Read Shona Union Version 2002 MATEU 15 Bible Online

MATEU 15 - Shona Union Version 2002 bible

MATEU 15

¹Zvino vaFarisi navanyori vakauya kuna Jesu vachibva Jerusaremu, vakati,

²“Vadzidzi venyu vanodarikireiko tsika dzavakuru, nokuti havashambe maoko kana vachidya zvokudya?”

³Akapindura, akati kwavari, “Nemiwo munodarikireiko murayiro waMwari nokuda kwetsika dzenyu?

⁴“Nokuti Mwari wakati, ‘Kudza baba vako namai vako;’ uye, ‘Anotuka baba kana mai, ngaafe norufu.’

⁵Asi imi munoti, ani naani anoti kuna baba vake kana mai vake, ‘Chinhu chipi nechipi chamaiti munobatsirwa nacho kwandiri, chava chipo kuna Mwari,’

⁶haachakudzi baba vake kana mai vake, asi haane mhosva. Makatorera murayiro waMwari simba netsika dzenyu.

⁷Imi vanyengeri, Isaya akaporofita kwazvo pamusoro penyu, achiti,

⁸‘Vanhu ava vanondikudza nemiromo yavo, Asi mwoyo yavo iri kure neni.

⁹Asi vanondinamata pasina, Vachidzidzisa dzidziso nemirairo yavanhu.’ ”

¹⁰Zvino akadana vanhu vazhinji kwaari, akati kwavari, “Teererai, munzwisise.

¹¹Izvo zvinopinda mumuromo, hazvisvibisi munhu, asi zvinobuda mumuromo, ndizvo zvinosvibisa munhu.”

¹²Zvino vadzidzi vakauya kwaari, vakati, “Munoziva kuti vaFarisi vakagumburwa vachinzwa shoko iri here?”

¹³Akapindura, akati, “Muti mumwe nomumwe usina kusimwa naBaba vangu vari kudenga uchadzurwa.”

¹⁴“Varegei; mapofu anotungamirira mapofu. Zvino kana bofu richitungamirira bofu, achawira mugomba ose ari maviri.”

¹⁵Petirosi akapindura, akati kwaari, “Tidudzireiwo mufananidzo uyu.”

¹⁶Iye akati, “Nazvino nemiwo muchigere kunzwisisa here?

¹⁷Hamunzwisisi here kuti zvose zvinopinda mumuromo, zvinoenda mudumbu, zvikazoraswa kunze?

¹⁸Asi zvinobuda mumuromo, zvinobva mumwoyo; ndizvo zvinosvibisa munhu.

¹⁹Nokuti mumwoyo munobuda mifungo yakaipa, nokuuraya, noupfeve, noupombwe, nokuba, nokupupura nhema, nokushonha Mwari;

²⁰ndizvo zvinosvibisa munhu; asi kudya namaoko asati ashamba, hazvisvibisi munhu.”

²¹Zvino Jesu akabvapo, akaenda kumativi enyika yeTire neSidhoni.

²²Zvino, tarira, mukadzi muKanani akabva kunyika iyo, akadana, achiti, “Ndinzwirei ngoni, Ishe, Mwanakomana waDhavhidhi; mwanasikana wangu akabatwa kwazvo nomweya wakaipa.”

²³Asi haana kumupindura neshoko rimwe. Ipapo vadzidzi vake vakauya vakakumbira kwaari, vachiti, “Mumuendesei, nokuti anodanidzira shure kwedu.”

²⁴Asi akapindura, akati, “Ndakangotumirwa kumakwai akarashika eimba yavaIsiraeri.”

²⁵Zvino akauya, akamupfugamira, akati, “Ishe, dondibatsirai henyu.”

²⁶Akapindura, akati, “Hazvina kunaka kutora chingwa chavana, ndokuchikandira mbwanana.”

²⁷Akati, “Hongu, Ishe, kunyange nembwananawo dzinodya zvimedu zvinodonha patafura ravatenzi vadzo.”

²⁸Zvino Jesu akapindura, akati kwaari, “Haiwa, mai, kutenda kwako kukuru, zvaunoda ngazviitwe.” Mwanasikana wake akapora kubva panguva iyo.

²⁹Jesu akati achibva ipapo, akaenda achitevedza gungwa reGariria, akakwira mugomo, akagarapo pasi.

³⁰Zvino vanhu vazhinji vakauya kwaari navanokamhina, nezvirema, namapofu, nembeveve, navamwe vazhinji, vakavaisa pamberi paJesu; akavaporesa.

³¹Naizvozvo vanhu vazhinji vakashamiswa vachiona mbeveve dzichitaura, nezvirema zvapora, navanokamhina vachifamba, namapofu achiona; vakarumbidza Mwari wavaIsiraeri.

³²Zvino Jesu akadanira vadzidzi vake kwaari, akati, “Ndine tsitsi navanhu vazhinji ava, nokuti atova mazuva matatu avakagara neni vasina zvavangadya; handidi kuvaendesa vane nzara, zvimwe vangaziya panzira.”

³³Vadzidzi vakati kwaari, “Tichawanepiko murenje zvingwa zvakawanda zvakadaro, kuti tigutise vanhu vazhinji vakadai?”

³⁴Jesu akati kwavari, “Mune zvingwa zvinganiko?” Vakati, “Zvinomwe, nehove duku shomanana.”

³⁵Zvino akaraira vanhu vazhinji kuti vagare pasi;

³⁶akatora zvingwa zvinomwe nehove, akavonga, akazvimedura, ndokupa vadzidzi vake, vadzidzi vakapa vanhu vazhinji.

³⁷Vakadya vose, vakaguta; vakanonga zvimedu zvakasara, vakawana matengu manomwe azere.

³⁸Vakadya vakanga vari varume vane zviuru zvina, vakadzi navana vasingaverengwi.

³⁹Zvino akati aendesa vanhu vazhinji, akapinda muigwa, akasvika munyika yeMagadhani.