipapo ndakapindura, ndikati kwaari, ‘Ko miorivhi iyi miviri kurutivi rworudyi rwechigadziko nokurutivi rworuboshwe zvinoti kudiniko?’ ”

¹²Ndikapindurazve rwechipiri, ndikati kwaari, “Ko matavi awa maviri nomuorivhi ari kumativi emiromo miviri, inodira mafuta endarama pairi, anoti kudiniko?”

¹³Akandipindura, akati, “Hauzivi here kuti izvi zvinyiko?” Ini ndikati, “Kwete, ishe wangu.”

¹⁴Zvino akati, “Ava ndivo vaviri vakazodzwa, vamire pamberi paShe wenyika yose.”