Read Shona Union Version 2002 MATEU 1 Bible Online

MATEU 1 - Shona Union Version 2002 bible

MATEU 1

¹Mazita amadzitateguru aJesu Kristu, mwanakomana waDhavhidhi, mwanakomana waAbhurahamu:

²Abhurahamu akabereka Isaka; Isaka akabereka Jakobho; Jakobho akabereka Judha navanun'una vake;

³Judha akabereka Faresi naZara nomukadzi wake Tamari; Faresi akabereka Esiromi; Esiromi akabereka Arami;

⁴Arami akabereka Aminadhabhu; Aminadhabhu akabereka Nasoni; Nasoni akabereka Saremoni;

⁵Saremoni akabereka Bhoazi kumukadzi wake Rahabhi; Bhoazi akabereka Obhedhi nomukadzi wake Rute; Obhedhi akabereka Jesi;

⁶Jesi akabereka mambo Dhavhidhi. Dhavhidhi akabereka Soromoni nomukadzi waUriya;

⁷Soromoni akabereka Robhoami; Robhoami akabereka Abhia; Abhia akabereka Asafa;

⁸Asafa akabereka Josafati; Josafati akabereka Joramu; Joramu akabereka Ozia;

⁹Ozia akabereka Jotamu; Jotamu akabereka Ahazi; Ahazi akabereka Ezekia;

¹⁰Ezekia akabereka Manase; Manase akabereka Amoni; Amoni akabereka Josia;

¹¹Josia akabereka Jekonia navanun'una vake nenguva yokutapwa kwavo Bhabhironi.

¹²Shure kwokutapwa kwavo Bhabhironi Jekonia akabereka Saratieri; Saratieri akabereka Zerubhabheri;

¹³Zerubhabheri akabereka Abhiudhi; Abhiudhi akabereka Eriakimi; Eriakimi akabereka Azori;

¹⁴Azori akabereka Sadhoki; Sadhoki akabereka Akimi; Akimi akabereka Eriudhi;

¹⁵Eriudhi akabereka Ereazari; Ereazari akabereka Matani; Matani akabereka Jakobho;

¹⁶Jakobho akabereka Josefa, murume waMaria, iye akabereka Jesu, anonzi Kristu.

¹⁷Naizvozvo zvizvarwa zvose kubva kuna Abhurahamu kusvikira kuna Dhavhidhi zvaiva zvizvarwa gumi nezvina; kubva kuna Dhavhidhi kusvikira pakutapwa Bhabhironi zvizvarwa zvine gumi nezvina; kubva pakutapwa Bhabhironi kusvikira kuna Jesu Kristu zvizvarwa zvine gumi nezvina.

¹⁸Kuberekwa kwaJesu Kristu kwaiva kudai: Maria, mai vake, akati akaroorwa naJosefa, vasati vasangana, akaonekwa ava napamuviri naMweya Mutsvene.

¹⁹Zvino Josefa, murume wake, zvaakanga ari munhu akarurama, asingadi kumunyadzisa, akafunga kumuramba chinyararire.

²⁰Zvino akati acharangarira izvozvo, tarira, mutumwa waIshe akazviratidza kwaari pakurota, akati, “Josefa, mwanakomana waDhavhidhi, usatya kutora Maria, mukadzi wako; nokuti chakaumbwa mukati make ndechaMweya Mutsvene.

²¹Iye achazvara mwanakomana, agomutumidza zita rinonzi Jesu; nokuti ndiye achaponesa vanhu vake pazvivi zvavo.”

²²Izvozvo zvose zvakaitwa kuti zviitike zvakarehwa naIshe, nomuromo womuporofita, achiti,

²³“Tarira, mhandara ichava nepamuviri, ichazvara mwanakomana, vachamutumidza zita rinonzi Emanueri;” ndokuti, “Kana zvichishandurwa, Mwari anesu.”

²⁴Zvino Josefa akamuka pahope dzake akaita sezvaakarairwa nomutumwa waIshe, akatora mukadzi wake;

²⁵akasamuziva kusvikira azvara mwanakomana wake wedangwe, ndokumutumidza zita rinonzi Jesu.