Read Shona Union Version 2002 MATEU 14 Bible Online

MATEU 14 - Shona Union Version 2002 bible

MATEU 14

¹Nenguva iyo ishe Herodhi, akanzwa mukurumbira waJesu,

²akati kuvaranda vake, “Uyu ndiJohani Mubhabhatidzi; akamuka kuvakafa, saka masimba awa anobata maari.”

³Nokuti Herodhi akanga abata Johani, akamusunga, akamuisa mutorongo, nokuda kwaHerodhiasi, mukadzi waFiripi, munun'una wake.

⁴Nokuti Johani akati kwaari, “Hauna kutenderwa kuti uve naye.”

⁵Zvino akanga achida kumuuraya, asi akatya vanhu vazhinji, nokuti vaimuti muporofita.

⁶Asi zuva rokupemberera kuberekwa kwaHerodhi rakati rasvika, mukunda waHerodhiasi akatamba pamberi pavo, akafadza Herodhi.

⁷Naizvozvo wakamupikira nemhiko kuti, “Ndichamupa chipi nechipi chaanenge achakumbira.”

⁸Zvino iye, akati arayirwa namai vake, akati, “Ndipei pano mundiro musoro waJohani Mubhabhatidzi.”

⁹Mambo akazvidya mwoyo, asi nokuda kwokupika kwake, uye nokuda kwavakanga vagere pakudya, akaraira kuti apiwe.

¹⁰Akatuma vanhu kundogura musoro waJohani mutorongo.

¹¹Vakauya nomusoro wake uri mundiro, musikana akaupiwa; iye akaenda nawo kunamai vake.

¹²Vadzidzi vake vakauya vakatora chitunha chake, vakachiviga; ndokuenda kundoudza Jesu.

¹³Jesu akati azvinzwa, akabvapo negwa, akaenda kurenje ari oga. Zvino vanhu vachizvinzwa, vakabva kumaguta, vakamutevera netsoka.

¹⁴Zvino akati achibuda muigwa, akaona vanhu vazhinji-zhinji, akavanzwira tsitsi, akaporesa varwere vavo.

¹⁵Zvino ava madekwana, vadzidzi vakauya kwaari, vakati, “Pano irenje, zuva roda kuvira, endesai vanhu vazhinji, vaende kumisha, vandozvitengera zvokudya.”

¹⁶Asi Jesu akati kwavari, “Havafaniri havo kuenda; imi muvape zvavangadya.”

¹⁷Vakati kwaari, “Hatina chinhu pano, asi zvingwa zvishanu bedzi nehove mbiri.”

¹⁸Iye akati, “Uyai nazvo kuno kwandiri.”

¹⁹Akaraira vanhu vazhinji kuti vagare pasi pauswa, akatora zvingwa zvishanu nehove mbiri, ndokutarira kudenga, akavonga, akamedura zvingwa, ndokupa vadzidzi vake, vadzidzi vakapa vanhu vazhinji.

²⁰Vakadya vose, vakaguta; vakaunganidza zvimedu zvakasara, matengu ane gumi namaviri azere.

²¹Vakanga vadya vaiva varume vane zviuru zvishanu, vakadzi navana vasingaverengwi.

²²Pakarepo wakagombedzera vadzidzi vake kuti vapinde muigwa, vamutungamirire mhiri, iye ndokusara kuendesa vanhu vazhinji.

²³Zvino akati aendesa vanhu vazhinji, akakwira mugomo ari oga kundonyengetera; ava madekwana akanga aripo ari oga.

²⁴Asi igwa zvino rakanga rava pakati pegungwa, richitambudzika namafungu, nokuti mhepo yakanga ichivadzivisa.

²⁵Nenguva yechina yousiku akauya kwavari, achifamba pamusoro pegungwa.

²⁶Zvino vadzidzi vakati vachimuona achifamba pamusoro pegungwa, vakavhunduka, vachiti, “Madzimudzangara,” vakaridza mhere nokutya.

²⁷Pakarepo Jesu akataura navo, akati, “Tsungai mwoyo ndini, musatya.”

²⁸Zvino Petirosi akamupindura, akati, “Ishe, kana murimi, ndiraire kuti ndiuye kwamuri pamusoro pemvura.”

²⁹Iye akati, “Uya!” Petirosi akaburuka muigwa, akafamba pamusoro pemvura, akaenda kuna Jesu.

³⁰Asi akati achiona mhepo ine simba, akatya; zvino akati otanga kunyura, akadanidzira achiti, “Ishe, ndiponesei!”

³¹Pakarepo Jesu akatambanudza ruoko rwake, akamubata, akati kwaari, “Iwe unokutenda kuduku, wakona kutenda neiko?”

³²Vakati vapinda muigwa, mhepo ikanyarara.

³³Ipapo vakanga vari muigwa vakamupfugamira, vachiti, “Zvirokwazvo, ndimi Mwanakomana waMwari!”

³⁴Vakati vayambukira mhiri, vakasvika panyika yeGenesareti.

³⁵Varume venzvimbo iyo vakamuziva, vakatuma shoko panyika yose iyo yakapoteredza; vakauya kwaari navose vairwara;

³⁶vakakumbira zvikuru kwaari kuti vabate chete mupendero wenguo yake; vose vakabata vakaporeswa.