Read Shona Union Version 2002 Zekariya 7 Bible Online

Zekariya 7 - Shona Union Version 2002 bible

Zekariya 7

¹Zvino negore rechina ramambo Dhariusi shoko raJehovha rakasvika kuna Zekariya nezuva rechina romwedzi wepfumbamwe, iwo weKisirevhi.

²Zvino vanhu veBhetieri vakanga vatuma Sharezeri naRegemimereki, navanhu vavo, kundokumbira nyasha kuna Jehovha,

³nokutaura navapristi veimba yaJehovha wehondo navaporofita, vachiti, “Ko ndochema nomwedzi wechishanu, ndichizviparadzanisa navamwe, sezvandaiita makore awa mazhinji here?”

⁴Ipapo shoko raJehovha wehondo rakasvika kwandiri, richiti,

⁵“Taura navanhu vose venyika ino, navapristi, uti, ‘Zvamaizvinyima zvokudya muchichema nomwedzi wechishanu nowechinomwe, makore ano ana makumi manomwe, maitongozvinyima zvokudya nokuda kwangu, nokuda kwangu here?

⁶Kana muchidya, kana muchinwa, hamuzvidyiri nokuzvinwira here?’ ”

⁷Ko haazi mashoko aJehovha aakadanidzira navaporofita vakare, Jerusaremu richakagarwa navanhu richinomufaro, iro namaguta aro ose akaripoteredza, nenyika yezasi yenyika yamapani dzichina vanhu.

⁸Zvino shoko raJehovha rakasvika kuna Zekariya, richiti,

⁹“Ndizvo zvakataura Jehovha wehondo, achiti, ‘Ruramisirai kwazvo pakutonga, mumwe nomumwe aitire hama yake unyoro netsitsi;

¹⁰regai kumanikidza chirikadzi, kana nherera, kana mutorwa, kana murombo; kurege kuva nomumwe wenyu anofungira hama yake zvakaipa pamwoyo pake.’

¹¹“Asi vakaramba kuteerera, vakabvisa fudzi ravo, nokudzivira nzeve dzavo kuti varege kunzwa.

¹²Zvirokwazvo, mwoyo yavo vakaiita sedhaimani, kuti varege kunzwa murayiro namashoko akatumwa naJehovha wehondo noMweya wake navaporofita vakare; saka kutsamwa kukuru kwakabuda kuna Jehovha wehondo.

¹³Zvino sezvaakadana, ivo vakaramba kunzwa, saizvozvo ivo vachadanawo, ini ndichiramba kunzwa ndizvo zvinotaura Jehovha wehondo;

¹⁴asi ndichavaparadzira nechamupupuri pakati pendudzi dzose dzavakanga vasingazivi. Naizvozvo nyika yakava dongo shure kwavo, kukasava nomunhu akaenda kana kudzoka neko; nokuti vakaparadza nyika yakanga ichifadza.”