Read Shona Union Version 2002 Zekariya 8 Bible Online

Zekariya 8 - Shona Union Version 2002 bible

Zekariya 8

¹Zvino shoko raJehovha wehondo rakasvika kwandiri, richiti,

²“Zvanzi naJehovha wehondo, ‘Ndine godo pamusoro peZioni, godo guru, ndine godo pamusoro paro, dziri shungu kwadzo.’

³“Zvanzi naJehovha, ‘Ndakadzokera paZioni, ndichagara pakati peJerusaremu; Jerusaremu richanzi guta rezvokwadi, uye gomo raJehovha richanzi gomo dzvene.’

⁴“Zvanzi naJehovha wehondo, ‘Vatana navachembere vachagarazve munzira dzomuguta reJerusaremu, murume mumwe nomumwe ano mudonzvo wake nemhaka yokukwegura kwake.

⁵Nzira dzomuguta dzichazara navakomana navasikana vanotamba munzira dzaro.’

⁶“Zvanzi naJehovha wehondo, ‘Kana zvichishamisa pamberi pavanhu ava vakasara namazuva iwayo, ko zvingashamisa pamberi pangu here?’ Ndizvo zvinotaura Jehovha wehondo.

⁷Zvanzi naJehovha wehondo, ‘Tarirai, ndichaponesa vanhu vangu kunyika yamabvazuva, nokunyika yamavirira;

⁸ndichavauyisa, vagare pakati peJerusaremu; vachava vanhu vangu, neni ndichava Mwari wavo nezvokwadi nokururama.’

⁹Zvanzi naJehovha wehondo, ‘Maoko enyu ngaasimbe, iyemi munonzwa mashoko awa mazuva ano pamiromo yavaporofita, vaivapo nezuva rakateyiwa nheyo dzeimba yaJehovha wehondo, iyo temberi, kuti ivakwe.

¹⁰Nokuti mazuva iwayo asati asvika, kwakanga kusino mubayiro womunhu kana mubayiro wezvipfuwo; kwakanga kusino rugare kunoaibuda kana kune aipinda, nemhaka yomudzivisi, nokuti ndairwisanisa vanhu vose mumwe nomumwe nowokwake.

¹¹“ ‘Asi zvino handichazovi kuna vanhu ava vakasara sapamazuva akare,’ ndizvo zvinotaura Jehovha wehondo.

¹²Nokuti mbeu yorugare ichavapo; mudzambiringa uchabereka zvibereko zvawo, nyika ichabereka zvayo, denga richabudisa dova raro; vanhu ava vakasara ndichavagarisa nhaka yezvinhu izvi zvose.

¹³Zvino sezvamaiva chinhu chakatukwa pakati pendudzi dzavanhu, imi imba yaJudha nemi imba yaIsiraeri, saizvozvo ndichakuponesai, muve chinhu chinoropafadza. Regai kutya, asi maoko enyu asimbe.”

¹⁴Nokuti zvanzi naJehovha wehondo, “Sezvandakafunga kukuitirai zvakaipa, nguva yandakatsamwiswa namadzibaba enyu, ini ndikasazvidemba ndizvo zvinotaura Jehovha wehondo;

¹⁵saizvozvowo ndakafunga mazuva ano kuitira Jerusaremu zvakanaka uye neimba yaJudhawo; regai kutya.

¹⁶Hezvi zvinhu zvamunofanira kuita: Mumwe nomumwe ngaareve zvokwadi kunowokwake; tongai nezvokwadi norugare mumasuo enyu;

¹⁷kurege kuva nomumwe wenyu anofungira wokwake zvakaipa mumwoyo make; musada kupika kwenhema; nokuti zvinhu izvi zvose ndinozvivenga,” ndizvo zvinotaura Jehovha.

¹⁸Zvino shoko raJehovha wehondo rakasvika kwandiri, richiti,

¹⁹“Zvanzi naJehovha wehondo, ‘Kuzvinyima zvokudya nomwedzi wechina, nokuzvinyima zvokudya nomwedzi wechishanu, nokuzvinyima zvokudya nomwedzi wechinomwe, nokuzvinyima zvokudya nomwedzi wegumi, zvinofanira kuva kuimba yaJudha mufaro nokufarisisa, nemitambo inomufaro; saka idai zvokwadi norugare.’ ”

²⁰Zvanzi naJehovha wehondo, “Ndudzi dzavanhu dzichauyazve, navagere mumaguta mazhinji;

²¹vagere muguta rimwe vachaenda kune rimwe, vachiti, ‘Handei, tichimbidzike kundokumbira nyasha kuna Jehovha, tindotsvaka Jehovha wehondo; neni ndichaendawo.’

²²Zvirokwazvo, ndudzi zhinji dzavanhu namarudzi anesimba achauya kuzotsvaka Jehovha wehondo paJerusaremu, nokukumbira nyasha kuna Jehovha.

²³Zvanzi naJehovha wehondo, ‘Namazuva iwayo varume vane gumi pandimi dzose dzendudzi dzavanhu vachabata nguo yomunhu ari muJudha,’ vachiti, ‘Tichaenda newe, nokuti takanzwa kuti Mwari anemi.’ ”