Read Shona Union Version 2002 MATEU 17 Bible Online

MATEU 17 - Shona Union Version 2002 bible

MATEU 17

¹Mazuva matanhatu akati apfuura, Jesu akatora Petirosi, naJakobho, naJohani munun'una wake, akaenda navo mugomo refu vari voga.

²Akasanduka pamberi pavo; chiso chake chikapenya sezuva, nguo dzake dzikachena sechiedza.

³Pakarepo Mosesi naEria vakaonekwa navo, vachitaurirana naye.

⁴Zvino Petirosi akapindura, akati kuna Jesu, “Ishe, zvakanaka zvatiri pano; kana muchida, ndichavaka matumba matatu pano, rimwe renyu, rimwe raMosesi, rimwe raEria.”

⁵Akati achataura navo, tarira, gore rinobwinya rikavafukidza; izwi rikabva mugore, richiti, “Uyu Mwanakomana wangu mudiwa, wandinofarira, mumunzwei.”

⁶Vadzidzi vakati vachizvinzwa, vakawira pasi nezviso zvavo, vakatya zvikuru.

⁷Jesu akaswedera, akavabata, akati, “Simukai, musatya.”

⁸Vakati vachitarira, havana kuzoona munhu, asi Jesu bedzi.

⁹Zvino vakati vachiburuka mugomo, Jesu akavaraira, akati, “Musaudza munhu zvamaratidzwa, kusvikira Mwanakomana womunhu amuka kuvakafa.”

¹⁰Vadzidzi vakamubvunza, vachiti, “Vanyori vanotaurireiko, vachiti, Eria anofanira kutanga kuuya?”

¹¹Akapindura, akati, “Eria achauya hake, avandudze zvinhu zvose.”

¹²Asi ndinoti kwamuri, “Eria akatosvika, asi havana kumuziva; asi vakamuitira pavakada napo. Saizvozvowo Mwanakomana womunhu achabva otambudzwa navo.”

¹³Zvino vadzidzi vakanzwisisa kuti akavaudza zvaJohani Mubhabhatidzi.

¹⁴Vakati vasvika kuvanhu vazhinji, mumwe munhu akauya kwaari, akamupfugamira, akati,

¹⁵“Ishe, donzwirai mwanakomana wangu ngoni, nokuti ane tsviyo, anotambudzika kwazvo. Nokuti kazhinji anowira mumoto, kazhinji mumvura.

¹⁶Ndakauya naye kuvadzidzi venyu, vakasagona kumuporesa.”

¹⁷Jesu akapindura, akati, “Haiwa! Rudzi rusingatendi, rwakatsauka, ndichagara nemi kusvikira riniko? Ndichakuitirai mwoyo murefu kusvikira riniko? Uyai naye pano kwandiri.”

¹⁸Zvino Jesu akamuraira, mweya wakaipa ukabuda kwaari, mukomana akapora kubva panguva iyo.

¹⁹Zvino vadzidzi vakauya kuna Jesu vari voga, vakati, “Ko isu takanga tisingagoni neiko kuubudisa?”

²⁰Akati kwavari, “Nemhaka yokutenda kwenyu kuduku, nokuti zvirokwazvo ndinoti kwamuri, kana muno kutenda kwakaita setsanga yemasitadhi, mungati kugomo iri, ‘Ibva pano, enda koko!’ Ringaenda hakuna chinhu chingakukundai.” [

²¹Asi rudzi urwu runongobva chete nokunyengetera, nokuzvinyima zvokudya.]

²²Zvino vachafamba muGariria, Jesu akati kwavari, “Mwanakomana womunhu achabva oiswa mumaoko avanhu;

²³vachamuuraya, asi nezuva retatu achamutswazve.” Vakafa neshungu kwazvo.

²⁴Vakati vachisvika Kapenaume, vanhu vaigamuchira muripo wetemberi vakauya kuna Petirosi, vakati, “Mudzidzisi wenyu haateri mutero wetemberi here?”

²⁵Akati, “Hongu.” Zvino akati achipinda mumba, Jesu akatanga kutaura kwaari, achiti, “Simoni, unofungeiko? Madzimambo enyika anotora muripo nomutero kunavanaaniko? Kuvana vavo kana kuvatorwa?”

²⁶Akati, “Kuvatorwa.” Jesu akati kwavari, “Saka vana vakasununguka.

²⁷“Asi, kuti tirege kuvagumbusa, enda kugungwa, ukande chiredzo, ubate hove inotanga kudyira; kana washamisa muromo wayo, uchawana sitaterimo; uritore, uvape kuripira ini newe.”