Read Shona Union Version 2002 MATEU 25 Bible Online

MATEU 25 - Shona Union Version 2002 bible

MATEU 25

¹“Zvino ushe hwedenga hungafananidzwa navasikana vane gumi, vakatora mwenje yavo, vakabuda kundochingamidza muwani.

²Vashanu vavo vakanga vasina hanya, vashanu vakanga vakachenjera.

³“Nokuti vasina hanya vakatora mwenje yawo, vakasatora mafuta.

⁴Asi vakachenjera vakatora mafuta mumidziyo yavo nemwenje yavo.

⁵Zvino, muwani akati anonoka, vakakotsira vose, vakavata.

⁶“Pakati pohusiku vakanzwa mheremhere, ‘Muwani auya! Budai mumuchingamidze!’

⁷Zvino vasikana vose vakamuka, vakagadzira mwenje yavo.

⁸Vasina hanya vakati kuna vakachenjera, ‘Tipeiwo mamwe mafuta enyu, nokuti mwenje yedu yodzima.’

⁹Asi vakachenjera vakapindura, vakati, ‘Kwete, zvimwe haangakwaniri isu nemi tose; endai henyu kuna vanotengesa, muzvitengere.’

¹⁰Vakati vachienda kundotenga, muwani ndokusvika; zvino, vakanga vakazvigadzira vakapinda naye pamutambo wemuchato, mukova ukapfigwa.

¹¹“Pashure vaya vamwe vasikana vakasvika, vakati, ‘Ishe, Ishe, tizarurireiwo!’

¹²“Akapindura, akati, ‘Zvirokwazvo, ndinoti kwamuri, handikuzivii imi.’ ”

¹³“Naizvozvo rindai, nokuti hamuzivi zuva kana nguva.

¹⁴“Nokuti zvakafanana nomunhu akaenda kune imwe nyika, akadana varanda vake, akavaronzera pfuma yake.

¹⁵Akapa mumwe matarenda mashanu, mumwe maviri, mumwe rimwe, mumwe nomumwe zvakakwanira simba rake; akaenda kune imwe nyika.

¹⁶Pakarepo iye, akapiwa matarenda mashanu, akaenda akaita mhindu nawo, akawana mamwe mashanu.

¹⁷Saizvozvowo, akapiwa maviri, akawana mamwe maviri.

¹⁸Asi akapiwa rimwe, akenda, akachera pasi, akaviga mari yaishe wake.

¹⁹“Nguva huru yakati yapfuura, ishe wavaranda ivavo akasvika, akagadzira mashoko navo.

²⁰Akanga apiwa matarenda mashanu, akati, ‘Ishe, makandipa matarenda mashanu, tarirai, ndawana mamwe matarenda mashanu.’

²¹Ishe wake akati kwaari, ‘Zvakanaka, muranda wakanaka, wakatendeka; wakanga wakatendeka pazvinhu zvishoma, ndichakuisa pamusoro pezvinhu zvizhinji; pinda mumufaro washe wako.’

²²Akanga apiwa matarenda maviri akauyawo, akati, ‘Ishe, makandipa matarenda maviri; tarirai, ndawana mamwe matarenda maviri.’

²³Ishe wake akati kwaari, ‘Zvakanaka, muranda akanaka, akatendeka; wakanga wakatendeka pazvinhu zvishoma, ndichakuisa pamusoro pezvinhu zvizhinji; pinda mumufaro washe wako.’

²⁴“Akanga apiwa tarenda rimwe, naiye akauyawo, akati, ‘Ishe, ndakanga ndichikuzivai imi, kuti muri munhu anehasha, munokohwa pamusati makadyara, munounganidza pamusati makakusha;

²⁵zvino ndakatya, ndikandoviga tarenda renyu pasi; hecho, chinhu chenyu!’

²⁶Ishe wake akapindura, akati kwaari, ‘Iwe, muranda akaipa, unousimbe, wakanga uchiziva kuti ndinokohwa pandisina kudyara, ndichiunganidza pandisina kukusha;

²⁷saka waifanira kuisa mari yangu kune vane bhangi, kuti pakusvika kwangu ndingadai ndapiwa zvangu zvawanda.

²⁸Naizvozvo mutorerei tarenda rake, mupe ana matarenda ane gumi.

²⁹Nokuti mumwe nomumwe unazvo, achapiwa, ave nezvizhinji; asi asina, achatorerwa nezvaanazvo.

³⁰Budisirai muranda pasina, murima nokunze; ipapo pachava nokuchema nokugeda-geda kwameno.’

³¹“Zvino kana Mwanakomana womunhu achiuya nokubwinya kwake, navatumwa vose vanaye, achagara pachigaro chake choushe chinobwinya;

³²namarudzi ose achaunganidzwa pamberi pake; achavaraura somufudzi anoraura makwai nembudzi.

³³Achaisa makwai kurudyi rwake, mbudzi kuruboshwe.

³⁴“Zvino Ishe achati kuna vari kurudyi, ‘Uyai imi, makaropafadzwa naBaba, mugare nhaka youshe hwakagadzirirwemi kubva pakuvamba kwenyika.

³⁵Nokuti ndakanga ndine nzara, mukandipa chokudya; ndakanga ndine nyota, mukandipa chokunwa; ndakanga ndiri mweni, mukandigamuchira;

³⁶ndakanga ndisina nguo, mukandipfekedza; ndakanga ndichirwara, mukandifambira; ndakanga ndiri mujeri, mukauya kwandiri.’

³⁷“Zvino vakarurama vachamupindura, vachiti, ‘Ishe, takakuonai riniko mune nzara, tikakupai chokudya? Kana mune nyota, tikakupai chokunwa?

³⁸Takakuonai riniko muri mweni, tikakugamuchirai? Kana musina nguo, tikakupfekedzai?

³⁹Takakuonai riniko muchirwara, kana muri mujeri, tikauya kwamuri?’

⁴⁰“Ishe achapindura, achiti, kwavari, ‘Zvirokwazvo, ndinoti kwamuri, pamakazviitira mumwe wavaduku vehama dzangu idzi, makazviitireni.’

⁴¹Zvino achati kuna vari kuruboshwe, ‘Ibvai kwandiri, imi manyombwa, muende kumoto usingaperi, wakagadzirirwa Dhiabhori navatumwa vake.

⁴²Nokuti ndakanga ndine nzara, mukasandipa chokudya; ndakanga ndine nyota, mukasandipa chokunwa;

⁴³ndakanga ndiri mweni, mukasandigamuchira; ndisina nguo, mukasandipfekedza; ndichirwara, nomujeri, mukasandifambira.’

⁴⁴Zvino naivava vachapindura, vachiti, ‘Ishe, takakuonai riniko mune nzara, kana mune nyota, kana muri mweni, kana musina nguo, kana muchirwara, kana muri mutorongo, tikasakushumirai?’

⁴⁵Zvino achavapindura, achiti, ‘Zvirokwazvo, ndinoti kwamuri, pamusati makazviitira mumwe wavaduku ava, hamusakazviitireni.’

⁴⁶Ava vachaenda kunorohwa kusingaperi; asi vakarurama kuupenyu husingaperi.”