Read Shona Union Version 2002 MATEU 23 Bible Online

MATEU 23 - Shona Union Version 2002 bible

MATEU 23

¹Zvino Jesu akataura kuvanhu vazhinji navadzidzi vake,

²akati, “Vanyori navaFarisi vagere pachigaro chaMosesi;

³saka zvose zvavanokuudzai, muzviite nokuzvichengeta, asi musatevera mabasa avo; nokuti vanotaura, asi havaiti.

⁴Vanosunga mitoro inorema, inotambudza kutakura, vachiisa pamafudzi avanhu, asi ivo vamene havadi kuibata nomunwe wavo.

⁵Asi mabasa avo ose vanoaita kuti vaonekwe navanhu; nokuti vanofarisa mafirakitera avo, vanokurisa mipeto yenguo dzavo,

⁶vanofarira zvigaro zvapamberi pamitambo, nezvigaro zvapamberi mumasinagoge,

⁷nokukwaziswa padare, nokunzi, ‘Rabhi’ navanhu.

⁸Asi imi musanzi, ‘Rabhi;’ nokuti mudzidzisi wenyu ndomumwe, imi mose muri hama.

⁹Musati munhu ari panyika baba venyu, nokuti mumwechete ndiBaba venyu, ivo vari kudenga.

¹⁰Musati ‘Vatenzi,’ nokuti mumwechete, nditenzi wenyu, iye Kristu.

¹¹Asi mukuru pakati penyu ngaave muranda wenyu.

¹²Ani naani anozvikudza achaninipiswa, naani naani anozvininipisa, achakudzwa.

¹³“Mune nhamo, imi vanyori navaFarisi, vanyengeri! Nokuti munopfigira vanhu ushe hwedenga; nokuti imi hamupindi mumene, naivo, vopinda, hamuvatenderi kupinda. [

¹⁴Mune nhamo, imi vanyori navaFarisi, vanyengeri! Nokuti munoparadza dzimba dzechirikadzi muchiita minyengetero mirefu yemanomano; naizvozvo muchatongerwa zvakaipa nokupfuurisa.]

¹⁵“Mune nhamo, imi vanyori navaFarisi, vanyengeri! Nokuti munofamba pagungwa napanyika kuzotapa mudzidzi mumwe; kana awanikwa, munomuita mwanakomana weGehena kukunda imi kaviri.

¹⁶“Mune nhamo, imi vatungamiriri vakapofumara, munoti, ‘Ani naani anopika netemberi, hazvina hazvo; asi ani naani anopika nendarama yetemberi, ndiye anemhosva.’

¹⁷Imi mapenzi namapofu! Chikuru ndechipiko, ndarama kana temberi, inoita ndarama ive tsvene?

¹⁸Munotizve, ‘Ani naani anopika nearitari, hazvina hazvo; asi ani naani anopika nechipo chiri pamusoro payo, ndiye ane mhosva.’

¹⁹Imi mapenzi namapofu! Chikuru ndechipiko, chipo kana aritari, inoita chipo chive chitsvene?

²⁰“Naizvozvo, anopika nearitari, anopika nayo, nezvose zviri pamusoro payo.

²¹“Neanopika netemberi, anopika nayoo, neanogara mairi.

²²Neanopika nedenga, anopika nechigaro choushe chaMwari, neanogara pamusoro pacho.

²³“Mune nhamo, imi vanyori navaFarisi, vanyengeri! Nokuti munopa chegumi chemindi, neanisi, nekumini, muchirega zvinhu zvikuru zvomurayiro, zvinoti kururamisira mhaka, nengoni, nokutendeka; maifanira kuzviita izvi, nokusarega kuita izvozvo.

²⁴Imi vatungamiri vakapofumara, munomimina runyunyu, muchimedza ngamera.

²⁵“Mune nhamo, imi vanyori navaFarisi, vanyengeri! Nokuti munonatsa kunze kwomukombe nendiro, asi mukati muzere nekukara nokusazvidzora.

²⁶“Iwe muFarisi wakapofumara, tanga kunatsa mukati momukombe, nendiro, kuti kunze kwazvo kugochenawo.

²⁷“Mune nhamo, imi vanyori navaFarisi, vanyengeri! Nokuti makafanana namarinda akacheneswa, anoonekwa saakanaka kunze kwawo, asi mukati muzere namapfupa avakafa netsvina yose.

²⁸Saizvozvo nemiwo munoonekwa navanhu kunze kwenyu makaita samakarurama, asi mukati muzere nokunyengera nokuipa.

²⁹“Mune nhamo, imi vanyori navaFarisi vanyengeri! Nokuti munovaka marinda avaporofita, nokushongedza marinda avakarurama,

³⁰muchiti, dai taivapo pamazuva amateteguru edu, tingadai tisina kuvabatsira kuuraya vaporofita.

³¹Saka munozvipupurira kuti muri vanakomana vavakauraya vaporofita.

³²Zvino chizadzisai gamha rakasiyiwa namateteguru enyu.

³³Imi nyoka, imi vana venyoka! Muchatiza seiko kutonga kweGehena?

³⁴Saka, tarirai, ndinotumira kwamuri vaporofita, navakachenjera, navanyori; muchauraya vamwe vavo, nokuvarovera pamuchinjikwa; mucharovesa vamwe vavo mumasinagoge enyu, nokuvadzingirira mumaguta ose.

³⁵Kuti ropa rose ravakarurama, rakateurirwa panyika, riuye pamusoro penyu, kubva paropa raAbheri akanga akarurama, kusvikira paropa raZekariya, mwanakomana waBharakia, wamakauraya pakati petemberi nearitari.

³⁶Zvirokwazvo ndinoti kwamuri, izvi zvose zvichauya pamusoro porudzi urwu.

³⁷“Jerusaremu! Jerusaremu! Iwe unouraya vaporofita, nokutaka namabwe avo vakatumwa kwauri! Ndakanga ndichida kazhinji sei kuunganidza vana vako, sembambo inounganidza hukwana dzayo, munyasi mamapapiro ayo, mukaramba!

³⁸Tarirai, masiyirwa imba yenyu rava dongo.

³⁹Nokuti ndinoti kwamuri, kubva zvino hamuchazondioni, kusvikira muchiti, ‘Ngaarumbidzwe iye anouya nezita raIshe.’ ”