Read Shona Union Version 2002 MATEU 24 Bible Online

MATEU 24 - Shona Union Version 2002 bible

MATEU 24

¹Zvino Jesu akabuda mutemberi, akati oenda, vadzidzi vake vakauya kwaari kuzomuratidza dzimba dzetemberi.

²Akapindura, akati kwavari, “Munoona zvinhu izvi zvose here? Zvirokwazvo ndinoti kwamuri, hakungaregwi dombo pamusoro pedombo, risingazowisirwi pasi.”

³Akati agara pagomo reMiorivhi, vadzidzi vake vakauya kwaari, vari voga, vakati, “Tiudzei, kuti izvozvi zvichagova riniko? Nechiratidzo chokuuya kwenyu nechokuguma kwenyika chichava chipiko?”

⁴Jesu akapindura, akati kwavari, “Chenjerai kuti murege kutsauswa nomunhu.

⁵Nokuti vazhinji vachauya nezita rangu, vachiti, ‘Ndini Kristu;’ vachitsausa vazhinji.

⁶Muchanzwa zvokurwa nenyaya yokurwa; chenjerai, musavhunduka, nokuti izvozvi zvose zvinofanira kumboitwa, asi kuguma kuchigere kusvika.

⁷Nokuti rudzi ruchamukira rudzi, noushe huchamukira ushe; nenzara dzichavapo, nehosha, nokudengenyeka kwenyika kunzvimbo zhinji.

⁸“Asi zvinhu izvozvi zvichava kutanga kwenhamo.

⁹“Zvino vachakuisai kumadambudziko, vachakuurayai, muchavengwa namarudzi ose nokuda kwezita rangu.

¹⁰Vazhinji vachagumburwa, vachaisana kuvatongi nokuvengana.

¹¹“Vaporofita vazhinji venhema vachamuka, vachitsausa vazhinji.

¹²Rudo rwavazhinji ruchatonhora, nokuti kusarurama kuchawanda.

¹³Asi anotsungirira kusvikira pakuguma, achaponeswa.

¹⁴Vhangeri iyi youshe ichaparidzirwa munyika dzose, chive chapupu kumarudzi ose; ipapo kuguma kuchasvika.

¹⁵“Naizvozvo kana muchiona nyangadzi yokuparadza, yakarehwa nomuporofita Dhaniere, imire panzvimbo tsvene (anorava ngaacherekedze);

¹⁶zvino vari muJudhea ngavatizire kumakomo;

¹⁷ari pamusoro pedenga reimba, ngaarege kuburuka kuzotora zviri mumba make;

¹⁸naari mumunda, ngaarege kudzokera shure kuzotora nguo yake.

¹⁹“Vachava nenhamo vane pamuviri navanoyamwisa namazuva iwayo;

²⁰Nyengeterai kuti kutiza kwenyu kurege kuva panguva yechando kana neSabata.

²¹Nokuti nenguva iyo kuchavapo kutambudzika kukuru, kusati kwakambovapo kwakadaro, kubva pakutanga kwenyika kusvikira zvino, uye hakuchazovipo.

²²“Dai mazuva iwayo asaitapudzwa, hakuna munhu airarama; asi nokuda kwavakasanangurwa mazuva iwayo achatapudzwa.

²³“Zvino kana munhu akati kwamuri, ‘Tarirai, Kristu ari pano’, kana, ‘Apo’ regai kutenda.

²⁴Nokuti vachamuka vanaKristu venhema, navaporofita venhema, vacharatidza zviratidzo zvikuru nezvinoshamisa, kuti kana zvichibvira, vatsause navakasanangurwawo.

²⁵“Tarirai, ndagara ndakuudzai.

²⁶Zvino, kana vakati kwamuri, ‘Tarirai, ari kurenje,’ regai kubuda; ‘Tarirai, ari mudzimba dzomukati,’ regai kutenda.

²⁷“Nokuti semheni inobva mabvazuva, ichipenyeresa kumavirira, ndizvo zvichaita kuuya kwoMwanakomana womunhu.

²⁸Apo pane chitunha, ndipo pachaunganira magora.

²⁹“Pakarepo, shure kwokutambudzika kwamazuva iwayo, zuva richasviba, mwedzi hauchazobwinyi, nyeredzi dzichawa kudenga, namasimba okudenga achazununguswa.

³⁰Ipapo chiratidzo choMwanakomana womunhu chichaonekwa kudenga; zvino marudzi ose enyika achachema, achiona Mwanakomana womunhu achiuya pamusoro pamakore okudenga nesimba nokubwinya kukuru.

³¹“Achatuma vatumwa vake nehwamanda huru, vachaunganidza vasanangurwa vake kunobva mhepo ina, kubva kurutivi rumwe rwedenga kusvikira kuno rumwe rutivi.

³²“Dzidzai pamuonde mufananidzo uyu, kana davi rawo rava nyoro, mashizha achitunga, munoziva kuti zhizha rava pedyo.

³³Saizvozvowo, nemiwo, kana moona izvozvo zvose, zivai kuti ava pedyo asvika pamukova.

³⁴Zvirokwazvo ndinoti kwamuri, rudzi urwu harungatongopfuuri kusvikira izvozvi zvose zvaitika.

³⁵Denga nenyika zvichapfuura, asi mashoko angu haangatongopfuuri.

³⁶“Asi kana riri zuva iro nenguva iyo, hakuna anozviziva, kunyange vatumwa vokudenga, kunyange Mwanakomana, asi Baba voga.

³⁷Sapamazuva aNoa, ndizvo zvichaita kuuya kwoMwanakomana womunhu.

³⁸Nokuti sapamazuva iwayo, mvura zhinji isati yasvika, vaidya nokunwa, nokuwana, nokuwaniswa, kusvikira zuva Noa raakapinda naro muareka,

³⁹vasingazivi zvichavawira kusvikira mvura zhinji yauya, ikavaparadza vose; ndizvo zvichaita kuuya kwoMwanakomana womunhu.

⁴⁰Nenguva iyo vaviri vachava mumunda, mumwe achatorwa, mumwe akasiyiwa.

⁴¹Vakadzi vaviri vachakuya paguyo rimwe, mumwe uchatorwa, mumwe akasiyiwa.

⁴²Rindai naizvozvo, nokuti hamuzivi zuva, Ishe wenyu raanouya naro.

⁴³Asi zivai izvi, kuti dai saimba, aiziva nguva yokusvika kwembavha, angadai airinda, akasatendera kuti imba yake ipazwe.

⁴⁴Naizvozvo nemiwo, garai makazvigadzirira; nokuti Mwanakomana womunhu achauya nenguva yomusingamutariri.

⁴⁵Ndianiko muranda akatendeka, akangwara, akagadzwa nashe wake kuti ave mutariri weimba yake, kuti avape zvokudya nenguva yakafanira?

⁴⁶“Akaropafadzwa muranda uyo, anoti kana ishe wake achisvika, akamuwana achiita saizvozvo.

⁴⁷Zviro kwazvo ndinoti kwamuri, achamugadza kuti ave mutariri wezvose zvaanazvo.

⁴⁸Asi kana muranda uyo akaipa akataura mumwoyo make, achiti, ‘Ishe wangu anonoka;’

⁴⁹akatanga kurova vamwe varanda vanoshanda pamwechete naye, akadya, akanwa pamwechete navanoraradza,

⁵⁰ishe womuranda uyo achasvika nezuva raasingamutariri, nenguva yaasingazivi;

⁵¹akamurovesa kwazvo, akamupa mugove wake pamwechete navanyengeri; apo pachava nokuchema nokugeda-geda kwameno.