Read Shona Union Version 2002 MATEU 22 Bible Online

MATEU 22 - Shona Union Version 2002 bible

MATEU 22

¹Zvino Jesu akapindura, akataurazve navo nemifananidzo, akati,

²“Ushe hwedenga hungafananidzwa nomumwe mambo, wakaitira mwanakomana wake mutambo wokuchata;

³akatuma varanda vake kundodana avo vakanga vakokerwa kumutambo wokuchata; vakaramba kuuya.

⁴Akatumazve vamwe varanda, akati, ‘Udzai vakakokwa, muti, tarirai, ndagadzira mabiko angu; nzombe dzangu nezvakakora zvangu zvabayiwa, zvinhu zvose zvagadzirwa; uyai kumutambo wokuchata.’

⁵Asi havana kurangarira, vakaenda, mumwe kumunda wake, mumwe kukutengesa kwake;

⁶vamwe vakabata varanda vake, vakavaitira zvakaipa, vakavauraya.

⁷Zvino mambo akatsamwa, akatuma hondo dzake, akaparadza vaya vakauraya, varanda vake akapisa guta ravo.

⁸“Zvino akati kuvaranda vake, ‘Mutambo wokuchata wakagadzirwa, asi vakanga vakokerwa vakanga vasina kufanirwa.

⁹Naizvozvo, endai kumharadzano dzenzira, mukokere kumutambo vose vamuNowana.’

¹⁰Varanda ivavo vakaenda kunzira, vakaunganidza vose vavakawana, vakaipa navakanaka; imba yomuchato ikazara navagere pakudya.

¹¹“Zvino mambo akati achipinda kuzoona vagere pakudya, akaona munhu asina kupfeka nguo yomuchato;

¹²akati kwaari, ‘Shamwari, wapinda pano seiko, usina nguo yomuchato?’ ” Akanyarara.

¹³Zvino mambo akati kuvaranda, “Musungei makumbo namaoko, mumukandirei kunze murima; apo pachava nokuchema nokugeda-geda kwameno.”

¹⁴“Nokuti vazhinji vakadanwa, asi vakasanangurwa vashoma.”

¹⁵Zvino vaFarisi vakaenda kundorangana kuti vangamubata sei pakutaura kwake.

¹⁶Vakatuma kwaari vadzidzi vavo navaHerodhi, vachiti, “Mudzidzisi, tinoziva kuti ndimi wechokwadi, munodzidzisa nzira yaMwari nechokwadi, musingarangariri zvinoonekwa zvomunhu; nokuti hamutariri zviri kunze kwomunhu.

¹⁷Zvino tiudzei, munofungeiko? Munhu anotenderwa kutera mutero waKesari here, kana kwete?”

¹⁸Asi Jesu akaziva kuipa kwavo, akati, “Munondiedzereiko, imi vanyengeri?

¹⁹Ndiratidzei mari yomutero.” Vakauya kwaari nedhenari.

²⁰Zvino akati kwavari, “Mufananidzo uyu norunyoro urwu ndezvaani?”

²¹Vakati kwaari, “ZvaKesari.” Akati kwavari, “Naizvozvo, ipai Kesari zvaKesari, naMwari zvaMwari.”

²²Vakati vachinzwa izvozvo, vakashamiswa, vakamusiya, vakaenda.

²³Nezuva iro vaSadhusi vakasvika kwaari, ivo vanoti hakuna kumuka kwavakafa, vakamubvunza,

²⁴vachiti, “Mudzidzisi, Mosesi akati, kana munhu akafa asina vana, munun'una wake ngaawane mukadzi wake, agomutsira mukoma wake vana.

²⁵Kwatiri kwakanga kuna vanakomana vomunhu mumwe vanomwe; wedangwe akawana mukadzi, akafa asina vana, akasiyira munun'una wake mukadzi wake;

²⁶nokudarowo wechipiri, nowechitatu, kusvikira kuno wechinomwe.

²⁷Shure kwavose mukadzi akafawo.

²⁸Zvino pakumuka kwavakafa, achava mukadzi waaniko wavanomwe ava, nokuti vose vaiva naye.”

²⁹Jesu akapindura, akati kwavari, “Marasika, nokusaziva Magwaro, kana simba raMwari.

³⁰Nokuti pakumuka kwavakafa havawani, kana kuwaniswa; asi vakaita savatumwa kudenga.

³¹Asi kana kuri kumuka kwavakafa, hamuna kurava here zvamakaudzwa naMwari, paakati,

³²‘Ini ndiri Mwari waAbhurahamu, naMwari waIsaka, naMwari waJakobho?’ Haasi Mwari wavakafa, asi wavapenyu.”

³³Vanhu vazhinji vachinzwa izvozvo, vakashamiswa nokudzidzisa kwake.

³⁴VaFarisi vakati vachinzwa kuti wapwisa vaSadhusi, vakaungana pamwechete.

³⁵Mumwe wavo, mududziri womurayiro, akamubvunza, achimuedza, akati,

³⁶“Mudzidzisi, murayiro mukuru pamirairo ndoupiko?”

³⁷Akati kwaari, “Ida Ishe, Mwari wako, nomwoyo wako wose, nomweya wako wose, nokufunga kwako kwose.

³⁸Ndiwo murayiro mukuru nowokutanga.

³⁹Wechipiri unofanana nawo, ndiwoyu, ‘Ida wokwako, sezvaunozvida iwe.’

⁴⁰Murayiro wose navaporofita zvakabatanidzwa pamirairo iyi miviri.”

⁴¹Zvino vaFarisi vachakaungana, Jesu akavabvunza,

⁴²akati, “Munofungeiko pamusoro paKristu? Mwanakomana waaniko?” Vakati kwaari, “WaDhavhidhi.”

⁴³Akati kwavari, “Dhavhidhi akagomutumidza seiko noMweya, Ishe wake, achiti,

⁴⁴‘Ishe akati kuna Ishe wangu, Gara kurudyi rwangu, Kusvikira ndaisa vavengi vako pasi petsoka dzako?’

⁴⁵Zvino, kana Dhavhidhi achimutumidza Ishe, angagova mwanakomana wake seiko?”

⁴⁶Kwakanga kusina munhu akagona kumupindura shoko, uye kwakanga kusina munhu akatsunga kumubvunza chinhu pazuva iro.