Read Shona Union Version 2002 Zekariya 5 Bible Online

Zekariya 5 - Shona Union Version 2002 bible

Zekariya 5

¹Zvino ndakarinzira meso anguzve, ndikatarira, ndikaona rugwaro rwakapetwa ruchibhururuka.

²Akati kwandiri, “Unooneiko? Ndikapindura, ndikati, ‘Ndinoona rugwaro rwakapetwa runobhururuka; kureba kwarwo mukubhiti ana makumi maviri, novupamhi hwarwo makubhiti ane gumi.’ ”

³Ipapo akati kwandiri, “Ndiko kutuka kunobudira pamusoro penyika yose; nokuti mumwe nomumwe anoba achaparadzwa kuno rumwe rutivi sezvazvakanyorwamo; uye mumwe nomumwe anopika achaparadzwa kuno rumwe rutivi sezvazvakanyorwamo.

⁴Ndichabudisa kutuka ikoko ndizvo zvinotaura Jehovha wehondo kupinde mumba moanoba nomumba moanopika nhema nezita rangu; kuchagara pakati peimba yake, kuchiipedza iyo pamwechete namatanda ayo nemabwe ayo.”

⁵Zvino mutumwa akanga achitaurirana neni akabuda, akati kwandiri, “Chirinzira meso ako zvino, uone chinobudapo.”

⁶Ini ndikati, “Chinyiko?” Iye akati, “Ndiyo efa inobudapo.” Akatizve, “Ndizvo zvavakaita panyika yose;”

⁷(zvino ndikaona tarenta romutobvu ruchisimudzwa); ndikaona mukadzi agere mukati meefa.

⁸Akati, “Uyu ndiye Zvakashata; akamuwisira pasi mukati meefa, akakandira mutobvu unorema pamusoro pomuromo wayo.”

⁹Ipapo ndakarinzira meso angu, ndikatarira, ndikaona vakadzi vaviri vachibuda, mhepo iri mumapapiro avo; zvino vakanga vanamapapiro akafanana namapapiro ezimuda; ivo vakasimudza efa, ikava pakati penyika nedenga.

¹⁰Ipapo ndikati kumutumwa akanga achitaurirana neni, “Vanondoisepiko efa?”

¹¹Iye akati kwandiri, “Kundoivakira imba panyika yeShinari; kana yapera achandoiswapo panzvimbo yayo.”